Nombaz
24 Wen Baylam mi si dat Jehoava mi hapi fi bles di Izrelait dehn, hihn neva gaahn luk fi eni sain fi si if bad tingz mi wahn hapm tu dehn. Insteda dat, ih luk tuwaadz di wildanes. 2 Wen Baylam mi luk op an ih mi si dat di Izrelait dehn mi set op dehn tent bays pahn di way eech chraib mi chravl, ih geh hoali spirit fahn Gaad. 3 Den dis da di poawem weh ih seh:
“Ai, Baylam, hoo da Beeyor son, di seh dehnya tingz,
An Ai da wahn man weh ku si tingz klyaa.
4 Ai da di wan weh hyaa wahn mesij fahn Gaad.
Ai da di wan weh ga mi aiy dehn oapm,
An Ah jrap dong wen Ah mi si wahn vizhan fahn di Almaiti Gaad. Dehnya da di tingz weh Ah di seh:
5 Jaykob tent dehn onli luk byootiful!
Di plays wehpaat Izrel liv luk byootiful!
6 Dehndeh tent spred owt laik sohn lang vali,*
Laik sohn gyaadn weh deh kloas tu di riva,
Laik sohn aloaz* weh Jehoava plaant,
Ahn laik sohn seeda chree weh deh kloas tu di waata.
7 Waata kip di jrip fahn ih too bokit,
An ih disendant dehn wahn deh wehpaat lata waata deh.
Fi hihn king wahn bee moa impoatant dan Aygag,
An ih kingdom wahn bee powaful.
8 Gaad mi bring Izrel owta Eejip.
Gaad schrang laik di haan dehn fahn wahn wail bul. Hihn yooz it fi help ahn.
Izrel wahn dischrai di nayshan dehn weh chreet ahn bad.
Hihn wahn choo pahn dehn boan, an ih wahn yooz ih aro dehn fi dischrai dehn.
9 Hihn ben dong ahn lidong jos laik wahn laiyan.
Ahn hoo dayr fi wayk ahn op?
Gaad wahn bles peepl weh bles yu,
An ih wahn kers* peepl weh kers yu.”
10 Den Baylak geh beks bad wid Baylam. Ahn bikaaz Baylak mi beks, ih staat klap ih han dehn, an ih tel Baylam: “Ah mi bring yu ya fi mek yu put wahn kers pahn mi enimi dehn, bot insteda dat, yu bles dehn chree taimz. 11 Goh bak da yu hows rait now. Ah mi wahn gi yu lata aana, bot Jehoava tek weh da aana fahn yu.”
12 Den Baylam tel Baylak: “Dis da weh Ah mi tel di mesinja dehn weh yu sen, 13 ‘Eevn if Baylak wuda gi mi ih hows ful op a silva ahn goal, Ah stil mi wahn kyaahn du weh Ai waahnt ahn goh gens di koman weh Jehoava gi mi, noh mata if da sohnting gud er bad. Ai wahn onli seh weh Jehoava tel mi fi seh.’ 14 Ahn now Ah gwehn bak tu mi peepl. Bot bifoa Ah goh, mek Ah tel yu weh dehnya peepl wahn du tu yu peepl eena di fyoocha.” 15 Den ih seh dis poawem:
“Ai, Baylam, hoo da Beeyor son, di seh dehnya tingz,
An Ai da wahn man weh ku si tingz klyaa.
16 Ai da di wan weh hyaa wahn mesij fahn Gaad,
An Ai da di wan weh ga di nalij weh di Moas Hai Gaad giv.
Ai da di wan weh ga mi aiy dehn oapm,
An Ah jrap dong wen Ah mi si wahn vizhan fahn di Almaiti Gaad. Dehnya da di tingz weh Ah di seh:
17 Ai wahn si ahn, bot noh now;
Ai wahn luk pan ahn, bot noh enitaim soon.
Wahn staar wahn kohn fahn monks Jaykob disendant dehn.
Ahn wahn rad wahn kohn fahn monks di Izrelait dehn.
Fi shoar hihn wahn bos Moawab farid;
Ih wahn brok op di skol a peepl weh vailent.
18 Ahn hihn wahn kanka Eedom.
Yes, Seeyer enimi wahn kanka ahn wail Izrel di shoa korij.
19 Ahn sombadi fahn monks Jaykob disendant wahn kanka dehn enimi dehn,
Ahn hihn wahn dischrai enibadi fahn di siti weh servaiv.”
20 Wen ih si di Amalekait dehn, ih mi kantinyu fi seh ih poawem:
“Di Amalekait dehn da-mi di fers peepl fahn monks di nayshan dehn,*
Bot eena di en, dehn wahn geh dischrai.”
21 Wen hihn mi si di Kenait dehn, ih kantinyu fi seh ih poawem:
“Di plays wehpaat unu liv wahn dehdeh fi wahn lang taim, an unu hows deh pahn wahn big rak.
22 Bot sombadi wahn bon op di Kenait dehn.
How lang bifoa di Asiriyan dehn kehr unu az dehn slayv?”
23 Den ih kantinyu fi seh ih poawem:
“Ih wahn bee wahn terabl taim wen Gaad du dehndeh tingz, bikaaz nobadi wahn servaiv.
24 Sohn ship wahn kohn fahn di seesaid da Kitim.
Dehn wahn mek di Asiriyan dehn sofa,
Ahn dehn wahn mek Eeber sofa.
Bot dehn* wahn geh dischrai tu.”
25 Den Baylam ahn Baylak gaahn dehn oan way.