Dyooteronomi

15 “Evri sevn yaaz, unu fi mek di peepl weh oa unu noa dat dehn noh haftu pay unu bak nohmoh. 2 Dis da weh unu fi du: If unu len unu nayba sohnting, den unu fi tel ahn dat ih noh haftu pay unu bak. Unu noh fi tel unu nayba er wahn nada Izrelait dat ih haftu pay bak weh ih oa, bikaaz Jehoava da di wan weh di seh dat dehn noh fi pay bak notn weh dehn oa. 3 Unu ku tel wahn farina fi pay unu bak eniting weh ih oa unu, bot unu noh fi tel wahn nada Izrelait fi pay unu bak eniting weh ih oa. 4 Jehoava unu Gaad wahn bles unu, soh non a unu wahn haftu bee poa. Jehoava wahn bles unu eena di lan weh ih di giv unu fi kanka ahn weh ih di giv unu az wahn inheritans. 5 Jehoava unu Gaad wahn bles unu onli if unu obay weh ih seh ahn fala di komanment dehn weh Ah di giv unu tudeh. 6 Jehoava unu Gaad wahn bles unu jos laik weh ih mi pramis fi du. An unu wahn len moni tu lata nayshan, bot unu noh wahn haftu baro notn fahn dehn. Unu wahn kanka lata nayshan, bot dehn noh wahn kanka unu.

7 “If wan a unu nayba en op di geh poa da wan a di siti dehn eena di lan weh Jehoava unu Gaad di giv unu, den unu noh fi bee stinji wid ahn, bot unu fi feel sari fi ahn an help ahn. 8 Unu fi bee kain tu ahn an giv ahn evriting weh ih need. 9 Unu noh fi tink eena wahn wikid way ahn tel unuself dat unu noh wahn bee kain tu ahn an hoal bak fahn help ahn, sayka weh unu noa dat di sevent yaa di kom. Dat da di yaa wen di Izrelait dehn noh wahn haftu pay unu bak. An if unu nayba komplayn tu Jehoava bowt unu, unu wahn bee gilti a wahn sin. 10 Unu fi bee kain tu ahn an giv ahn evriting weh ih need. Unu fi help ahn noh bikaaz unu haftu, bot bikaaz unu waahnt. Ahn Jehoava unu Gaad wahn bles unu fi evriting weh unu du. 11 Dehn wahn aalwayz ga poa peepl weh di liv eena di lan. Dat da wai Ah di koman unu fi aalwayz bee kain* tu di poa peepl weh di sofa eena unu lan ahn gi dehn evriting weh dehn need.

12 “If unu bai wahn Heebroo man er wuman ahn dehn werk fi unu az wahn slayv fi siks yaaz, den unu fi set dehn free eena di sevent yaa. 13 An if unu set dehn free, unu fi gi dehn tingz. 14 Unu fi gi dehn evriting weh dehn need. Unu fi gi dehn som a unu animal, som a unu grayn, som a unu ail, ahn som a unu wain. Jos laik how Jehoava unu Gaad giv tu unu,* da rait soh unu fi giv tu dehn. 15 Memba dat Jehoava unu Gaad mi sayv unu fahn Eejip, wehpaat unu da-mi slayv. Dat da wai Ah di koman unu fi du dehndeh tingz.

16 “Bot if unu slayv tel unu dat ih noh waahn lef unu sayka weh ih lov unu an unu famili an ih hapi wail ih deh wid unu, 17 den unu fi tek wahn tool weh unu yooz fi mek hoal ahn boar di slayv ayz gens di doa. Ahn di slayv wahn kantinyu fi werk fi unu fi di res a ih laif. Unu fi du di saym ting wid unu slayv gyal. 18 Bot if unu let goh wahn slayv an ih goh, unu noh fi tink dat unu wahn looz eniting, bikaaz da slayv du moa werk joorin dehndeh siks yaaz dan weh wahn werka weh unu haiya wuda du. Ahn Jehoava unu Gaad mi bles unu eena evriting weh unu du.

19 “Unu fi set evri fersbaan mayl sheep ahn mayl goat wan said ahn gi dehn tu Jehoava unu Gaad. Unu noh fi mek di fersbaan bul du eni kaina werk, an unu noh fi kot aaf di wul fahn unu fersbaan sheep. 20 Evri yaa unu an unu famili fi eet dehndeh animalz fronta Jehoava unu Gaad da di plays wehpaat Jehoava chooz. 21 Bot if wan a unu animalz kripl, blain, er dehn ga sohnting els weh reeli rang wid dehn, den unu noh fi sakrifais dehn tu Jehoava unu Gaad. 22 Unu fi eet dehndeh animalz eena unu siti dehn, laik how unu wuda eet wahn gazel er wahn dyaa. Ahn wahn kleen persn ahn wahn persn weh noh kleen ku eet dehndeh animalz. 23 Bot unu noh fi eet di blod fahn dehndeh animalz. Unu fi poar it owt pahn di grong laik waata.