Dyooteronomi

14 “Unu da Jehoava pikni dehn, ahn hihn da fi unu Gaad. Unu noh fi kot unuself ner shayv aaf unu aiybroa* fi wahn ded persn. 2 Unu da wahn hoali peepl tu Jehoava unu Gaad, ahn Jehoava chooz unu fi bee ih peepl. Hihn pik unu fi bee ih speshal peepl fahn monks aala di peepl pahn di ert.

3 “Unu noh fi eet notn weh Gaad hayt. 4 Dehnya da di animal dehn weh unu ku eet: di bul, di sheep, di goat, 5 di dyaa, di gazel, di roabok,* di wail goat, di antiloap, di wail sheep, ahn di mongtin sheep. 6 Unu ku eet eni animal weh ga wahn split huf ahn weh choo ih food too taimz.* 7 Bot unu noh fi eet dehnya animalz weh choo dehn food too taim er weh ga wahn split huf: di kyamil, di rabit, ahn di rak baja,* bikaaz dehndeh animal choo dehn food too taimz bot dehn noh ga wahn split huf. Dehndeh animal noh kleen fi unu. 8 Unu noh fi eet di pig needa, bikaaz eevn doa ih ga wahn split huf, ih noh choo ih food too taimz, ahn da animal noh kleen fi unu. Unu noh fi eet di meet fahn dehndeh animal, an unu noh fi toch dehn ded badi needa.

9 “Owta evriting weh liv eena di waata, unu ku eet eni animal weh ga fin ahn skayl. 10 Bot unu noh fi eet eniting weh noh ga no fin ahn skayl. Dehndeh animal noh kleen fi unu.

11 “Unu ku eet eni berd weh kleen. 12 Bot dehnya da di berd weh unu noh fi eet: di eegl, di see haak,* di blak jankro, 13 di red kait, di blak kait,* eni ada kaina kait, 14 evri kaina blak berd, 15 di oschrij, di owl, di gol,* evri kaina falkon,* 16 di smaal owl, di owl weh ga sohn lang ayz, di swaan, 17 di pelikan, di jankro, di koarmorant,* 18 di stoark, evri kaina heron,* di hoopu,* ahn di ratbat. 19 Evri insek weh ga wing noh kleen, an unu noh fi eet dehn. 20 Bot unu ku eet eni kleen animal weh ku flai.

21 “If unu fain wahn ded animal, unu noh fi eet it. Unu fi giv it tu wahn farina weh di liv monks unu eena unu siti dehn, ahn dehn ku eet it, er unu ku sel it tu wahn farina. Unu da wahn hoali peepl tu Jehoava unu Gaad.

“An unu noh fi bail wahn yong goat eena ih ma milk.

22 “Evri yaa, unu fi gi ten persent a evriting weh groa pahn unu lan. 23 Unu fi eet ahn jrink di ten persent a unu grayn, unu nyoo wain, unu ail, ahn di fersbaan a unu animal dehn fronta Jehoava unu Gaad da di plays weh hihn chooz fi mek unu wership ahn. Unu fi du dat soh dat unu ku laan fi aalwayz ga lata rispek fi Jehoava unu Gaad.

24 “Jehoava unu Gaad da di wan weh bles unu wid aala dehndeh tingz. Bot if di plays weh Jehoava unu Gaad chooz fi bring gloari tu ih naym tu faar an unu kyaahn kehr dehndeh tingz wid unu, 25 unu fi sel dehn. An unu fi put di moni weh unu geh fahn dehndeh tingz eena wahn bag, ahn kehr it wid unu da di plays weh Jehoava unu Gaad chooz. 26 Den unu ku spen di moni pahn eniting weh unu waahn, laik kow, sheep, goat, wain, eni ada kaina alkohol, an eniting els weh unu waahnt. Unu an evribadi weh liv wid unu wahn eet da da plays fronta Jehoava unu Gaad, an unu wahn bee hapi. 27 Ahn fi az lang az unu di liv, unu noh fi ferget bowt di Leevait dehn weh di liv eena unu siti dehn, bikaaz dehn neva geh no shayr er inheritans laik unu.

28 “Evri chree yaaz, unu fi gyada op di ten persent a evriting weh groa pahn unu lan, an unu fi stoar it da unu siti dehn. 29 Den di Leevait dehn weh noh geh no shayr er inheritans laik unu, di farina dehn, di pikni dehn weh noh ga no pa, ahn di wido dehn weh di liv eena unu siti dehn gwehn eet til dehn geh ful, soh dat Jehoava unu Gaad bles evriting weh unu du.