Sekant Samwel
10 Laytaraan di Amonait dehn king ded, an ih son Haynon mi staat rool az king. 2 Den Dayvid seh: “Ah wahn shoa lov* tu Haynon jos laik how ih pa Nayhash mi shoa mee lov.”* Soh Dayvid sen ih servant dehn fi komfert ahn afta ih pa ded. Bot wen Dayvid servant dehn reech da di lan weh bilangz tu di Amonait dehn, 3 di Amonait leeda dehn tel dehn laad Haynon: “Yoo reeli tink dat Dayvid di aana yu pa wen ih sen ih servant dehn fi komfert yu? Dayvid mosi sen ih servant dehn fi saach chroo wi siti ahn spai pahn wi soh dat ih ku kanka wi.” 4 Soh Haynon tek Dayvid servant dehn ahn shayv aaf haaf a dehn byaad, an ih kot aaf haaf a dehn kloaz fahn dehn baksaid goh dong, ahn den ih sen dehn weh. 5 Wen Dayvid fain owt weh hapm, Dayvid sen sohn man fi meet dehn, bikaaz dehn mi feel soh shaym, an ih tel dehn: “Unu stay da Jeriko til unu groa bak unu byaad, den unu kohn bak.”
6 Afta wahn wail, di Amonait dehn noatis dat Dayvid hayt dehn, soh di Amonait dehn haiya 20,000 Siriyan soalja fahn Bet-reehob ahn fahn Zoaba, di king a Mayaka lang wid 1,000 man, ahn 12,000 man fahn Ishtob.* 7 Wen Dayvid hyaa bowt it, ih sen Joawab ahn di hoal aami lang wid aala ih schrangis soalja. 8 Ahn di Amonait aami gaan owt ahn tek dehn pozishan fi fait fronta di siti gayt wail di Siriyan dehn fahn Zoaba ahn Reehob, lang wid di soalja dehn fahn Ishtob* ahn Mayaka, mi deh bai dehnself eena wahn oapm ayrya.
9 Wen Joawab si dat di enimi aami dehn mi-di chaaj tuwaadz dehn fahn da front ahn fahn da bak, ih chooz som a di bes Izrelait soalja an araynj dehn tugeda fi fays di Siriyan dehn. 10 An ih put ih breda Abishai in chaaj a di res a soaljaz fi mek ih araynj dehn fi fays di Amonait dehn. 11 Den hihn seh: “If Ai noh schrang inof fi fait di Siriyan dehn, den yu mos kohn sayv mi; bot if yoo noh schrang inof fi fait di Amonait dehn, den Ai wahn kohn sayv yoo. 12 Wi haftu bee schrang ahn brayv fi di peepl ahn fi di siti dehn weh bilangz tu wi Gaad, ahn Jehoava wahn du weh hihn tink rait.”
13 Den Joawab an ih aami atak di Siriyan dehn, ahn dehn ron weh fahn fronta ahn. 14 Wen di Amonait dehn si dat di Siriyan dehn ron weh, di Amonait dehn ron weh fahn Abishai tu ahn dehn gaan eena di siti. Afta dat Joawab lef di Amonait dehn ahn gaahn bak da Jeroosalem.
15 Wen di Siriyan dehn si dat di Izrelait dehn win di vikchri oava dehn, dehn gyada tugeda agen. 16 Soh Hadadeezer sen fi di Siriyan dehn weh liv bai di Riva,* ahn den dehn gaahn da Heelam, ahn Shoabak di cheef a Hadadeezer aami mi-di leed dehn.
17 Wen dehn tel Dayvid, hihn hori gyada op di hoal Izrelait aami ahn kraas di Jaadn ahn gaahn da Heelam. Den di Siriyan dehn araynj dehn aami ahn fait gens Dayvid. 18 Bot di Siriyan dehn mi ron weh fahn Izrel aami, ahn Dayvid kil 700 a dehn chariyat jraiva ahn 40,000 a dehn haasman, an ih kil dehn aami cheef Shoabak. 19 Wen aala di king dehn weh Hadadeezer mi rool oava si dat Izrel mi win, dehn hori mek pees wid Izrel ahn staat serv dehn, ahn di Siriyan dehn mi frayd fi help di Amonait dehn agen.