Yésus a ye’ele beyé’é bé avale ba yiane ye’elan

Bepharisien be mbe aka’a miñyené. Be mbe be bo’o mam asu na bôte be yene be. Be mbe be ye’elan nseñ zañ, mise me môt ase. Be mbe be yé’é ayabe meye’elan, éyoñ éte ba ke ba’alane me besynagogue a minjoñ minjoñ asu na, bôte bese be wôk ane ba ye’elan. Jôm ete nje bôte be nga kam éyoñ Yésus a nga jô be na: ‘Te mia ye’elan ane Bepharisien. Ba buni na Zambe a ye vô’ôlô be amu ba kobô abui, ve ba du’uban. Meye’elan me ne jam da boban zañ mia be Yéhôva. Te mia ba’alan ajô da éyoñe ya éyoñ ése. Yéhôva a yi na mi kate nye mam me ne mia minlem.

‘Nde mia yiane ye’elan ana: “A Ésa wongan a ne yôp, jôé dôé é bo’o étyi. Éjôé jôé é za’ak. Nkômbane wôé ô boba’ane si va aval ane wo bobane yôp.”’ Yésus a nga jô fe be na be ye’elan asu bidi bia yiane be môs, asu njamane ya bikobe biap, a asu mam mefe ma fombô ényiñe jap.

Yésus a nga jô na: ‘Bo’ané mban ya ye’elan. Kelané ôsu a ja’é Ésa wônan mbamba be mam. Mbiaé ase a jeñe na a ve mone wé biôm bi ne mvaé. Nge nyo mon a ja’é wo belet, ye wo ye ve nye akok? Nge a ja’é wo kos, ye wo ye ve nye nyo?’

Nde a nga jô be na: ‘Nge mia yeme ve bone benan mam me ne mvaé, nguma’ane ke Yéhôva? A ye ve mia mbamba nsisim nge mia ja’é nye.’ Ye wo tôñe fo’o melebe me Yésus mete? Ô wô’ô sili Yéhôva jé éyoñ wo ye’elan?