Fers Kingz
16 Dis da how Jehoava tel Hanaynai son Jeehoo ih wahn ponish Bayasha. Ih seh: 2 “Ai lif yu op fahn owta di dos ahn put yoo fi leed mai peepl di Izrelait dehn, bot yoo kantinyu fi komit di saym sin weh Jeroboawam komit. Ahn yoo mek mai peepl Izrel komit di saym sin an ofen mi. 3 Soh Ah wahn dischrai Bayasha an ih hoal famili jos laik weh Ah mi du wid Neebat son Jeroboawam ahn fi hihn famili. 4 If enibadi fahn Bayasha famili ded eena di siti, daag wahn eet ahn op, an if eni a dehn ded eena di feel, jankro wahn eet ahn op.”
5 Ahn di res a Bayasha hischri weh taak bowt ih powa an evriting weh hihn mi du, deh rait dong eena di hischri buk a Izrel king dehn. 6 Den Bayasha ded* ahn dehn beri ahn da Tirza. An ih son Eela staat rool az king afta ahn. 7 Pahn tap a dat, Jehoava anonks ih ponishment gens Bayasha an ih famili chroo ih prafit Jeehoo hoo da Hanaynai son. Dis hapm bikaaz a aala di bad tingz weh ih mi du weh mi ofen Jehoava jos laik weh Jeroboawam an ih famili mi du ahn bikaaz ih mi kil Naydab.
8 Eena di 26th yaa wen Aysa mi-di rool az king eena Jooda, Bayasha son Eela staat rool az king oava Izrel da Tirza. Den hihn rool fi too yaaz. 9 Ih servant Zimrai, di cheef oava di waar chariyat dehn, mi-di plan fi kil ahn wail ih mi-di jrink ahn geh jronk da Arza hows. Arza mi in chaaj a di king famili da Tirza. 10 Zimrai atak ahn an kil ahn eena di 27th yaa wen Aysa mi-di rool az king oava Jooda. Ahn Zimrai staat tu rool az king afta ahn. 11 Az soon az hihn staat rool az king, ih kil evribadi fan owta Bayasha famili. Ih neva lef non a di mayl* dehn alaiv, weda da mi ih relitiv* er ih fren. 12 Soh Zimrai mi kil owt hoal a Bayasha famili, jos laik weh Jehoava mi seh bowt Bayasha chroo ih prafit Jeehoo. 13 Dis hapm bikaaz a aala di sin weh Bayasha an ih son Eela mi komit ahn di sin weh Izrel komit bikaaz a dehn. Dehn ofen Izrel Gaad Jehoava wen dehn wership fi dehn wertles aidol. 14 Ahn di res a Eela hischri, evriting weh hihn mi du, deh rait dong eena di hischri buk a Izrel king dehn.
15 Eena di 27th yaa wen Aysa mi-di rool az king oava Jooda, Zimrai mi-di rool az king fi sevn dayz da Tirza wail di soalja dehn mi-di set op kyamp fi fait gens Gibeton, weh bilangz tu di Filisteen dehn. 16 Afta wahn wail, di soalja dehn weh mi-di set op kyamp hyaa dehn seh: “Zimrai mi plan fi kil di king, an ih kil ahn.” Soh evribadi weh mi deh eena di kyamp pahn da day mek Omrai, di aami cheef, bee king oava Izrel. 17 Omrai an aal di soalja dehn gaan op fahn Gibeton ahn dehn sorong Tirza. 18 Wen Zimrai si dat dehn kanka di siti, hihn gaan eena di schrang towa da di king palis an ih bon dong di hows wail ih mi deh een deh an ih ded. 19 Dis hapm bikaaz hihn mi du weh bad eena Jehoava sait, ahn hihn komit di saym sin weh Jeroboawam komit ahn weh Izrel mi komit bikaaz a hihn. 20 Ahn di res a Zimrai hischri ahn di plan weh ih mi mek fi goh gens Eela, deh rait dong eena di hischri buk a Izrel king dehn.
21 Da den di peepl fahn Izrel geh split eena too groop. Wan groop mi fala Gainat son Tibnai, ahn dehn mi waahn mek hihn bee king, ahn di ada groop mi fala Omrai. 22 Di peepl weh mi-di fala Omrai mi ga vikchri oava di peepl weh mi-di fala Gainat son Tibnai. Den Tibnai ded an Omrai staat rool az king.
23 Eena di 31st yaa wen Aysa mi-di rool az king oava Jooda, Omrai staat rool az king oava Izrel, ahn hihn rool fi 12 yaaz. Ih rool fi siks yaaz eena Tirza. 24 Hihn bai di mongtin da Samayrya fahn Sheemer fi too silva talent,* an ih bil wahn siti pahn di mongtin. Ih naym di siti Samayrya,* afta Sheemer weh yoostu oan di mongtin. 25 Omrai mi kantinyu fi du weh bad eena Jehoava sait, ahn hihn mi wosa dan aala di king dehn weh mi rool bifoa hihn. 26 Hihn komit di saym sin laik weh Neebat son Jeroboawam komit ahn weh Izrel komit wen dehn wership dehn disgostin aidol an ofen Jehoava. 27 Ahn di res a Omrai hischri weh taak bowt ih powa an evriting weh hihn mi du, deh rait dong eena di hischri buk a Izrel king dehn. 28 Den Omrai ded* ahn dehn beri ahn da Samayrya, an ih son Ayhab staat tu rool az king afta ahn.
29 Eena di 38th yaa wen Aysa mi-di rool az king oava Jooda, Omrai son Ayhab staat tu rool az king oava Izrel, an Omrai son Ayhab rool oava Izrel fahn Samayrya fi 22 yaaz. 30 Eena Jehoava sait, Omrai son Ayhab mi wosa dan aala di king weh mi rool bifoa hihn. 31 Ayhab mi komit di saym sin dehn weh Neebat son Jeroboawam mi komit, ahn laik if dat neva bad inof, ih gaahn marid Jezibel hoofa pa da Etbayal, di king a Saidan. An Ayhab staat tu serv Bayal ahn bow dong tu ahn. 32 Pahn tap a dat, hihn bil wahn alta tu Bayal da di templ fi Bayal weh hihn mi bil da Samayrya. 33 Ayhab mi aalso bil wahn Ashera poas. Hihn mi ofen Jehoava, Izrel Gaad, moa dan aala di king dehn weh rool bifoa hihn.
34 Joorin di taim wen Ayhab mi-di rool az king, di Betelait Haiyel bil bak Jeriko. Ih fersbaan pikni Abairam mi ded wen ih lay dong di fongdayshan, an ih yongis pikni Seegob mi ded wen ih put op di siti gayt dehn, jos laik weh Jehoava mi seh chroo Non son Jashwa.