SIKÔLÔ 2

Kobô’ ane wo laane minlañ

2 Becorinthien 2:17

ÔBALEBAS: Bela’ane tyiñe nkobô jôé, fatane nkobô jôé ja yiane liti bôte ba vô’ôlô wo aval wo yene miñye’elane wo ve be.

Taté’é ye’elan, kôme’e fe kômesan. Ye’elane Yéhôva, sili’i nye na a volô wo na nnye ô ve duma, sa ke womien. Beme’ ôsimesane wôé mintene mejô wo zu la’ase. Te bo ane kôs, te lañe ve nkpwase ya nkañete wôé, nge ke vôm ésaé jôé ja so. Bela’ane bifiaé biôé womien.

Nge wo te tyi’i na wo ye lañe bifuse ya Bible, nge ke kalate mfe, jeñe’e na ô kôme wô’ô bie, nalé aye volô wo na ô lañe ne sañesañ. Nge wo lañe mejô me bôte befe, jeñe’e na ô kobô v’ane bebiene mbe ba kobô, ve te bo ane wo bo fianga.
Bela’ane bifia bia nambe bôt. Fase’e amu jé bôte ba vô’ôlô wo ba yiane wô’ô mame wo zu ye’ele be. Jam da dañe mfi nde le. Nge ô bo nalé, été jôé, avale wo fô’ô mo, avale wo bo asu dôé, bia ye ve bôte nkômbane ya vô’ôlô wo.

Wo yiane kobô avale wo ja zu wo kobô, teke bo ébiasé. Wo ye semé foé wo kate bôt nge wo belane mbamba bifia a mbamba nkobô.
Fombô’ô bôte ba vô’ôlô wo. Nge metume ya vôm ô né ma kañese de, fombô’ô bôte ba vô’ôlô wo. Éyoñ wo bo nkañete te jeñe na ô fombô abui bôt éyoñ jia, fombô’ô môt ase éyoñe jé.