Sekant Samwel
22 Ahn pahn di day wen Jehoava sayv Dayvid fahn aala ih enimi dehn ahn fahn Saal, Dayvid mi sing dis sang tu Jehoava:
2 “Jehoava da mai rak ahn mai sayf plays; hihn da di wan weh reskyu mi.
3 Mai Gaad da mai rak; Ai goh tu hihn fi geh protekshan,
Hihn da mai sheel ahn mai powaful sayvya;* hihn da wahn plays weh Ai goh fi feel sayf.
Da hihn Ai ron tu; hihn da mai sayvya; hihn reskyu mi fahn vailent peepl.
4 Ai kaal pahn Jehoava, di wan weh dizerv prayz,
Ahn hihn sayv mi fahn mi enimi dehn.
5 Det mi sorong mi laik wayvz eena di see;
Sodn-wan, laik wahn flod, sohn wotlis man mi kohn ahn fraitn mi.
6 Da laik di Grayv* tai mi op wid roap;
Det set wahn chrap fronta mi.
7 Wen Ah mi-di sofa, Ah kaal pahn Jehoava;
Ah neva stap kaal pahn mi Gaad.
Ahn fan ih templ ih hyaa mi vais,
An ih lisn wen Ah mi-di krai owt fi help.
8 Di ert staat tu shayk ahn raak;
Hevn fongdayshan staat tu chrimbl
Ahn shayk op bikaaz Ih mi beks bad.
9 Smoak kom owta ih noaz,
Ahn wahn hat hat faiya kom owt fan ih mowt;
Hat faiya koal blayz op fronta ahn.
10 Wen hihn kohn dong ih mek hevn ben dong anaal,
Ahn sohn tik daak klowd mi deh anda ih fut.
11 Hihn kohn di raid pahn wahn cherob;
Peepl kuda mi si ahn di flai pahn wahn aynjel wing.
12 Hihn mek wahn tent owta loan daaknis,
An ih kova ihself wid daak waata ahn tik klowd.
13 Di lait rong ahn mi soh brait dat ih mek faiya koal blayz op.
14 Den Jehoava mek ih tonda eena hevn;
Di Moas Hai mek peepl hyaa ih vais.
15 Hihn shoot dehn wid ih boa an aro, ahn dehn skyata;
Ih mek laitnin schraik, ahn dat lef dehn wel kanfyooz.
16 Jehoava raat ahn di bret fan ih noaz ekspoaz di batam a di see ahn di ert fongdayshan.
17 Ih reech dong fahn way op deh;
Ih grab mi ahn haal mi fahn owta di deep waata.
18 Ih sayv mi fahn mi enimi weh schrang,
Fahn dehn wan weh hayt mi ahn weh schranga dan mi.
19 Dehn kom aata mi pahn di day wen Ah mi-di goh chroo lata chroblz,
Bot Jehoava sopoat mi.
20 Hihn kehr mi da wahn sayf plays;
Ih reskyu mi bikaaz ih mi hapi wid mi.
21 Jehoava riwaad mi akaadn tu mi raichosnis;
Ih riwaad mi bikaaz Ah noh du notn bad.
22 Ah stik tu Jehoava way,
An Ah noh lef mi Gaad; Ah wuda neva du sohnting soh wikid.
23 Aala fi hihn jojment dehn deh fronta mi;
An Ah wahn aalwayz obay fi hihn laa dehn.
24 Ah noh wahn du notn fi mek ih fain faalt wid mi,
An Ah wahn mek shoar Ah noh du notn rang.
25 Ah pray mek Jehoava pay mi bak akaadn tu mi raichosnis;
Ah pray hihn pay mi bak bikaaz Ah inosent.
26 Yu laayal tu enibadi weh laayal tu yoo;
Yu wahn bee fyaa wid wahn inosent man.
27 Yu gud tu peepl weh pyoar,
Bot yu owtsmaat* peepl weh chriki.
28 Yu sayv peepl weh hombl,
Bot yu deh gens peepl weh prowd, ahn yu shaym dehn.
29 Oa Jehoava, yoo da mi lamp;
Da Jehoava lait op di daaknis rong mi.
30 Wid fi yoo help Ah ku atak wahn groop a teef;
Wid Gaad powa Ah ku klaim wahn waal.
31 Evriting weh di chroo Gaad du perfek;
Evriting weh Jehoava seh pyoar.
Hihn da wahn sheel fi enibadi weh goh tu hihn fi protekshan.
32 No Gaad noh deh eksep Jehoava.
Ahn no rak noh deh eksep fi wee Gaad.
33 Di chroo Gaad da mi schrang shelta,
Ahn hihn wahn mek mi road schrayt.
34 Ih mek Ah moov faas laik wahn dyaa;
Ih mek Ah stan op pahn sohn hai plays.
35 Hihn chrayn mi fi waar;
Ah ku ben wahn boa weh mek owta kapa.
36 Yoo gi mi yu sheel fi sayv mi,
Ahn bikaaz yu hombl, yu rayz mi op.
37 Yoo klyaa di road fi mi
Fi mek Ah noh jrap dong.
38 Ah wahn chays mi enimi dehn ahn kil dehn;
Ah noh wahn kohn bak til Ah don dischrai aala dehn.
39 An Ah wahn waip dehn owt ahn mash dehn op, mek dehn noh get op agen;
Dehn wahn jrap dong an Ah wahn put mi fut pahn dehn.
40 Yoo wahn gi mi di schrent fi fait;
Yu wahn help mi kanka mi enimi dehn.
41 Yoo wahn mek mi enimi dehn ron weh fahn mi;
Ah wahn dischrai dehn wan weh hayt mi.
42 Dehn baal fi help, bot nobadi dehdeh fi sayv dehn,
Dehn eevn baal tu Jehoava, bot hihn noh ansa dehn.
43 Ah wahn grain dehn dong til dehn da laik dos pahn di grong;
Ah wahn mash dehn ahn stamp op pahn dehn laik mod pahn di schreet.
44 Yu wahn sayv mi fahn peepl weh fain faalt wid mi.
Yu wahn protek mi mek Ah bee di leeda oava lata nayshanz.
Wahn nayshan weh Ah noh noa wahn serv mi.
45 Farinaz wahn bow dong tu mi sayka weh dehn frayd;
Dehn wahn obay mi bikaaz a weh dehn hyaa bowt mi.
46 Farinaz wahn looz korij;*
Dehn wahn kom owt fahn dehn sayf plays di chrimbl.
47 Jehoava alaiv! Prayz mi Rak!
Prayz mi Gaad, di Rak weh sayv mi.
48 Di chroo Gaad tek rivenj pahn aala mi enimi dehn fi mi;
Hihn put peepl anda mai atariti;
49 Hihn sayv mi fahn mi enimi dehn.
Yoo lif mi op faar fahn dehn wan weh atak mi;
Yu sayv mi fahn vailent peepl.
50 Oa Jehoava, dat da wai Ai wahn tank yu monks di nayshan dehn,
An Ah wahn sing prayz tu* yu naym:
51 Hihn du wandaful tingz fi sayv mee, fi hihn king;
Hihn aalwayz shoa lov* tu di wan weh hihn pik,
Yes, tu mee, Dayvid, ahn tu mi disendant dehn fareva.”