Mbe’e ñyé’é a bili

Yésus a te ve mbamba miñye’elan éyoñ a to nda évete Bepharisien éziñ é nga bañete nye asu mon ésua bidi. Éyoñe ji, nté Yésus a ke Jérusalem, abui bôt da tôñe nye. Amu jé? Ye ba kômbô fo’o bo benya beyé’é bé ja’a jam ete da ye sili be na be nyume bebien abui mam?

Nté ba wulu, Yésus a jô be jam éziñ da zu balé bevo’o y’été: “Nge môt a zu be ma, te vini ésa wé ba nyia, a minga wé, a bone bé, a bobenyañ, a beka, nalé fe ényiñe jé, a se ngule ya bo ñyé’é wom.” (Luc 14:26) Jé a kômbô jô?

Yésus a nji jô na, bôte bese ba tyi’i na ba bo beyé’é bé ba yiane vini bivuvumane biap. Ve a viane liti na be nji yiane nye’e be a dañe Nye; a zen éte be ne jô na, ba vini bivuvumane biap, be teke bo ane môt a nga bene mbañete be nga lôme nye asu dina bidi amu a mbe a ndôme luk. (Luc 14:20) Bible a jô na ésaa Bejuif, Jacob, a nga “vini” Léa a nye’e Rachel; nalé a tinane na a nga nye’e Rachel a dañe monyañe wé Léa.​—Metata’a 29:31.

Ba’ale’e na, Yésus a jô na ñyé’é a yiane vini “ja’a ényiñe jé émien.” Nalé a tinane na, nya ñyé’é a yiane nye’e Yésus a dañ émien, a kele kui na a kañese jañele ényiñe jé nge nalé a sili amu a nye’e nye. Da yené fo’o na, e bo ñyé’é Krist a ne beta mbe’e. Môt a nji yiane nyoñe ntyi’an ôte éngbwemese, teke taté fas.

Mbe’e ñyé’é a bili ô ne bo na a tôbane minjuk, a étibela’a amu Yésus a jô na: “Bôte bese môt a bo te be’e [élé] jé émien, a zu tôñe ma, a se ngule ya bo ñyé’é wom.” (Luc 14:27) Ôwé, nya ñyé’é Yésus a yiane bo nkômesane ya tôban avale minju’ ese ane Yésus émien. Yésus a nga jô jô na, a ye wu mo besiñe bé.

Nde, bôte ba be Yésus ba ke dulu ba yiane kôme fas na be yem, jé ja tinane na e bo ñyé’é Krist. Yésus a ngôné jam ete a éve’an. A jô na: “Mi to va, za a ye lôñe beta nda mekok, te taté tabe si a fase tañ je aye yian nda éte, nge akume dé de aye bo abim de ayiane mane je? A za bo na, éyoñ a maneya bôé meko’o ya si, ve a se ngule ya sondô.” (Luc 14:28, 29) Nde ñhe, ôsusua na ba tyi’i na ba bo beyé’é bé, da yiane na, e bôte ba ke Jérusalem a nye, be nyoñeya ntyi’an a nleme wop ôse na, ba be’e mimbe’e miap, be sondô fe ésaé jap avale da yian. A yemete ôsimesan ôte a éve’an éfe:

“Za njô bôt a ke wosan njô bôt mbo’o bita, a ye bo te tame tabe si a bôndé fek, nge émien a bezimbi betoyini awôm a ne ngule ya ke tôbane môt a zu wosane nye a ne bezimbi betoyini mewôm mebaé? Nge a se ngu, wôna nyô mbo’ a ngenan ôyap, a ye lôme bôt be ke sili ane be aye bo élat.” Asu na a ngôné e jam e ne mfi, Yésus a jô na: “Ajô te, mia bese môt a bo te li’i biôm bise a bili, a se ngule ya bo ñyé’é wom.”​—Luc 14:31-33.

E ne été na, Yésus a nji kobô ve asu bôte ba tôñe nye valé. E bôte bese ba jeñe na be yeme Krist, ba yiane kañese tôñe melep a ve va. Nalé a tinane na, ba yiane bo nkômesane ya nyume bebiene mam mese be bili (biôm bi mo, ja’a binyiñe biap) nge ba kômbô bo beyé’é bé. A ne fo’o jame ya fas a futi meye’elan été.

Éyoñe ji, Yésus a beta kobô ajô ya jam éziñ a tatéya kobô Nkañete wé ya Nkôle yôp, éyoñ a nga jô na beyé’é bé be ne “nku ya si nyô.” (Matthieu 5:13) A kômbô jô na, fo’o ve ane nku wo ba’ale bidi na bi bo te ndaman, beyé’é bé ba ba’ale bôte na be bo te ku mfa’a ya nsisim. Mbôl ésaé jé é mbeme zu man, a jô na: “Nku ô ne mvaé: ve nge nku ô sameya zam, jé je aye beta ve wô zam?” (Luc 14:34) Bôte ba vô’ôlô nye ba yeme na, nku éziñ be wô’ô kus ô nji bo abeñ amu ba fulane wô a tyia, a nalé a nji beta bo nya mfii.

Nde Yésus a liti na, ja’a bôte be nyoñeya abui mimbu na ba tôñe nye a bo beyé’é bé be nji yiane voé nsisim a te’elan. Nge ba tek, ba ye ke beta bo mfi, fo’o v’ane nku ô jañeleya ngule jé. Émo é ne viane taté na ja kpwe’ele be. A jame da dañe e ne na, ba ye ke beta yené mvaé mise me Zambe, a be ne viane ve nye éyôlé mvit. Ane Yésus a yemete mfi ya sa’ale jam ete a jô’ô na: “Môt a ne melo ya wôk, a wô’ôk.”​—Luc 14:35.