Mona minga a wômô!

Jaïrus a yene na Yésus a saéya minga a to a bili metyi ma kui nye nyul. Nalé a tinane na Yésus a ne fe ngule ya volô mona minga wé, ja’a émien a simesane na ‘a yianeya wu a va.’ (Matthieu 9:18) Ye be ne fo’o beta volô nye?

Nté Yésus a nga’an a kobô’ô a minga a te saé, bôte béziñ ba suan be so’o nda Jaïrus a jô nye na: “Mone wôé a wuya!” Ba ke ôsu a jô na: “Wo abeta ndeñele Tate amu jé?”​—Marc 5:35.

Avale nju’ ajô di! Môte nyi, môte ba semé nlame wu, nnye a nto va teke ngule ya bi mvolan. Susu’a ngo jé é wuya. Yésus a nji tu’a wô’ô jôme ba jô, ve a tyiñelane be Jaïrus a ve nye ngule nyul a jô nye na: “Te ko woñ, ve buni.”​—Marc 5:36.

Yésus a ke litane Jaïrus e nda jé. Éyoñe ba kui, ba koon abui zô’é valé. A ba ba yôn, a ba ba yi du, a ba ba biban amu mintaé be bili. Yésus a nyiin, ane a jô bôte na: “Mon a nji wu, a ne ôyo.” (Marc 5:39) Éyoñe bôt ba wô’ô bifia bite, ba woé nye amu ba yeme na mona minga a wuya fo’o. Ve, Yésus a zu belane ngule ja so nye be Zambe na, a liti bôte na, bôte be wuya be ne beta wômô, fo’o ve aval ane ba vele môt a ne ôyo melom.

Ane Yésus a kuli bôte bese nseñ, ô vaa ve Pierre, Jacques, Jean a bebiaé be mona minga a ne ñwuan. Yésus a nyoñe bôte bete betan na ba ke vôme mona minga a bô. Ane a bi mone wo a jô na: “Talitha Koumi; ajô te e ne na, Mona minga, me ajô wo na, Kôlô’ô si.” (Marc 5:41) Été été, mona minga ve kôlô si, a nga wulu. Tame simesan abime meva’a Jaïrus ba ngal be bili amu ba yene jam ete a mis! Asu ya na a beta yemete na mongô a ne fo’o vevee, Yésus a jô na be ve nye jôme ya di.

Biyoñe ya mvus, Yésus a mbe a jô’ô bôt a mbe a saék na, be bo teke ke ba yametane foé a lat a jam a te be bo, ajô te a bo fe de a bebiaé ba. Akusa bo nalé, bebiaé a bôte bevok be ne njalan a mevak, ba kate foé te “si éte ése.” (Matthieu 9:26) Ye womien wo ye bo ôjeja’a ya kañete avale jam ete nge môte wo too ô nye’e a te wu, éyoñ éte wo yen ane a beta nyiñ? Ñwômane miñwuane baa le Yésus a bo.