Sekant Kingz
23 Soh di king sen fi aala di oalda man dehn fahn Jooda ahn Jeroosalem. 2 Afta dat di king gaahn da Jehoava templ* lang wid di man dehn fahn Jooda, di prees dehn, di prafit dehn, an evribadi fahn Jeroosalem—evribadi mi gaan, fahn di oal tu di yong. An ih tek di buk a di kovenant weh dehn mi fain eena Jehoava templ, an ih reed it owt lowd fi mek evribadi hyaa weh deh een deh. 3 Di king stan op bai di kolom, an ih mek wahn kovenant* wid Jehoava. Ih mi pramis fi kip di kovenant weh deh rait dong eena dis buk ahn fi wership Jehoava an obay ih komanment dehn, ih rimainda dehn, an ih laa dehn wid ih hoal haat ahn soal. An aala di peepl mi pramis fi kip di kovenant tu.
4 Den di king koman di hai prees Hilkaiya, di ada prees dehn, ahn di wan dehn weh main di gayt fi goh eena Jehoava templ ahn bring owt aala di dish an ada tingz weh di peepl mi yooz fi wership Bayal, di Ashera poas, an aala di staarz weh deh eena di skai. Den ih gaan owtsaida Jeroosalem ahn bon dehn op eena di feel dehn da di Kijron Vali, an afta dat ih kehr dehn ashiz da Betel. 5 Soh hihn jraiv owt di prees dehn fi di faals gaadz. Dehn da di saym prees dehn weh Jooda king dehn mi apoint fi mek sakrifais pahn di hoali hai plays dehn da Jooda ahn rong Jeroosalem ahn mek di smoak fahn dehndeh sakrifais goh op tu dehn gaadz. An ih mi jraiv owt dehn wan weh mi-di mek di smoak fahn di sakrifais goh op tu Bayal, di son, di moon, di difrent groop a staarz, an aal di ada staar dehn. 6 Ih tek di Ashera poas owta Jehoava templ ahn kehr it owtsaida Jeroosalem da di Kijron Vali ahn bon it op deh ahn grain it intu dos ahn skyata di dos wehpaat dehn beri kaman peepl. 7 Hihn mi aalso brok dong di room dehn weh da-mi fi di man dehn weh prastichoot dehnself wid ada man wail dehn di wership dehn gaadz. Ahn dehnya room mi deh eena Jehoava templ wehpaat di laydi dehn mi-di weev sohn kovarin fi di Ashera poas.
8 Den ih bring aala di prees owta di siti dehn da Jooda, an ih gaahn da di hoali hai plays dehn, fahn Geeba dong tu Beeyer-sheeba, wehpaat di prees dehn mek sakrifais ahn mek di smoak fahn di sakrifais goh op tu dehn gaadz, an ih disrispek di hoali hai plays dehn soh dat dehn mi wahn kyaahn wership deh nohmoh. An ih brok dong di hoali hai plays dehn weh mi deh da di enchrans a Jashwa gayt, hoo da-mi di siti cheef; ahn di hoali hai plays dehn mi deh pahn di lef han said wen sohnbadi kom een chroo di siti gayt. 9 Di prees dehn weh mi deh da di hoali hai plays dehn kudn serv da Jehoava alta eena Jeroosalem, bot dehn stil kuda mi eet bred widowt ees lang wid dehn bradaz. 10 Ahn Josaiya gaahn da Hinom Vali* ahn disrispek Toafet soh dat nobadi kuda mi goh deh fi aafa op ih son er ih daata az wahn bon sakrifais tu Moalek. 11 An ih neva alow di haas dehn weh Jooda king dehn mi onli yooz fi son wership fi goh eena Jehoava templ chroo di room* bai di kolom dehn weh bilangz tu di koat ofishal, Naytan-melek. An ih mi bon op aala di chariyat dehn weh dehn mi set wan said fi yooz eena son wership. 12 Ahn di king mi brok dong di alta dehn weh Jooda king dehn mi set op pahn Ayhaz room weh mi deh pahn di roof, an ih brok op di alta dehn weh Manaaseh mi set op eena di too koatyaad da Jehoava templ. Ih brok dehn op ahn skyata dehn dos eena di Kijron Vali. 13 Ahn di king disrispek di hoali hai plays dehn fronta Jeroosalem weh mi deh tu di sowt* a di Mongt a Alivz,* soh dat nobadi mi wahn ku wership deh agen. Ahn dehndeh da-mi di saym hoali hai plays weh Salaman di king a Izrel mi bil fi Ashtoret di disgostin gaad a di Saidoanyan dehn, fi Keemosh di disgostin gaad a Moawab, ahn fi Milkom di disgostin gaad a di Amonait dehn. 14 Ih tek di stoan dehn weh dehn wership ahn brok dehn op intu peesiz, den ih kot dong di Ashera poas dehn ahn ful op di spat dehn wid hyooman boanz. 15 An ih mi brok dong di alta da Betel ahn di hoali hai plays weh Neebat son Jeroboawam mi bil weh mi mek Izrel sin. An afta ih brok dong di alta ahn di hoali hai plays, ih bon op di hoali hai plays, grain it intu dos, an ih bon dong di Ashera poas.
16 Wen Josaiya ton rong ahn si di grayv dehn pahn di mongtin, ih mek dehn tek owt di boanz fahn di grayv dehn ahn bon dehn op pahn di alta, soh dat nobadi kuda mi wership deh agen. Ahn dis hapm jos laik how Jehoava mi seh ih mi wahn hapm chroo ih servant. 17 Den ih seh: “Ah si wahn grayv stoan oava deh. Fi hoo grayv dat?” Den di man dehn fahn di siti tel ahn: “Da grayv da fi di chroo Gaad servant weh mi kohn fahn Jooda ahn hoo mi prafesai bowt di tingz weh yu mi du tu di alta da Betel.” 18 Soh ih seh: “Noh toch ih boanz; lef it di saym way how unu fain it.” Soh dehn neva bada wid ih boanz ner di boanz fi di prafit weh mi kohn fahn Samayrya.
19 Josaiya mi aalso brok dong di templ dehn weh deh pahn di hoali hai plays dehn eena di siti dehn da Samayrya; Izrel king dehn mi bil dehndeh templ fi ofen Gaad. Ahn hihn du di sayhn ting tu dehnya hoali hai plays laik weh ih mi du tu di hoali hai plays dehn da Betel. 20 Soh ih geh aala di prees weh werk da di hoali hai plays dehn, aala di wan dehn weh mi dehdeh, an ih sakrifais dehn pahn di alta dehn. An afta dat ih bon hyooman boanz pahn di sayhn alta dehn, den ih gaahn bak da Jeroosalem.
21 Now di king gi dis koman tu di peepl dehn: “Unu ga wahn Paasoava fi unu Gaad Jehoava laik weh deh rait dong eena di buk a di kovenant.” 22 Dehn neva ga wahn Paasoava laik dis sins di taim wen di joj dehn mi joj Izrel ner joorin di taim wen Izrel king dehn ahn Jooda king dehn mi-di rool. 23 Bot eena di 18th yaa wen Josaiya mi-di rool az king, dehn mi ga wahn Paasoava fi Jehoava da Jeroosalem.
24 Ahn Josaiya mi geh rid a dehn wan weh kamyoonikayt wid ded peepl, dehn wan weh pridik di fyoocha, di Terafim* aidol dehn, di disgostin aidol dehn,* an aala di disgostin tingz weh mi deh eena Jooda ahn Jeroosalem. Hihn mi du dis fi fala aala di inschrokshanz weh deh eena di buk a di Laa weh Hilkaiya di prees mi fain eena Jehoava templ. 25 Non a di king weh mi rool bifoa Josaiya da-mi laik hihn, non a di king weh mi rool bifoa ahn ner afta ahn. Josaiya da-mi di onli king weh mi kohn bak tu Jehoava ahn serv ahn wid aala ih haat, aala ih soal, ahn wid aala ih schrent, laik weh deh eena di Laa weh Gaad gi Moaziz.
26 Bot eevn soh, Jehoava mi stil beks bad wid Jooda bikaaz a aala di disgostin tingz weh Manaaseh mi du fi ofen Ahn. 27 Jehoava seh: “Ah wahn moov Jooda fahn fronta mi, jos laik weh Ah mi du wid Izrel. An Ah wahn rijek Jeroosalem, di siti weh Ai mi pik, an Ah wahn rijek di templ weh Ah seh mi wahn kantinyu fi reprizent mi naym.”
28 Ahn di res a Josaiya hischri, evriting weh hihn mi du, deh rait dong eena di hischri buk a Jooda king dehn. 29 Joorin di taim wen Josaiya mi-di rool az king, Fayro Neeko kohn fi meet di king a Asiriya da di Yoofraytis Riva ahn Josaiya gaahn fi atak ahn. Bot Neeko kil ahn wen ih si ahn da Megido. 30 Soh ih servant dehn kehr ih badi fahn Megido tu Jeroosalem eena wahn chariyat ahn dehn beri ahn eena ih grayv. Den di peepl fahn Jooda tek Josaiya son Jehoawahaz an anoint ahn, an put ahn fi bee king afta ih pa.
31 Jehoawahaz mi 23 yaaz oal wen ih staat tu rool az king, an ih mi rool eena Jeroosalem fi chree monts. Fi hihn ma da-mi Jerimaiya daata Hamootal, ahn Jerimaiya da-mi fahn Libna. 32 Jehoawahaz mi staat tu du weh mi bad eena Jehoava sait, jos laik weh ih ansesta dehn mi du. 33 Bot fi stap Jehoawahaz fahn rool eena Jeroosalem, Fayro Neeko put ahn eena prizn da Ribla weh deh da Haymat, ahn den ih diman dat di peepl fahn Jooda pay ahn 100 silva talent* ahn wan goal talent. 34 Pahn tap a dat, Fayro Neeko chaynj Josaiya son Elaiyakim naym tu Jehoyakim ahn mek hihn staat rool az king afta Josaiya. Bot ih kehr Jehoawahaz da Eejip, an ih en op di ded deh. 35 Jehoyakim mi gi di silva ahn di goal tu Fayro, bot ih mi haftu mek di peepl pay taks soh dat ih ku gi Fayro di silva weh ih mi diman. Hihn mi mek eech persn pay wahn sertn amonk a silva ahn goal soh dat ih kuda mi giv it tu Fayro Neeko.
36 Jehoyakim mi 25 yaaz oal wen ih staat tu rool az king, an ih mi rool eena Jeroosalem fi 11 yaaz. Fi hihn ma da-mi Pedaiya daata Zebaida, ahn Pedaiya da-mi fahn Rooma. 37 Hihn mi kantinyu fi du weh bad eena Jehoava sait, jos laik weh ih ansesta dehn mi du.