SIKÔLÔ 7

Ye’ele’ mam me ne été a ma ma nambe bôt

Luc 1:3

ÔBALEBAS: Asu na bôte ba vô’ôlô wo be tu’a wôk miñye’elane wo ve be, wo yiane kate be mame me ne été.

Jeñek a belane mefoé me ne été. Dañe’e belane Mejô me Zambe; nge nalé a ne boban, lañe’e me Kalate Zambe été. Nge wo ye belane mintilane beyeme mam, kalate mefoé éziñ, nlañ éziñ, nge jam afe na ô su’u ñye’elane wo ve, taté’é yemelane nge mam mete me ne été, a nge me ne ma ma dañe mimfefé.
Bela’ane mefoé me ne betotyii. Éyoñe wo timin éfuse wo te lañ, mame wo jô ma yiane lu’an a bifuse bia bômane je, ma yiane lu’an a nlô ajô ya Bible, a bekalate ‘ôlo ô ne mewôk a fek’ wo kuli. (Mt. 24:45) Nge wo belane mefoé ma so kalate mfe, te tyendé jam éziñ y’été, te jô jam da selan a di mbôndé a nga kômbô jô.

Te ve’ele beté ôdo’é. Nge e ne ntilane na “bôte béziñ,” te jô na “bôt abui;” vôm e ne ntilane na “biyoñe biziñ,” te jô na “éyoñ ése;” vôm e ne ntilane na “e ne bo na,” te jô na “e nga bo na.”
Bo’o na bôte be tu’a wôk. Éyoñ ô maneya lañ éfuse ya Kalate Zambe, nge ke mejô ya kalate mfe, sili’i minsili mia bo na bôte be fas, ô ne fe nyoñ éve’an éziñ asu ya na, bôte ba vô’ôlô wo bebien be wôk jame wo kômbô ye’ele be.