Za a ne Zambe?

1. Amu jé bia yiane kañe Zambe?

Nya Zambe a ne nyô a nga té biome bise. A ne teke ­atata’a nge memane. (Besam 90:2) Mbamba mefoé me ne Kalate Zambe été m’aso be nye. (1 Timothée 1:​11) Amu Zambe a nga ve bia ényiñ, jôme te nje nnye étam, bia yiane kañ.​—Lañe Nlitan 4:11.

2. Jé Kalate Zambe a jô mfa’a ya Zambe?

Te ke môt éziñ a yeneya Zambe amu a ne nsisim, nalé a tinane na, a bili aval ényiñe ja dañe binyiñe bise ya si nyi. (Jean 1:​18; 4:​24) To’o nalé, bi ne yene mefulu me Zambe a zene ya biôm a nga té. Bi tame nyoñ éve’an, mesam a bibuma mevale meva ma liti nye’ane wé. Fe’e Zambe ja yéné aval a nga kôme biôme bite. Zo’oyan ja liti na Zambe a bili ngul.​—Lañe Beromain 1:20.

Bi ne tu’a yeme mefulu me Zambe éyoñe bia lañe Kalate wé. Kalate Zambe a kate bia mam Zambe a nye’e, a ma a vini. Aval avé a nyoñe bôt, a jé nje a bo éyoñ a tele bité biziñ.​—Lañe Besam 103:7-10.

3. Ye Zambe a bili éyôlé?

Yésus a nga jô na: “A Tate wongan a ne yôp, Jôé dôé é bo’étyi.” (Matthieu 6:9) To’o Zambe a bili abui biyôlé mese’esa, a bili fo’o ve éyôlé jia. Nkobô ôse ô bili avale wo tote jôé Zambe. Bulu ba loene na, Yéhôva. Ve bevok ba loene na, “Jehova.”​—Lañe Besam 83:18.

Bôte be nga va éyôlé Zambe e Kalate Zambe été, a futi biyôlé mese’esa aval ane Nti, nge Zambe. Ve éyoñe Kalate Zambe a nga tiliban, éyôlé Zambe é mbe été bebé ane biyoñe 7 000. Éyoñe Yésus a mbe a ye’ele bôt, a mbe a liti be éyôlé Zambe.​—Lañe Jean 17:26.

Yene’e vidéo a ne nlô ajô na Ye Zambe a bili éyôlé?

4. Ye Yéhôva a nyoñe bia ngap?

Nge vôm ase bôte ba tôbane minjuk, ye nalé a tinane na Yéhôva a nji nyoñe bia ngap? Bôte béziñe ba buni na, Zambe a ve’ele bia asu na, a yene mbunane wongan. Ve jôm éziñ é nji bo nalé.​—Lañe Jacques 1:13.

Zambe a nga ve bôt angôndô ya édima das, amu a nga ve be ngule ya top. Ye bia yeme fo’o mvaé Zambe a nga bo bia, éyoñ a nga jô’é na, bi top nge bia ye kañe nye, nge momo? (Josué 24:15) Ve abui bôte ba tobe na, ba vañe bo bôt bevok mbia be mam. Jôme te nde minjuk mi ne abui. Yéhôva a bili ôlun nlem éyoñ a yene mam mete.​—Lañe Metata’a 6:5, 6.

Yehôva a ne Zambe a nyoñe bia ngap. A yi na bi nyiñe meva’a été. Ana’ana, aye va minjuk a bôte ba bo mie. Ve émien a bili beamu a jô’é na, minjuk mi ke ôsu mone nté. Ayé’é 8, d’aye liti bia beamu bete.​—Lañe 2 Pierre 2:9; 3:7, 13.

5. Aval avé bi ne ke ôsu a subu Zambe bebé?

Yéhôva a loene bia na, bi subu nye bebé a zene ya meye’elan. A nyoñe môt ase ya be bia ngap. (Besam 65:2; 145:18) A ne avôle ya jamé. To’o éyoñe bia bo jam é ne te yiane, a yeme éyoñe bia ve mengule mese na, bi bo nkômbane wé. Akusa bo na bi nga bialé abé été, bi ne late ngbwa a Zambe.​—Lañe Besam 103:12-14; Jacques 4:8.

Yéhôva nnye bia yiane dañe nye’e, amu nnye a nga ve bia ényiñ. (Marc 12:30) Nge wo ke ôsu a yé’é yeme Zambe, a bo fe nkômbane wé wo ye liti nye’ane wôé. Éyoñe te, wo ye tu’a subu nye bebé.​—Lañe 1 Timothée 2:4; 1 Jean 5:3.