Minsili Bôte ba Sili

Ye Bengaa be Yéhôva fe be ne ke jeñ aluk internet?

Yéhôva a yi na bôt ba luk be bo mevak, a na be bi mbamba élat a ye tabe nnôm éto. (Mt. 19:4-6) Nge ô nga kômbô luk, aval avé ô ne yene môt a yiane wo? Mbôle Yéhôva nye a ne Nté wongan, nnye étam a yem mam bi ne bo asu na bi bi mbamba aluk. Ajô te, nge wo tôñe meleb a ve bia, wé bi benya meva’a nda alu’u jôé. Bi tame ñhe zu yene melebe méziñ a ve bia.

Jam ôsu bia yiane yem e ne na: “Nlem ô ne medu’an . . . a ô ne étua ébo.” (Jr. 17:9) Éyoñ bôte bebaé ba taté na ba yeman a nsôñane ya lu’an, mame ba wô’ôtan nlem me ne bo ngul aval e ne na, be nga kate nyoñ mbamba mintyi’an. Éyoñ bôt bebaé ba nyoñ ntyi’an ya lu’an amu ba tôñ ve avale ba wô’ôtan nlem, be wô’ô su’ulane jôban (Min. 28:26). Éyoñ bôte bebaé be ngenane teke tu’a yeman, e nji bo fek na môt ase a kate nyu mbok abim avé a nye’e nye, nge ke bo nye atiñ aluk.

Minkana 22:3 a jô na: “Môt a ne ntyel a yen mbia jam, ve sobô; Ve bedimi mam ba lôt ôsu, a tôban njuk.” Amu jé bi nji yiane ke jeñe meluk internet? Éngôngole jam é ne na, bôt béziñ be nga ke jeñe meluk internet éyoñe te be nga koone na, môt be mbe be kômbô’ô luk a nga du’u be. A fe na, bôte béziñ ba belane menjeñe mefoé mete asu na be wôse bôte moné. E wô’ô fe kui kui biyoñ biziñ na avale bôt ete e jô na e ne Bengaa.

Yeme’e na bôt be wô’ô belane beminsini asu na mbe be kate bôt nge be ne lu’an nge momo. Ve teke jam da liti na avale mboan ete e wumeya bibuma. Ye e ne mvo’é na bi tabe ndi a minsini môt a binam a nga kôm asu na bi jeñ aluk? Ye alu’ e ne fianga jam nga? Jé ja dañe bia mfi, ye beminsini bete, ye melebe ma so Kalate Zambe?​—Min. 1:7; 3:5-7.

Kalate Minkana 14:15 a jô na: “Ndimi mam a buni éfia ése; Ve môt a ne ntyel a tu’a fombô nkean a ke.” Ôsusua na wo nyoñ ntyi’ane ya lu’u môt, wo yiane taté kôme yem avale môt a né. E ne ayaé na ô kôme yeme môt a zene ya internet. To’o môt a lôme wo befôtô, nge laane a wo éyoñ ése internet, ye abim ete da yian asu na ô jô na wo yeme nye? Bôte béziñ be nga simesane na be yeneya fo’o môt a yiane be internet, be nga su’ulane ku avem môse be nga yenan.

Ntili Besam a nga jô na: “Me nga bo te tabe si a bôt be ne minsos; nalé fe ma ye [tup] bôt be ne medu’an.” (Bs. 26:4) Den, abui bôt da simesane na asu na be nye’e be nge ke na be yene be mvaé internet, ba yiane laane minsos. Be ne solé mbia mefulu map, nge ke na mbia mefulu mete me ne bo teke yené éyoñ ba laan a môt internet. E ne mfi na ô sili womiene minsili mi: Nge môt a kate wo na ne Ngaa Yéhôva internet, jé ja ve wo njika’ane na a dubaneya? Ye a ne étôtôlô Kristen? Ye a bili mbamba élat a Yéhôva? Ye bôte ya akônda dé ba jô na a ne mbamba môt? Nge ke na, ye a ne avale Bekristen da jô ve anyu anyu na ba bo Zambe ésaé, mimboone ke mi too aval afe? (1 Bec. 15:33; 2 Tim. 2:20, 21) Ye jam éziñ da kamane nye na a luk mise me Yéhôva? Wo yiane yeme mame mete mese. Jam ete e ne bo wo ayaé nge ô teke taté laan a bôte ba yeme môt ate. (Min. 15:22) Ve bia yeme na nya mbo ésaé Yéhôva a nji kômbô “fulane [a] bôt be ne te buni” Zambe.​—2 Bec. 6:14; 1 Bec. 7:39.

Mbôle bôte ba kômbô luk be ne tôbane minju’u nge be kele jeñ alu’u internet, da sili na be jeñ mbamba mezen. Nne ñhe Ngaa Yéhôva é ne yene mbamba môt a ne luk vé? Nge nalé a ne bobane bi ne yenan bisulan, bitôkan a beta bitôkan.

Ve nge nalé a vo’o boban, éko éziñ amu ébubua jam éziñ é ne nseñ, aval ane ôkone COVID 19, bi ne yene Bengaa bevo’o be ne minkoé a zene ya internet éyoñ bia bo bisulan. Bi ne yen avale ba yalane bisulan a aval avé ba liti mbunane wop. (1 Tim. 6:11, 12) Bi ne fe bi fane ya laan a be mvus ésulan. Nge e ne na ô yeneya môt wo simesane na mia nye mi ne lu’an, bisulane bite bi ne volô wo na ô yem avale môt ate a bo éyoñ a ne bôt été. A nalé a ne volô wo na ô yem avale môt a né. (1 P. 3:4) Nté éyoñ ja lôt, wo ye kui na ô yem nge minsôñane miôé mia lu’an a minsôñane mié, a nge môt ate a ne bo mbamba nluk.

Kalate Zambe a jô na: “Môt ase a yene minga [nge nnôm] ya luk, a yene mbamba jôm, a yene fe mvam be Yéhôva.” Min.18:22. Nalé a tinane na, minkoé mi ne bi abui bibotane nge mia tôñe melebe ya Kalate Zambe éyoñ mia jeñe meluk.