Sekant Samwel
2 Aftawodz Dayvid aks Jehoava: “Ai shuda goh da wan a di siti dehn eena Jooda teritori?” Ahn den Jehoava tel ahn: “Yes, goh hed.” Den Dayvid aks ahn: “Wich wan a di siti dehn Ah shuda goh tu?” An ih tel ahn: “Goh da Hebron.” 2 Soh Dayvid gaan op deh wid ih too waif, Ahinowam an Abigayl. Ahinowam mi kohn fahn Jezriyel, an Abigayl geh marid tu Dayvid afta ih fers hozban Naybal, hoo kohn fahn Karmel, mi ded. 3 Ahn Dayvid kehr di man dehn weh mi deh wid ahn, ahn dehn kehr dehn famili lang wid dehn ahn setl dong eena di siti dehn rong Hebron. 4 Den di man dehn fahn Jooda chraib gaahn deh, ahn dehn anoint Dayvid fi bee king oava Jooda disendant dehn.
Dehn tel Dayvid: “Di man dehn fahn Jaybesh-gilyad da di wan dehn weh mi beri Saal.” 5 Soh Dayvid sen sohn mesinja fi tel di man dehn da Jaybesh-gilyad: “Ah hoap Jehoava bles unu, bikaaz unu shoa lov* tu unu laad Saal wen unu beri ahn. 6 Ah hoap Jehoava aalwayz shoa unu lov.* Ai wahn shoa unu kainis tu bikaaz a weh unu du. 7 Soh now, bee schrang ahn ga korij, kaaz unu laad Saal ded, ahn Jooda disendant dehn pik* mee fi bee king oava dehn.”
8 Bot Ner son Abner, di cheef a Saal aami, mi tek Saal son Ish-boashet ahn kehr ahn kraas da Mahanayim, 9 an ih put ahn fi bee king oava Gilyad, di Asherait dehn, Jezriyel, Eefrayim chraib, Benjamin chraib, an oava di hoal a Izrel. 10 Now Saal son Ish-boashet mi 40 yaaz oal wen ih staat rool az king oava Izrel, an ih mi rool fi too yaaz. Bot Jooda disendant dehn sopoat Dayvid. 11 Ahn Dayvid da-mi king da Hebron, an ih mi rool oava Jooda disendant dehn fi sevn yaaz ahn siks monts.
12 Laytaraan, Ner son Abner ahn di man dehn weh serv Saal son Ish-boashet lef fahn Mahanayim ahn gaahn da Gibyon. 13 Ahn Zerooya son Joawab ahn di man dehn weh serv Dayvid bok op tu dehn da di pool da Gibyon; ahn wan groop sidong pahn wan said a di pool, ahn di ada groop sidong pahn di ada said a di pool. 14 Fainali Abner tel Joawab: “Mek di yong man dehn get op ahn fait fronta wi.” Ahn Joawab tel ahn: “Mek dehn goh hed.” 15 Soh di man dehn fahn Ish-boashet servant dehn groop pik 12 man fahn Benjamin chraib, ahn di man dehn fahn Dayvid servant dehn groop pik 12 man, ahn dehn kraas oava fi fait. 16 Ahn dehn grab wan anada fahn dehn hyaa ahn dehn stab wan anada, an aala dehn jrap dong ded tugeda. Dat da wai dehn kaal da plays weh deh eena Gibyon teritori Helkat-hazoorim.
17 Afta dat aala dehn mi fait haad pahn da day, ahn fainali Dayvid servant dehn en op di win di fait gens Abner ahn di Izrelait man dehn weh mi deh wid ahn. 18 Now Zerooya chree son mi dehdeh—Joawab, Abishai, an Asahel. Now Asahel kuda mi ron faas laik wahn dyaa. 19 An Asahel chays afta Abner, an ih rifyooz fi stap chays ahn. 20 Wen Abner luk baka ahn, ih seh, “Da yoo dat, Asahel?” An Asahel tel ahn, “Da mee, yes.” 21 Den Abner tel ahn: “Stap chays mi ahn goh kech wan a dehndeh yong man, ahn yu ku tek wateva ih gat fi yuself.” Bot Asahel neva waahn stap chays ahn. 22 Soh Abner tel Asahel agen: “Stap chays mi, er els Ah wahn kil yu. An if Ah kil yu, how Ah wahn ku fays yu breda Joawab?” 23 Bot ih stil neva waahn stap, soh Abner stab ahn eena ih beli wid di en a ih spyaa handl, ahn di spyaa gaahn chroo ahn chroo ahn kom owt fan ih bak. Soh Asahel jrap rait deh ahn ded pahn di spat. An evribadi weh paas bai Asahel badi wuda stap deh fi wahn lee wail.
24 Den Joawab an Abishai gaahn chays afta Abner. Di son mi-di goh dong wen dehn reech da Ama Hil, weh deh fronta Gaiya pahn di way tu di wildanes rong Gibyon. 25 Den di man dehn fahn Benjamin chraib gyada tugeda az wahn aami wid Abner pahn tap a wahn nada hil, ahn dehn tek dehn pozishan fi fait. 26 Den Abner hala aata Joawab an aks ahn: “Wi wahn kantinyu kil wan anada fareva? Yu noh noa dat dis onli wahn en bad fi aala wi? Soh how lang yu wahn wayt fi tel yu peepl fi stap chays dehn brada dehn?” 27 Den Joawab seh: “Az shoar az di chroo Gaad alaiv, if yu neva seh notn, den di peepl mi wahn kantinyu chays dehn brada dehn til maanin.” 28 Den Joawab bloa ih haan, ahn di man dehn weh mi deh wid ahn stap chays di man dehn fahn Izrel, ahn dehn stap fait.
29 Den Abner ahn di man dehn weh mi deh wid ahn gaahn chroo di Araba aal nait, ahn den dehn kraas tu di ada said a di Jaadn ahn gaan op di vali* til dehn reech da Mahanayim. 30 Afta Joawab stap chays Abner, ih gyada aala di man weh mi deh wid ahn. Pahn Dayvid said, Asahel ahn 19 man mi ded. 31 Bot Dayvid servant dehn mi win di fait gens di man dehn fahn Benjamin chraib ahn di man dehn weh mi deh wid Abner, ahn 360 a dehn mi ded. 32 Dehn kehr Asahel ahn beri ahn eena ih pa toom, weh deh da Betlihem. Den Joawab ahn di man dehn weh mi deh wid ahn chravl aal nait til dehn reech da Hebron wen di son jos mi-di kom op.