Sekant Samwel
8 Laytaraan, Dayvid fait gens di Filisteen dehn ahn kanka dehn, ahn den Dayvid tek weh Meteg-ama fahn di Filisteen dehn.
2 Ih kanka di Moawabait dehn ahn mek dehn lidong pahn di grong, ahn den ih mezha dehn wid wahn roap. Ih divaid dehn intu chree groop bai di lent a di roap, too groop fi ded ahn wan groop fi lef alaiv. An afta dat di Moawabait dehn staat serv Dayvid ahn pay taks tu ahn.
3 Ahn Dayvid kanka Reehob son Hadadeezer di king a Zoaba wen ih mi deh pan ih way fi tek bak kanchroal oava di peepl da di Yoofraytis Riva. 4 Dayvid kyapcha 1,700 haasman ahn 20,000 soalja fan ahn. Den Dayvid kripl aala di chariyat haas eksep 100 a dehn.
5 Wen di Siriyan dehn fahn Damaskos kohn fi help Hadadeezer di king a Zoaba, Dayvid kil 22,000 a dehn. 6 Den Dayvid set op sohn aami kyamp da Siriya, wehpaat Damaskos da di kyapital siti, ahn di Siriyan dehn staat tu serv Dayvid ahn pay taks tu ahn. Ahn noh mata weh Dayvid gaan, Jehoava giv ahn vikchri.* 7 Pahn tap a dat, Dayvid tek weh aala di rong goal sheel fahn Hadadeezer servant dehn ahn kehr dehn da Jeroosalem. 8 Ahn King Dayvid tek wahn hoal lata kapa fahn Beeta ahn Beroata, too a Hadadeezer siti.
9 Now King Toawai fahn Haymat hyaa dat Dayvid mi kanka di hoal a Hadadeezer aami. 10 Soh Toawai sen ih son Joaram fi hayl King Dayvid fi kongrajulayt ahn bikaaz ih mi fait gens Hadadeezer ahn kanka ahn (bikaaz Hadadeezer mi fait lata waar gens Toawai), ahn Joaram kehr tingz weh mek owta silva, goal, ahn kapa fi Dayvid. 11 Ahn King Dayvid mek dehnya ting hoali ahn gi dehn tu Jehoava, jos laik weh ih mi du wid di silva ahn di goal weh ih mi tek fahn aala di nayshan dehn weh ih mi kanka: 12 fahn Siriya ahn Moawab, fahn di Amonait, Filisteen, an Amalekait dehn, ahn fahn weh ih tek fahn Reehob son Hadadeezer di king a Zoaba. 13 Ahn Dayvid mek wahn naym fi ihself wen ih kil 18,000 Eedomait eena di Saalt Vali. 14 An ih set op sohn aami kyamp da Eedom. Ih set dehn op aal oava Eedom teritori, an aala di Eedomait dehn staat tu serv Dayvid. Ahn noh mata weh Dayvid gaan, Jehoava giv ahn vikchri.*
15 Ahn Dayvid kantinyu rool oava hoal a Izrel, ahn Dayvid joj aala ih peepl wid raichosnis. 16 Zerooya son Joawab da-mi cheef oava di aami, an Ahailod son Jehoshafat mi kip di rekadz. 17 Ahaitob son Zaydak an Abaiyatar son Ahimelek da-mi prees, ahn Seraiya da-mi di sekiteri. 18 Jehoyada son Benaiya mi in chaaj a di Keretait ahn di Peletait dehn. Ahn Dayvid son dehn da-mi cheef ofishal.