Dyooteronomi
26 “Wen unu fainali reech da di lan weh Jehoava unu Gaad di giv unu az wahn inheritans an unu kanka it ahn staat liv deh, 2 unu fi tek som a di fers tingz* weh unu haavis fahn unu lan weh Jehoava unu Gaad di giv unu, an unu fi put dehn eena wahn baaskit ahn goh da wahn plays weh Jehoava unu Gaad chooz fi mek unu wership ahn. 3 Unu fi goh da di prees weh di serv joorin da taim an unu fi tel ahn, ‘Tudeh Ah kohn tel Jehoava wi Gaad dat Ah kom eena di lan weh Jehoava mi swayr tu wi ansestaz fi gi wi.’
4 “Den di prees fi tek di baaskit fahn unu ahn put it fronta di alta weh bilangz tu Jehoava unu Gaad. 5 Den unu fi goh fronta Jehoava unu Gaad ahn seh, ‘Mi ansesta da-mi wahn Aramayan man weh wuda goh fahn plays tu plays.* An ih gaahn da Eejip ahn liv deh az wahn farina, an ih mi ga wahn smaal famili. Bot rait deh ih mi en op di ga wahn lata disendant, ahn dehn da-mi wahn big nayshan weh mi powaful. 6 Ahn di Ijipshan dehn mi kruwil tu wi, ahn dehn mi mek wi sofa wen wee da-mi fi dehn slayv. 7 Soh wi mi beg yoo, Jehoava, di Gaad a wi ansestaz, fi help. Ahn yoo, Jehoava, mi hyaa wi. Yu mi si humoch wi mi-di sofa, weh wi mi-di goh chroo, ahn how bad di peepl mi-di chreet wi. 8 Wen yoo, Jehoava, mi tek wi owta Eejip, yu mi yooz yu powa ahn schrent. Ahn yu mi du lata fraitnin tingz ahn lata miraklz. 9 Den yu mi bring wi ya, ahn yu mi gi wi dis lan weh soh gud dat da laik ih ful op wid milk ahn honi. 10 Now Ah bring di fers tingz weh groa pahn di lan weh yoo, Jehoava, mi gi mi.’
“Unu fi put di baaskit fronta Jehoava unu Gaad ahn bow dong fronta Jehoava unu Gaad. 11 Den unu wahn bee hapi wid aala di gud tingz weh Jehoava unu Gaad giv unu ahn weh ih gi dehn wan weh liv eena unu hows. Ahn di Leevait dehn ahn di farina dehn weh liv monks unu wahn bee hapi tu.
12 “Eena di terd yaa wen unu finish gyada di ten persent a evriting weh unu haavis, unu fi giv it tu di Leevait dehn, di farina dehn weh liv monks unu, di pikni dehn weh noh ga no pa, ahn di wido dehn. Ahn dehn wahn eet eena di siti dehn til dehn geh ful. 13 Den unu gwehn fronta Jehoava unu Gaad ahn seh, ‘Ah don gyada op aala di hoali tingz fahn owta mi hows an Ah gi dehn tu di Leevait dehn, di farina dehn, di pikni dehn weh noh ga no pa, ahn di wido dehn. Ah neva disobay yu komanment dehn ner ignoar dehn. 14 Wen Ah mi feel sad, Ah neva eet fan it. Ahn wen Ah neva kleen, Ah neva toch non a it. An Ah neva yooz non a it fi di ded peepl. Oa Jehoava mi Gaad, Ai obay weh yu seh an Ah du evriting weh yu tel mi fi du. 15 Oa Gaad, luk dong fahn hevn, fahn yu hoali plays weh yu liv. Bles aala yu peepl weh da di Izrelait dehn ahn bles di lan weh yu mi swayr tu wi ansestaz dat yu mi wahn gi wi. Da lan soh gud dat da laik ih ful op a milk ahn honi.’
16 “Tudeh Jehoava unu Gaad di koman unu fi fala dehndeh roolz ahn laa dehn. Unu fi fala dehn wid aala unu haat ahn wid aala unu schrent.* 17 Tudeh Jehoava di tel unu dat hihn wahn bee fi unu Gaad, an unu fi du weh hihn waahnt. Unu fi obay weh ih seh an unu fi obay ih roolz, ih komanment dehn, an ih laa dehn. 18 Ahn tudeh unu mi tel Jehoava dat unu wahn bee fi hihn peepl. Unu wahn bee fi hihn speshal peepl, jos laik weh ih mi pramis unu. An unu wahn obay aala ih komanment dehn. 19 Den Jehoava unu Gaad wahn mek unu bee moa impoatant dan aala di ada peepl weh ih mek, jos laik weh ih mi pramis fi du. Ahn wen unu proov dat unu da fi hihn hoali peepl, den unu wahn geh prayz ahn gloari.”