1. Ye Zambe Nnye A Yiane Be’e Ayeme Ya Minju’u Miangan?

Amu jé nsili ôte ô ne mfi?

Abui bôte da bisi ki Zambe amu ba jô na Zambe nnye a be’e ayemé ya minju’u miangan.

Tame fas

Abui betebe ôsu ya miñyebe da kate bôte bôsa na Zambe nnye a so be minjuk. Éve’an é ne na, ba jô na:

• Bibubua bi ne fonose ja so be Zambe.

• Bongô ba wu amu Zambe a yi abui beéngele yôp été.

• Zambe a botane bita, jame da soo abui minjuk.

Teke vaa nge beté, abui mam betebe ôsu ba kañete a lat a Zambe é ne minsos. Nge é bo ki na Zambe a lumeya be mvus?

Jé Bible a ye’ele?

Sake Zambe nnye a so bia minjuk.

Nge a bo nalé, mboan ôte ô vo’o lu’an a mefulu Bible a jô na Zambe a bili. Éve’an é ne na, Bible a jô na:

“Mezene me [Zambe] mese m’atôñe nya ntyi’ane mejô . . . zôsô a te mbia jam.” ​—DEUTERONOME 32:4.

“E bo’o Zambe ôyape na a bo abé, a bo Nyô a ne Ngul Ése ôyape na a bo mbia jam!”​—JOB 34:10.

“Nyô a ne ngul ése a ye bo te vite nya ntyi’ane mejô.”​—JOB 34:12.

Zambe a vini ñyebe ôse wo ve nye éyôlé mvit.

Ja’a miñyebe mia ye’ele na Zambe nnye a so bia minjuk, a mi mia su’u bita a mewôé me bôt.

“Bekulu mejô b’akuli minsos a jôé dam; me nji lôme be, nalé fe me nji jô be nalé, nge kobô be: b’akuli mia ñyenan ô ne minsos, a nkulan mejô ya bemvi’i a menduane ya nleme wop bebien.”​—JÉRÉMIE 14:14.

Yésus a nga liti na a vini miñyebe mia du’u bôt.

“Sa môt ase a jô me na, ‘A Tat, A Tat,’ a ye ke ayoñ ya yôp; ve nyô a bo ane Tate a ne yôp a nye’e. Môs ôte, bôt abui be aye jô me na, ‘A Tat, A Tat, ke bi nga kulu mejô a jôé dôé, a va mimbia minsisim a jôé dôé, a bo beta be mam abui a jôé dôé? Éyoñe te me aye jô be na, Me nji yeme mia: kôla’ane vôm me to, mia bôt mi abo mbia be mam.’”​—MATTHIEU 7:21-23.