Wachtowa ONLAIN LAIBRI
Wachtowa
ONLAIN LAIBRI
Bileez Kriol
  • BAIBL
  • POBLIKAYSHANZ
  • DI MEETIN DEHN
  • Dyooteronomi 11
  • Di Baibl—Nyoo Werl Chranslayshan

No veedyo avaylabl fi dis.

Sari, wahn ero hapm wen di veedyo mi-di load op.

Weh Deh Eena Dyooteronomi

      • Unu mi si di amayzin tingz weh Jehoava mi du (1-7)

      • Di Pramis Lan (8-12)

      • Gaad bles dehn wan weh obay ahn (13-17)

      • Di peepl fi put Gaad werdz eena dehn haat (18-25)

      • “Wahn blesin er wahn kers” (26-32)

Dyooteronomi 11:2

Futnoat

  • *

    Er “disiplin.”

Dyooteronomi 11:5

Futnoat

  • *

    Er “tu.”

Dyooteronomi 11:9

Indeks

  • Risaach Gaid

    Refrens fi di Meetin Werkbuk,

    5/2021, pp. 6-7

Dyooteronomi 11:12

Indeks

  • Risaach Gaid

    Refrens fi di Meetin Werkbuk,

    5/2021, pp. 6-7

Dyooteronomi 11:16

Indeks

  • Risaach Gaid

    Di Wachtowa (Stodi Kapi),

    6/2019, pp. 3-4

Dyooteronomi 11:18

Futnoat

  • *

    Er “weh deh bitween unu aiy.”

Dyooteronomi 11:19

Indeks

  • Risaach Gaid

    Di Wachtowa (Stodi Kapi),

    3/2023, pp. 21-22

Dyooteronomi 11:24

Futnoat

  • *

    Dis di rifaa tu di Grayt See weh da di Meditaraynyan See.

Dyooteronomi 11:26

Futnoat

  • *

    Si di Glasari, “Kers.”

Dyooteronomi 11:30

Futnoat

  • *

    Er “wehpaat di son goh dong.”

Ada Baibl

Klik wahn vers nomba fi si di saym vers eena wahn nada Baibl.
  • Di Baibl—Nyoo Werl Chranslayshan
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 31
  • 32
Di Baibl—Nyoo Werl Chranslayshan
Dyooteronomi 11:1-32

Dyooteronomi

11 “Unu fi lov Jehoava unu Gaad, an unu fi aalwayz obay ahn. Unu fi obay ih roolz, ih laa dehn, an ih komanment dehn. 2 Unu noa dat tudeh Ah di taak tu unu, noh tu unu pikni. Unu pikni neva si ner noa bowt how Jehoava unu Gaad mi karek* unu. Dehn neva si ih powa ahn schrent. 3 Dehn neva si di mirakl dehn ahn di tingz weh ih mi du tu Fayro di king a Eejip ahn tu di hoal lan a Eejip. 4 Dehn neva si weh hapm tu Fayro an ih aami. Hihn mi mek di Red See kova Fayro, ih soalja dehn, ih haas dehn, an ih waar chariyat dehn wen dehn mi-di chays afta unu, ahn Jehoava mi dischrai dehn fi gud. 5 Dehn neva si weh hihn mi du fi* unu da di wildanes til unu mi reech dis plays. 6 Dehn neva si wen Gaad mi mek di grong oapm op ahn swala Daytan an Abairam lang wid evribadi weh mi liv wid dehn. Daytan an Abairam da Elaiyab son dehn ahn hihn da Rooben disendant. Di grong mi eevn swala op dehn tent ahn di peepl ahn di animal dehn weh mi fala dehn. Dat mi hapm fronta aala di Izrelait dehn. 7 Unu mi si fi unuself aala di powaful tingz weh Jehoava mi du fi unu.

8 “Unu fi obay aala mi komanment dehn weh Ah di giv unu tudeh, soh dat unu ku bee wahn powaful nayshan ahn kraas oava tu di lan weh unu wahn kanka, 9 ahn soh dat unu ku liv fi wahn lang taim eena di lan weh Jehoava mi swayr fi giv tu unu ansesta dehn ahn dehn disendant dehn. Da lan soh gud dat da laik ih ful op wid milk ahn honi.

10 “Di lan weh unu wahn kanka da noh laik di lan da Eejip wehpaat unu mi kom owt fram. Unu mi haftu werk haad fi waata di lan. Da mi laik if unu mi-di waata wahn vejitabl gyaadn. 11 Bot unu wahn soon kraas di Jaadn Riva. Ahn di lan weh unu wahn kanka ga lata mongtin ahn vali. Ih soak op aala di waata weh rayn dong fahn di skai. 12 Da wahn lan weh Jehoava unu Gaad di tek kayr a. Jehoava unu Gaad kip di wach oava it aal yaa rong.

13 “An if unu kip di obay mi komanment dehn weh Ah di giv unu tudeh an if unu lov Jehoava unu Gaad wid aala unu haat an aala unu soal, 14 Ah wahn mek ih rayn pahn unu lan da di prapa taim. Ih wahn rayn erli eena di yaa ahn layt eena di yaa. Unu wahn haavis grayn ahn geh wain an ail. 15 Ah wahn mek graas groa eena unu feel dehn soh dat unu animal dehn wahn ku eet, an unu wahn ga lata food tu. 16 Bee kyaaful soh dat unu noh geh temtid fi ton weh fahn Gaad ahn wership ada gaadz ahn bow dong tu dehn. 17 If unu du dat, Jehoava wahn geh beks bad wid unu. Hihn noh wahn mek ih rayn ahn notn noh wahn groa pahn di lan an unu wahn ded owt faas fahn di lan weh Jehoava unu Gaad di giv unu.

18 “Unu fi put dehnya werdz eena unu haat an aplai dehn eena unu laif. Dehn fi bee laik wahn rimainda weh unu tai pahn unu han ahn laik wahn sain weh unu tai pahn unu farid.* 19 Unu fi teech unu pikni dehn dehndeh tingz, an unu fi taak bowt dehn wen unu di sidong eena unu hows, wen unu di waak pahn di road, bifoa unu goh sleep, ahn wen unu get op. 20 Rait dehn dong pahn di doa poas fi unu hows ahn pahn unu gayt dehn. 21 Unu fi du dat soh dat unu an unu pikni dehn ku liv fi wahn lang taim, fi az lang az di hevn kantinyu fi deh oava di ert, eena di lan weh Jehoava mi swayr fi giv tu unu ansesta dehn.

22 “If unu fala di komanment dehn weh Ah di giv unu, if unu obay dehn, if unu lov Jehoava unu Gaad, if unu fala di way ih tel unu fi goh, an if unu stik kloas tu ahn, 23 Jehoava wahn jraiv owt di nayshan dehn fahn fronta unu, an unu wahn kanka di lan weh bilangz tu sohn nayshan weh biga ahn schranga dan unu. 24 Eniway wehpaat unu set fut wahn bee fi unu. Di bongjri fahn unu lan wahn bee fahn di wildanes tu Lebanon ahn fahn di Yoofraytis Riva tu di westan see.* 25 Nobadi gwehn gens unu. Jehoava unu Gaad wahn mek peepl frayd fi unu eniway wehpaat unu goh, jos laik weh ih pramis fi du.

26 “Ah di giv unu wahn chois: Unu ku chooz fi geh wahn blesin er wahn kers.* 27 Unu wahn geh wahn blesin if unu obay di komanment dehn weh Jehoava unu Gaad di giv unu tudeh. 28 Bot unu wahn geh kers if unu noh obay di komanment dehn fahn Jehoava unu Gaad an if unu stap fala di way weh Ah di koman unu fi goh an if unu staat wership sohn ada gaad weh unu noh noa bowt.

29 “Wen Jehoava unu Gaad kehr unu da di lan weh unu wahn kanka, unu fi bles di peepl weh deh da Mongt Gerizim, an unu fi kers di peepl weh deh da Mongt Eebal. 30 Dehndeh mongtin deh pahn di ada said a di Jaadn Riva tuwaadz di wes,* eena di Kaynanait dehn lan. Di Kaynanait dehn liv da di Araba, weh deh pahn di opozit said a Gilgal, kloas tu di big chree dehn da Moareh. 31 Unu di kraas di Jaadn Riva fi kanka di lan weh Jehoava unu Gaad di giv unu. Wen unu kanka da lan ahn liv deh, 32 unu fi mek shoar dat unu obay di roolz ahn di laa dehn weh Ah di giv unu tudeh.

Bileez Kriol Poblikayshanz (2013-2025)
Lag Owt
Lag Een
  • Bileez Kriol
  • Shayr
  • Setinz
  • Copyright © 2025 Watch Tower Bible and Tract Society of Pennsylvania
  • Kandishanz fi di Yoos a Dis Websait
  • Praivasi Palisi
  • Privacy Settings
  • JW.ORG
  • Lag Een
Shayr