Dañe’e mbia fulu ya mieneke nsoé

Môt a mieneke nsoé a tebe mbia été mfa’a ya nsisim, amu fulu éte ja ndaman ôsimesane wé, a bo na minyamete mié mmie a telé ôsu.a A ne taté na a yene bôte bevo’o ane biôm bia volô nye na a tyi’i ôzañe wé ya ke binoñ. A ke binoñ éyoñ éte, sa ke amu édiñ, ve amu a kômbô ji’a jalé ñyian éziñe ya minsôn. Ôzañ ôte ki wo tyi’i ve tañ étun éyoñ. Nya ajô a ne na, e mieneke nsoé a volô ke na môt a wôé bibu’a ya nyule jé mfa’a ya ‘mbia nkeane binoñ, mvin, a mbia nkômbane ya bo mame ya bisôk;’ fulu éte ja viane nene nene mbia minkômbane mite.​—Becolossien 3:5.

Nlômane Paul ô nga tili na: “A bôt me anye’e, amu bi bili mintiñetane mite, mbo’ane biabebien mfuban mfa’a ya mvin ése ya minsôn a nsisim, bi sondô bo mame ya zôsô bi ko Zambe woñ.” (2 Becorinthien 7:1) Nge wo juan a fulu éte, te wo tek. Yéhôva a ne “avôle ya jamé,” a kômbô fe volô wo. (Besam 86:5; Luc 11:9-13) Bijô bibien nleme wé wo ve wo, a ngule ése wo ve asu na ô jô’é fulu éte, ma liti na ô ne mbamba môt, ja’a e wô’ô kui biyoñe biziñe na ô beta ku. Ba’ale’ fe na “Zambe a dañe minlem miangan,” a na, “nnye a yeme mam mese.” (1 Jean 3:20) Zambe a yene ki ve bikobe bia bo, a yene fe avale môte bi né. Mam a yeme be bia, ma bo na a kôme vô’ôlô bia éyoñe bia sili nye njaman. Ajô te, te sulu mo si, bo’o mbane ya yoé nye nleme wôé, aval ane mone mongô a kobô ésaa, éyoñ jam éziñ da ndeñele nye. Yéhôva a ye ve wo mbamba mone môte ya nlem. (Besam 51:1-12, 17; Ésaïe 1:18) Ve wo yiane fe jeñe na ô bo avale wo te sili meye’elane môé été. Wo yiane fe sa’ale pornographie a mbia mewoso.b

Nge wo yene na wo kate jô’é fulu ya mieneke nsoé, kate de éso nge nyua, nge ke Kristene fe é ne mvam a étôtôlô nsisim.c​—Minkana 1:8, 9; 1 Bethessalonicien 5:14; Tite 2:3-5.