Avale Yéhôva a yen nkandan a ntyaman aluk

Yéhôva a yi na beluk be ba’ale élate be nga bo éyoñe be nga lu’an. Éyoñ a nga lat alu’u ôsu, Yéhôva a nga ve atiñe di: “Fam . . . ba ngale b’aye tabe nlatan: a b’aye bo nsône wua.” Yésus a nga ba’alan atiñ ete éyoñ a nga jô na: “Ajô te, jôm Zambe a maneya lat, môt a [bo’o te] kandé je.” (Metata’a 2:24; Matthieu 19:3-6) Nalé a liti na, asu Yéhôva ba Yésus, aluk da yiane tabe nnôm éto, awu étam nde é ne kandé bôte be ne nlu’an. (1 Becorinthien 7:39) Mbôl alu’u é ne étyi mise me Zambe, môt a yiane kôme tabe ntyel ôsusua na a kobô ajô ntyaman aluk. Yéhôva a vini éyoñe môt a vañe tyam alu’u dé.​—Malachie 2:15, 16.

Jé é ne ve môte ngule ya tyam aluk? Bia yeme na Yéhôva a vini mejian a mbia nkeane binoñ. (Metata’a 39:9; 2 Samuel 11:26, 27; Besam 51:4) Yéhôva a yene mbia nkeane binoñ avale nyé é ne na, a kañese na môt a tyam alu’u dé, nge nnôme wé nge ke minga wé, a te bo nsem ôte. (Ô ne lañ kabetôlô 9 ya kalate nyi, abeñ 7, na ô yem jôm é ne mbia nkeane binoñ.) Nge môte mia nye mi ne nlu’an a bo mejian, Yéhôva a jô na wo étam ô ne tyi’i na wo jamé, nge ke na wo tyam aluk. (Matthieu 19:9) Nge wo tyi’i na wo tyam aluk, Yéhôva a ye ke wô’ô wo ôlun. Ve Bekristene bevok be nji yiane tindi môte na a tyam aluk. Mam méziñ me ne bo na môt a ke ôsu a nyiñ a môte ba nye be ne nlu’an, e dañedañ nge a kôme jôban abé dé. Bia yemete na, nge môt mia nye mi ne nlu’an a bo mejian, môte mfe a nji yiane tyi’i señe jôé; nge wo tyi’i na wo tyam aluk, wo yiane fe tabe nkômesane ya jibi minju’u ntyi’an ôte ô ne soo mie.​—Begalate 6:5.

Bekristen béziñ be nga nyoñe ntyi’ane ya kandan nge ke tyam aluk, ja’a môte ba be be be mbe nlu’an a nji bo mejian, amu étibela’a é mbe é lôteya be nkôñ. Éyoñe nalé a kui, Bible a jô Kristen a tyam alu’u na, “a tabe’e te luk, nge ke na a late’ nnôme [nge ke minga] wé ñbwa.” (1 Becorinthien 7:11) Kristen ja kandan a môte ba nye be ne nlu’an aval ete é nji bo fili ya lu’u môte mfe. (Matthieu 5:32) Bi tame zu yene mam me ne bo na Kristen é kandan a môte ba nye be ne nlu’an.

Nnôm a vañe bene nyoñ ngap a nda bôt. Menda me bôte méziñ ma wu azoé, amu na fam ja bene toñe nda bôte jé, a too ke na a ne ngule ya bo de. Kalate Zambe a jô na: “Nge môt éziñ a bo te ba’ale bôte bé, a adañedañe bôte ya nda jé émien, nnye ate a maneya kat mbunan, a a ne abé a dañe nyô a ne te buni.” (1 Timothée 5:8) Nge avale môt ete é bene tyendé, minga wé a ne ke yen éjôé na é bo na be kandan, amu a kaman émien a bone bé. Bemvendé fe ba yiane kôme fas ajô ete. Be ne telé môt a vañe bene toñe nda bôte jé feñ.

A wu ébôm. Môt a ne wobane bibôm aval é ne na, a ne viane fame ôkon, nge ke wu. Nge môt a nye’e mendum a ne Kristen, bemvendé ba yiane kôme fas ajô ete, a yemelane nge é ne été na a yite môt a nga luk. Môt a ne tebe feñ nge a bili fulu ya dimine yaa, a nge a nye’e évô a mendum.​—Begalate 5:19-21.

Élate jé a Yéhôva é ne wu. Kristen é ne tôbane ngule bitibela’a nda aluk amu môte ba nye be ne nlu’an a nji yi na a kañe Yéhôva; nge ke na, a yemete nye na a tyam atiñe Zambe éziñ. Kristen éte é ne tyi’i na ja ke yen éjôé na é ve nye ngule ya kôlô alu’u te, amu ja kômbô ke ôsu a “wô’ô Zambe” a dañe môta binam.​—Mam Minlôman 5:29.

Ja’a Kristen é tele bité bi bise, nge ke na, ja tôbane beta minju’u mife nda aluk, môt éziñ a nji yiane tindi nye na a kandan, nge ke yemete nye na a tabe nda alu’u jé. Bekristen be ne bitôtôlô nsisim be ne ve nye mbamba melep ma so Kalate Zambe, ve be nji bo ngule ya yem mam mese ma te soo zô’é éza nda aluk. Yéhôva étam nnye a kôme yem jôme ja te boban. Nge minga a beté ôdo’é éyoñ a kobô ajô minju’u a tôbane mie nda aluk, amu a kômbô kandan a nnôm, minga ate a liti na a biasé Zambe a nta’ane mame wé. Avale da fe asu fam. Yéhôva a yem éyoñe môt a vañe kôlô aluk, ja’a a solé de bôte bevok. Ôwé, “mam mese me ne soé a me ne nkulane mise ya nyô bi ayiane yalane nye.” (Behébreu 4:13) Ve nge Kristen ja yene na é tele mbia été, Bekristene bevok be nji yiane ve nye mekua nge a jô na a kandan. Amu “môt ase ya be bia a ye yalan ajô dé be Zambe.”​—Beromain 14:10-12.