Amu jé Bengaa be Yéhôva be ne te nyoñe ngap a mam me pôlitik?
Nge Bengaa be Yéhôva be nji nyoñe ngab a mame me pôlitik, a ne amu Kalate Zambe a ye’ele na be nji yiane bo nalé. Bi nji jeñe na bia tindi bôte bevo’o na, be su’u kala si kala ka; bi nji nyoñe ngame pôlitik éziñ, bi nji jeñ a zen éziñe na bi bi beta bito émo ji; a fe na, bi nji nyoñe ngap a mame bôte ba bo asu na be tyendé éjôé é tele si bi too. Bia yeme na Kalate Zambe a yemete mboane wongan ôte.
Bia tôñ éve’ela Yésus, nnye ate a nga bene beta éto pôlitik éyoñ a nga be si va. (Jean 6:15) A nga jô beyé’é bé na, be nji “bo bôte ya [émo ji],” a nga ba’alane be na, be nji yiane nyoñe ngame pôlitik éziñe ya émo ji.—Jean 17:14, 16; 18:36; Marc 12:13-17.
Bia su’u Éjôé Zambe, Yésus a nga kobô ajô Éjôé te éyoñ a nga jô na: “Mbamba foé ya [Éjôé, MN] Zambe nyô a ye katebane si se.” (Matthieu 24:14) Bi ne bijiane ya Éjôé Zambe, a bia yiane yôtane na, Éjôé te é mbeme so. Ajô te nde, bi ne te nyoñe ngap a mam me pôlitik ya si éziñ, ja’a a ma ya si bi too.—2 Becorinthien 5:20; Beéphésien 6:20.
Bi ne ngule ya kañete bôte ya mengame me pôlitik mese mbamba foé, éyoñe biabebien bi nji su’u ngame pôlitik éziñ. Bia jeñ a ngul ése na, mam bia jô, a mam bia bo, me liti na, bi too ndi na, Éjôé Zambe étam, nnje é ne mane kôme minju’u bôte ba tôbane mie si ése.—Besam 56:11.
Mbôle mengame me pôlitik me nji kandé bia, bi ne nlatane jôme jia a bobejañe ya meku’u mesi mese. (Becolossien 3:14; 1 Pierre 2:17) Ve, miñyebe mia nyoñe ngap a mam me pôlitik, mia bo na bebuni ya été be kandane mengam.—1 Becorinthien 1:10.
Bia semé bijôé. Ja’a bi nji nyoñe ngap a mam me pôlitik, bia semene bijôé ya vôme bi too. Kalate Zambe émien a ye’ele na nde bia yiane bo nalé. A jô na: “Môt ase a bo ba be tele ôsu mewôk.” (Beromain 13:1) Bia semene metiñ, bia ya’ane toya, bia su’u éjôé éyoñe ja nyoñe ntyi’an éziñ a lat a mvo’é ya bôte be to si jap. Bi nji jeñ a zen éziñe na bi kpwéé éjôé ya si bi to e si. Bia viane tôñ abendé Kalate Zambe a ve bia na, bi ye’elan asu “bejô bôt a ba bese be ne ôsu,” e dañe dañ éyoñe ba nyoñe mintyi’an mi ne volô bia na, bi bo fili ya bo Yéhôva ésaé.—1 Timothée 2:1, 2, lañ ayemé.
Bia yeme fe na, môt ase a ne fili ya tyik nge a ye nyoñe ngap a mam me pôlitik, nge momo. Jame da liti nalé é ne na, bi ne étyi te kamane môt éziñe na, a tobe ngame pôlitik jé. A fe na, bi ne teke so jo’ojo’o éyoñe ya vôt.
Ye jam ete da te taté den? Momo. A so ntete mimbu ôsu, Minlôman a Bekristene bevok, be nji be be nyoñe ngap a mame me pôlitik. Kalate a ne nlô ajô na Au-delà des bonnes intentions (nkobô Ingilis) a jô na, “Akusa bo na Bekristene ya ntete mimbu ôsu be mbe be semé’é bijôé, be nji be be nyoñe ngap a mame ma fombô pôlitik.” Nde fe, kalate ba loene na Sur le chemin de la civilisation (nkobô Ingilis) a jô na, Bekristene ya ntete mimbu ôsu “be nji be be nyoñe bito bi pôlitik.”
Ye été jangan é ne ndeñele mvo’é ya éjôé ya si bi to? Momo. Bi ne bôte be ne évôvoé. Bôte be tele bia ôsu be nji yiane ko bia woñ. Mbu 2001, e si ya Ukraine, Académie Nationale des Sciences a nga tili kalate éziñ. Nde a nga jô e kalate ate été na: “Den, abui bôt be nji nye’e été Bengaa be Yéhôva a lat a mame me pôlitik; jam ete nde é nga bo na, be nazi a be communiste be vini be.” Ve akusa bo bitibela’a ya ngame be Sovietique, Bengaa be Yéhôva be nga “ke ôsu a semé metiñ. Be nga saé vôme ba ba’ale biyem, a vôme ba kôme beminsini; be nji kange éyoñ ése be nga tabe éjôé be Communiste si.” Kalate ate a ke ôsu a jô na: “Avale te da da, mam Bengaa be Yéhôva ba buni den, me nji ndeñele mvo’é ya si éziñ.”