Salaman Sang
8 “If onli yoo da-mi laik mai breda,
Weh mi ma mi bresfeed!
Den if Ah mi fain yu owtsaid, Ah wuda kis yu,
Ahn nobadi wuda joj mi fi dat.
2 Ah wuda kehr yu eena mi ma hows;
Shee da di wan weh teech mi.
Ah wuda kehr yu deh,
An Ah wuda gi yu nais wain fi jrink
Ahn fresh pomegranet joos.
3 Wid fi hihn lef han ih wuda toch mi hed eena wahn jentl way,
An ih wuda rap ih rait han rong mi.
4 Aala Jeroosalem daata dehn, Ah waahn unu swayr tu mi
Dat unu noh wahn chrai fi presha mi fi lov sombadi weh Ah noh feel lov fa.”
5 “Da hoo dat oava deh weh di kom owta di wildanes di leen pahn da man?”
“Ah wayk yu op fahn anda di aapl chree,
Di saym plays wehpaat yu ma mi ga layba payn wen shee mi pregnant wid yu,
Di saym plays wehpaat yu mi baan.
6 Mek Ai bee laik wahn seel* ring weh heng kloas tu yu haat,
Laik wahn seel ring weh yu wayr pahn yu han,
Bikaaz lov az powaful az det,
Ahn jos laik how di Grayv* rifyooz fi let goh ih viktim, da rait soh deep lov mek too peepl kyaahn let goh a eech ada.
Deep lov da laik wahn faiya weh di blayz op, ahn da faiya da fahn Jah.*
7 Nat eevn wahn flod a waata ku put owt di faiya, weh da lov,
Ahn no riva ku wash it weh.
If wahn man wuda chrai yooz aala ih richiz fi geh lov,
Ih richiz* wahn stay rait deh.”
8 “Wi ga wahn lee sista,
Ahn shee noh ga no bres.
Weh wi wahn du wid wi sista
Pahn di day wen dehn kohn aks ahn fi bee wahn waif?”
9 “If shee da wahn waal,
Wi wahn put wahn byootiful silva lej tap a ahn laik wahn krong,
Bot if shee da wahn doa,
Wi wahn boad ahn op wid seeda wud.”
10 “Ai da wahn waal,
Ahn mai bres da laik di towa dehn pahn da waal.
Soh wen hihn luk pahn mi,
Ih ku si dat Ah ga pees eena mi haat.
11 Salaman mi ga wahn grayp aachad da Bayal-haymon,
Ahn hihn put sohn peepl fi main it.
Eech wan a dehn wuda pay wahn towzn pees a silva fi di froot weh ih bayr.
12 Oa Salaman, di towzn peesiz a silva bilangz tu yoo,
Ahn too honjrid peesiz a silva da fi dehn wan weh tek kayr a di aachad.
Bot Ai ga mi oan grayp aachad, ahn da onli fi mee.”
13 “Yoo weh di sidong eena di gyaadn,
Mi fren dehn lisn fi hyaa yu vais.
Ai waahn hyaa yu vais tu.”
14 Mai preshos lov, pleez hori,
Ron op di mongtin dehn weh di spais plaant dehn groa.
Ron az faas az wahn gazel
Er az faas az wahn yong dyaa.