E tyelé nleme yôp a tinan aya?

Ba jô na môt a tyelé nleme yôp éyoñ a wô’ô nyule som amu jam éziñ da ndeñele nye. Éyoñ nlem ô tyele wo yôp, boo wôé a lôm abui b’hormone nyule jôé ése. Nalé a bo na, nlem ô taté na wo kut avôl avôl, metyi teke beta lôte minsis avale da yian, ô nga vebe avôl, minsôn mi mane fe yem. Ôsusua na wo zu yeme jam ébien da boban, nyule jôé é maneya bo mam mete mese. Éyoñe jam da tyelé wo nleme yôp da man, nlem ô bômbô wo si, nyul é mane beta bulan aval é mbe.

E TYELÉ NLEME YÔP: MBAMBA JAM A MBIA JAM

Ntyelan nleme yôp ô ne jam Yéhôva émien a nga futi menyule mangan asu na bi tabe nkômesan ya batan nju’u éziñ. Jam ete da taté boo. Mbamba ntyelane nleme yôp a volô na ô ji’a nyoñe ntyi’an éyoñ ô tele été éziñ. Nalé a volô fe na, ô bo ngule ya tôé minsôñane miôé nge ke bo mam ô nji be ô buni’i na ô ne bo; éko éziñ nge wo ke bo meve’ele, nge wo ke jeñe bisaé vôm éziñ, nge ke éyoñe bôte ba sengane sport.

Ve, nge ô dañe tyelé nleme yôp, jam ete e ne viane soo wo abui minjuk. Éyoñ ô ne avale môt da dañe tyelé nleme yôp, ô ne fame ôkon, ô ne fe kone nlem. Ntabane wôé, a avale wo zu wo nyiñ a bôte bevok, bi ne fe tyendé. Ô ne fe taté na wo vibane ta’a, banga a meyok, a bo mbia be mam befe. Ô ne fe su’ulane kone dépression, ô ne kone nlô, nge jeñe jeñe na ô wôé womien.

E ne fo’o été na bôte bese ba tyelé ke nleme yôp avale da, ve jam ete e ne soo abui akon. E ne fe nambe afôla ése ya nyule jangan.