Dyooteronomi
20 “If unu goh fait gens unu enimi dehn an unu si dat dehn ga moa haas, chariyat, ahn soalja dan unu, unu noh fi bee frayd fi dehn, bikaaz Jehoava unu Gaad weh bring unu owta Eejip deh wid unu. 2 Bifoa unu goh fait, wahn prees fi taak tu di soalja dehn, 3 ahn tel dehn, ‘Oa Izrel, lisn tu weh Ah wahn tel unu. Soon unu gwehn fait wid unu enimi dehn. Noh geh diskorij ahn noh bee frayd. Noh geh fraitn ner chrimbl sayka dehn, 4 bikaaz Jehoava unu Gaad di leed unu. Hihn wahn fait gens unu enimi dehn an ih wahn sayv unu.’
5 “Di cheef dehn a di aami fi taak tu di soalja dehn tu, ahn dis da weh dehn fi tel dehn, ‘If sohnbadi don bil wahn nyoo hows bot ih noh di liv eena it yet, ih beta ih goh bak da ih hows, bikaaz ih ku ded eena di waar ahn wahn nada man wahn staat liv eena di hows. 6 An if sohnbadi don plaant wahn grayp aachad bot ih noh injai di froots weh kohn fahn ih aachad, ih beta ih goh bak da ih hows, bikaaz ih ku ded eena di waar ahn wahn neks man wahn injai di froots weh kohn fahn da aachad. 7 An if sohnbadi don geh ingayj wid wahn laydi bot ih noh geh marid tu ahn yet, ih beta ih goh bak da ih hows, bikaaz ih ku ded eena di waar ahn wahn neks man wahn geh marid tu di laydi.’ 8 Di cheef dehn a di aami fi taak tu di soalja dehn agen, ahn dis da weh dehn fi tel dehn, ‘If sohnbadi frayd an ih feel diskorij, ih beta ih goh bak da ih hows, soh dat ih noh mek di ada soalja dehn geh diskorij tu.’ 9 Wen di cheef dehn a di aami finish taak tu di soalja dehn, dehn fi chooz sohn cheef weh wahn leed di soalja dehn eena di waar.
10 “Bifoa unu goh fait gens wahn siti, unu fi chrai mek pees wid di peepl fahn da siti fers. 11 If dehn mek pees wid unu ahn dehn mek unu goh eena di siti, den evribadi weh dehdeh wahn bee fi unu slayv ahn dehn wahn serv unu. 12 Bot if dehn rifyooz fi mek pees wid unu ahn dehn fait gens unu, den unu fi kyapcha dehn siti. 13 Ahn Jehoava unu Gaad wahn mek unu kanka di siti, an unu fi kil aala di mayl dehn weh dehdeh wid unu soad. 14 Bot unu fi tek aala di laydi dehn, di pikni dehn, di animal dehn, an evriting weh deh eena di siti weh da-mi fi di peepl. An unu fi tek aala di preshos tingz weh da-mi fi di peepl. Dehndeh tingz da weh Jehoava unu Gaad di giv unu.
15 “Dat da weh unu fi du wid aala di siti dehn weh deh faar fahn unu weh da noh laik di siti dehn fahn di nayshanz weh deh kloas tu unu. 16 Bot unu fi kil aala di peepl eena dehnya siti weh Jehoava unu Gaad di giv tu unu az wahn inheritans. 17 Unu fi mek shoar dat unu dischrai aala di Hitait dehn, di Amorait dehn, di Kaynanait dehn, di Perizait dehn, di Haivait dehn, ahn di Jebyusait dehn, jos laik weh Jehoava unu Gaad mi tel unu fi du, 18 soh dat dehn noh mek unu du di saym tingz weh dehn du wen dehn wership dehn gaadz. Gaad hayt di tingz weh dehn du, ahn dehndeh tingz wahn mek unu sin gens Jehoava unu Gaad.
19 “If unu sorong wahn siti soh dat unu ku kyapcha it an unu fait gens it fi soh moch dayz, den unu noh fi chap dong di chree dehn rong di siti wid unu aks. Unu ku eet fahn dehndeh chree, bot unu noh fi kot dehn dong. Unu noh fi atak wahn chree laik how unu wuda atak sohnbadi. 20 Unu fi onli kot dong di chree dehn weh unu noa unu kyaahn eet fram. Unu ku kot dehn dong ahn yooz dehn fi sorong di siti weh unu fait gens til unu kanka di siti.