Fers Kingz
10 Now di kween a Sheeba hyaa dat Salaman mi faymos ahn dat da mi bikaaz a Jehoava naym, soh shee gaahn vizit ahn fi si how waiz ih mi waiz. 2 Shee reech da Jeroosalem wid wahn big groop a ih servant dehn, ahn wid kyamil weh di kehr balsam ail* ahn wahn lata goal ahn preshos stoan. Shee gaahn da Salaman an aks ahn evriting weh ih mi waahn noa. 3 Den King Salaman ansa aala ih kweschan dehn. Notn mi tu haad fi mek hihn eksplayn tu ahn.
4 Wen di kween a Sheeba si how waiz Salaman mi waiz, ahn wen ih si di palis weh ih mi bil, 5 di food pan ih taybl, di way how ih mi aaganaiz ih ofishal dehn fi sidong rong ih taybl, di way how di wayta dehn serv di food ahn di way how dehn mi jres, ahn wen ih mi si di wan dehn weh serv ih jrinks, an aala di bon aafrin weh ih naamali aafa op da Jehoava templ, dat mi reeli impres shee; ih neva eevn noa weh fi seh. 6 Soh shee tel di king: “Now Ah noa dat evriting weh Ah mi hyaa eena mi konchri bowt aala di grayt tingz weh yu du* ahn bowt yu wizdom da-mi chroo. 7 An Ah neva bileev notn weh Ah mi hyaa til Ah kuda kohn see’t wid mi oan too aiy. Ahn wach ya now, Ah neva eevn geh di hoal stoari! Kaaz yoo ga lat moa wizdom ahn lat moa richiz dan weh dehn mi tel mi yu gat. 8 Yu peepl ahn yu servant dehn onli hapi bikaaz dehn aalwayz get fi deh rong yoo ahn fi lisn tu yu wizdom! 9 Prayz Jehoava yu Gaad! Hihn shoa dat ih pleez wid yu wen ih put yoo fi rool oava Izrel. Ahn bikaaz Jehoava ga lata lov fi Izrel, hihn apoint yoo az king fi joj di peepl eena wahn fyaa way ahn rool wid raichosnis.”
10 Den shee gi di king 120 goal talent* ahn wahn lata balsam ail ahn preshos stoan. Nobadi mi eva bring een soh moch balsam ail laik weh di kween a Sheeba mi bring fi King Salaman.
11 Hairam ship dehn weh mi kehr goal fahn Oafir mi aalso bring een lata sandalwud ahn preshos stoan fahn Oafir. 12 Di king mi yooz di sandalwud fi mek poas fi Jehoava templ ahn fi di king palis. Ih mi aalso yooz it fi mek sohn haap ahn sohn inschrument weh ga schring fi di singa dehn. An op tu tudeh, dehn neva bring een ner si dis kaina sandalwud eva agen.
13 King Salaman mi aalso gi di kween a Sheeba eniting weh shee mi waahn, pahn tap a wateva hihn mi waahn giv ahn. Afta dat, shee an ih servant dehn lef fahn deh ahn dehn gaahn hoam.
14 Evri yaa, Salaman wuda geh 666 goal talent, 15 pahn tap a di taks weh ih kalek fahn di biznizman dehn, di Arab king dehn, ahn di govna dehn fahn eena Izrel.
16 King Salaman mi mek 200 big sheel weh mek owta goal weh miks wid wahn nada metal, ahn dehn mi yooz bowt 15 pong a goal* pahn eech sheel. 17 An ih mek 300 smaal sheel* weh mek owta goal weh miks wid wahn nada metal, ahn dehn mi yooz bowt foa pong a goal* pahn eech smaal sheel. Den di king put dehn eena di hows weh dehn kaal Lebanon Faris.
18 Ahn di king mi mek wahn big chroan owta aivri ahn den kova it wid pyoar goal. 19 Ahn dehn mi ga siks step weh goh op tu di chroan, ahn di chroan mi ga sohnting weh luk laik wahn lee rong roof rait oava it, ahn wahn handl mi deh pahn eech said a di chroan, ahn too laiyan mi deh saida di handl dehn. 20 Dehn mi ga 12 laiyan, wan pahn eech said a di siks step. No ada kingdom mi eva du eniting laik dat.
21 Aala di kop dehn weh King Salaman mi jrink owta mi mek owta goal, an aala di dish an ada tingz weh deh eena di hows weh dehn kaal Lebanon Faris mi mek owta pyoar goal tu. Nat wan ting mi mek owta silva, kaaz eena Salaman taim silva neva wert notn. 22 Di king mi ga wahn lata ship weh wuda goh da Tarshish lang wid Hairam servant dehn. Ahn wans evri chree yaaz, di Tarshish ship dehn wuda kohn bak ful op a goal ahn silva, aivri, mongki, ahn peekak.
23 Soh King Salaman mi richa ahn waiza dan aala di ada king dehn pahn ert. 24 Ahn peepl kohn fahn aal oava di werl fi meet Salaman ahn hyaa di wizdom weh Gaad mi giv ahn. 25 Evri yaa, eech a dehn wuda bring wahn gif. Dehn wuda bring tingz weh mek owta silva ahn tingz weh mek owta goal. Dehn wuda bring kloaz, aama, balsam ail, haas, ahn myool.
26 Ahn Salaman mi kip aan di geh moa ahn moa chariyat ahn haas.* Ih mi ga 1,400 chariyat ahn 12,000 haas.* An ih kip dehn kloas tu ahn da Jeroosalem an eena di siti dehn wehpaat dehn wuda kip ih chariyat dehn.
27 Di king projoos lata silva eena Jeroosalem, az moch az di stoan dehn. An ih projoos az moch seedawud az di fig chree dehn weh deh eena di Shefeela.
28 Salaman mi geh di haas dehn fahn Eejip, ahn di king wuda sen ih biznizman dehn fi bai wahn herd* fi wahn set prais. 29 Da mi 600 pees a silva fi eech chariyat weh kohn fahn Eejip, ahn 150 fi wahn haas. Den dehn wuda sel dehn tu di Hitait king dehn ahn di Siriyan king dehn.