Salaman Sang
2 “Ai da laik wahn wail flowaz* pahn di loa lan rait lang di koas.
Ai da jos wahn kaman flowaz* weh groa eena di vali.”
2 “Monks aala di ada gyal dehn,
Di wan weh Ai lov da laik wahn flowaz weh deh monks prikl.”
3 “Monks aala di yong man dehn,
Di onli wan weh preshos tu mee da laik wahn aapl chree weh deh midl a di faris.
Ah ga wahn schrang dizaiya fi sidong anda fi hihn shayd.
Enitaim Ah deh wid hihn, da laik Ah di injai wahn sweet froot.
4 Hihn kehr mi eena di bankwit hows,*
An ih mek evribadi noa dat fi hihn lov bilangz tu mee.
5 Gi mi kayk weh mek owta rayzn fi rifresh mi;
Gi mi sohn aapl fi schrentn mi,
Bikaaz Ah mis di wan weh Ah lov soh moch dat Ah feel week anaal.
6 Wid fi hihn lef han ih toch mi hed eena wahn jentl way,
An ih rap ih rait han rong mi.
7 Aala Jeroosalem daata dehn, Ah waahn unu swayr tu mi
Pahn di byooti a di gazel ahn di dyaa* dehn eena di feel
Dat unu noh wahn chrai fi presha mi fi lov sombadi weh Ah noh feel lov fa.
8 Lisn! Ah ku hyaa mi lov di kohn!
Si ahn deh; ih di kohn.
Ih di klaim oava di mongtin dehn ahn jomp oava di hil dehn.
9 Mai preshos lov da laik wahn gazel, laik wahn yong dyaa.
Si ahn deh, di stan op owtsaid bihain wi waal;
Ih di luk een chroo di windo,
Ih di luk fi mee chroo di lee hoal dehn eena di windo.
10 Ih staat tu taak ahn mai lov seh tu mi:
‘Get op, mai lov,
Mai sweet ahn byootiful lov, lesgoh wid mi, lesgoh fahn ya.
11 Di rayni seezn don paas;
Ih noh di rayn nohmoh.
12 Aala di chree dehn eena di lan di blaasam.
Now da di taim fi staat tu chrim di vain dehn,
An aal oava di lan yu ku hyaa di dov dehn di sing dehn sang.
13 Di fers froot dehn weh di fig chree dehn bayr staat tu geh raip;
Blaasam deh pahn di vain dehn, ahn dehn giv aaf wahn nais smel.
Get op, mi lov, ahn kohn wid mi.
Mi byootiful lov, lesgoh wid mi, lesgoh fahn ya.
14 Mi lee dov, stap haid monks di rak dehn;
Kom owt fahn yu seekrit plays eena di klif.
Ah waahn si yu an Ah waahn hyaa yu vais,
Bikaaz yu ga wahn sweet vais ahn yu onli byootiful.’”
15 “Goh kech di faks dehn fi wi,
Di lee faks dehn weh di dischrai wi grayp aachad,
Bikaaz wi grayp aachad dehn di blaasam.”
16 “Mai preshos lov da di onli wan fi mee an Ai da di onli wan fi hihn.
Hihn di shepad ih flak eena wahn feel weh ful op a liliz.
17 Bifoa di day geh breezi ahn di shado dehn disapyaa,
Hori kohn bak tu mi, mi preshos lov,
Jos laik wahn gazel er wahn yong dyaa weh deh pahn di mongtin dehn weh di separayt wi fahn eech ada.*