Heebrooz
8 Now di mayn point a weh wi di seh da dis: Wi ga wahn hai prees laik dis, ahn hihn di sidong pahn di rait han said a di chroan a di grayt Gaad eena hevn. 2 Ahn hihn da wahn servant weh serv eena di Moas Hoali weh deh eena di chroo tent. Ahn dis tent da weh Jehoava ihself mi set op, noh man. 3 Kaaz evri hai prees ga di rispansabiliti fi gi gifs tu Gaad ahn fi aafa op sakrifais. Soh ih mi nesiseri fi mek Jeezas aafa wahn sakrifais tu. 4 Now if hihn mi deh pahn ert, hihn wudn bee wahn prees, kaaz akaadn tu di Laa, ada prees deh fi aafa di gifs pahn ert. 5 Di werk weh dehndeh prees du da jos wahn egzampl fi shoa di tingz weh hapm da hevn. Wi noa dis kaaz wen Gaad mi tel Moaziz how fi mek di tent, ih mi seh: “Ah mi shoa yu aala di patan dehn wen yu mi deh pahn di mongtin, soh pay atenshan soh dat yu ku fala dehndeh patan.” 6 Bot now Jeezas geh wahn way beta werk fi du, bikaaz hihn da aalso di helpa* fi wahn beta kovenant, ahn dis kovenant bays pahn sohn beta pramis.
7 If di oal kovenant neva ga eniting rang wid it, wi wudn need wahn nyoo kovenant. 8 Kaaz wahn skripcha mi did seh dat Gaad mi blaym di peepl; eena da skripcha Jehoava mi seh: “‘Di dayz di kohn wen Ah wahn mek wahn nyoo kovenant wid di peepl a Izrel ahn wid di peepl a Jooda.’ 9 Jehoava mi aalso seh: ‘Ih noh wahn bee laik di kovenant weh Ah mi mek wid fi dehn ansestaz pahn di day wen Ah mi hoal dehn han ahn kehr dehn owta di lan a Eejip. Dehn neva stik tu mai kovenant, soh Ah stap kay bowt dehn.’
10 Jehoava kantinyu fi seh, “Dis da di kovenant weh Ah wahn mek wid dehn afta dehndeh dayz: ‘Ai wahn put mi laa eena dehn main, an Ah wahn rait mi laa pahn dehn haat. An Ai wahn bee fi dehn Gaad, ahn dehn wahn bee mai peepl.
11 “‘Ahn non a dehn wahn tel ih felo konchriman er ih breda eva agen: “Yu mos geh fi noa Jehoava!” Kaaz aala dehn wahn noa mi, fahn di kaman peepl tu di roola dehn. 12 Kaaz Ai wahn fergiv dehn sinz, An Ah noh wahn memba dehn sinz nohmoh.’”
13 Now wen hihn seh “wahn nyoo kovenant,” ih mi-di seh dat di oal wan owt-daytid. Now if sohnting owt-daytid, dat meenz seh dat ih oal an ih wahn soon disapyaa.