Saam
Dis da Aysaf sang.
79 Oa Gaad, di nayshan dehn kohn eena yu lan fi fait;
Dehn noh shoa no rispek fi yu hoali templ;
Dehn ton Jeroosalem intu wahn pail a rooinz.
2 Dehn gi yu servant dehn ded badi tu di jankro dehn fi eet
Ahn dehn gi di flesh a dehn wan weh laayal tu yu tu di wail animal dehn.
3 Dehn poar dehn blod rong Jeroosalem laik waata,
Ahn dehn neva ga nobadi deh fi beri dehn.
4 Wi luk shaym fronta wi naybaz;
Evribadi rong wi laaf aata wi ahn tek wi mek papishoh.
5 Oa Jehoava, how lang yu wahn stay beks wid wi? Fareva?
Da fi how lang yu anga wahn bon laik wahn faiya?
6 Poar owt yu anga aal oava di nayshan dehn weh ignoar yoo,
An aal oava di kingdom dehn weh noh aana yu naym.
7 Bikaaz dehn kil owt Jaykob disendant dehn
Ahn dischrai di lan weh da-mi dehn hoam.
8 Noh ponish wi fi di rang tingz weh wi ansesta dehn du.
Pleez hori shoa wi yu mersi,
Kaaz wi noh ga no hoap.
9 Oa Gaad, wi sayvya, pleez help wi bikaaz a yu wandaful naym.
Reskyu wi ahn fergiv wi fi wi sin dehn soh dat yu ku aana yu naym,
10 Ahn soh di nayshan dehn noh wahn ga no reezn fi seh: “Wehpaat fi dehn Gaad deh?”
Wee waahn si wen di nayshan dehn fain owt dat yu tek rivenj pahn di peepl weh mi kil yu servant dehn.
11 Hyaa how di prizna dehn di krai owt tu yoo.
Yooz yu powa fi sayv* dehn wan weh dehn wahn kil.
12 Bikaaz di nayshan dehn rong wi stay insolt yu, Oa Jehoava,
Pay dehn bak fi dat sevn taimz moa.
13 Den wee, di sheep weh yoo shepad,
Wahn gi yu tanks fareva;
Ahn wi wahn prayz yu fahn jenarayshan tu jenarayshan.