Dyooteronomi

1 Moaziz mi taak tu aala di Izrelait dehn wail dehn mi deh kloas tu di Jaadn Riva eena di wildanes kloas tu Sof, weh deh bitween Payran, Toafel, Layban, Hazeerot, ahn Daizahab. 2 Ih tek 11 dayz fi mek sombadi chravl fahn Hoareb tu Kaydesh-barniya if ih goh pahn di road weh leed tu Mongt Seeyir. 3 Pahn di fers day a di 11th mont, eena di 40th yaa, Moaziz mi tel di Izrelait dehn* evriting weh Jehoava mi koman ahn fi tel dehn. 4 Dat da-mi afta hihn mi win di fait gens Saihon, di Amorait king, weh mi-di liv da Heshbon ahn gens Og, di king a Bayshan, da Ejriyai, hoo mi-di liv da Ashtarot.* 5 Moaziz mi eksplayn Gaad Laa tu di peepl wen dehn mi deh kloas tu di Jaadn Riva da Moawab, ahn dis da weh ih mi tel dehn:

6 “Dis da weh Jehoava wi Gaad tel wi da Hoareb, ‘Unu don stay eena dis ayrya weh ga lata mongtin fi wahn lang taim. 7 Unu lef fahn ya ahn goh da di Amorait dehn lan, weh deh eena di ayrya weh ga lata mongtin, ahn goh kloas tu di ada lan dehn weh da di Araba, di ayrya weh ga lata mongtin, di Shefeela, di Negeb, ahn di ayrya weh deh kloas tu di see. Aala dehndeh lan bilang tu di Kaynanait dehn. An unu fi goh aal di way tu Lebanon* ahn tu di Yoofraytis Riva, weh da di grayt riva. 8 Ah di giv unu dis lan. Goh ahn kanka di lan weh Ai, Jehoava, mi pramis fi giv tu Aybraham, Aizak, ahn Jaykob, hoo da unu ansesta dehn. Ai pramis fi giv it tu dehn ahn dehn disendant dehn.’

9 “Ahn rong da taim Ah mi tel unu, ‘Ah kyaahn leed unu bai miself. 10 Jehoava unu Gaad mek unu ga lata disendant. Ahn now da soh moch a unu dat unu da laik di staarz weh deh eena di skai. 11 Ah pray dat Jehoava, di Gaad a unu ansesta dehn, mek unu ga wahn lat moa disendant. An Ah pray dat ih bles unu, jos laik weh ih mi pramis fi du. 12 Ah kyaahn deel wid unu wen unu di kwaaril ahn wen unu ga prablemz. Unu da wahn berdn, an Ah kyaahn deel wid unu bai miself. 13 Chooz sohn man weh waiz ahn weh ga lata ekspeeryens fahn monks unu chraib dehn, an Ah wahn mek dehn bee cheef oava unu.’ 14 Dis da weh unu mi tel mi, ‘Weh yu tel wi fi du song gud.’ 15 Soh Ah mek di waiz man dehn weh ga ekspeeryens fahn unu chraib dehn bee cheef oava unu. Dehn da cheef oava wahn towzn peepl, cheef oava wahn honjrid peepl, cheef oava fifti peepl, ahn cheef oava ten peepl. Ahn dehn ga atariti oava unu chraib dehn.

16 “Rong da taim Ah mi gi dehnya inschrokshan tu di joj dehn, ‘Wen wahn prablem kom op monks di peepl ahn dehn goh si unu, unu fi bee fyaa wen unu joj dehn. Ih noh mata if di prablem da bitween too Izrelait er bitween wahn Izrelait ahn wahn farina weh di liv monks unu. 17 Unu fi bee fyaa wen unu joj. Unu fi lisn tu peepl weh impoatant ahn tu peepl weh noh impoatant. Unu noh fi bee frayd fi peepl, bikaaz unu di joj fi Gaad. An if wahn prablem kom op weh tu haad fi mek unu deel wid, unu fi kohn da mee ahn tel mi bowt it an Ai wahn lisn tu unu.’ 18 Rong da taim Ah mi giv unu sohn inschrokshanz weh unu fi fala.

19 “Den Jehoava mi koman wi fi lef fahn Hoareb ahn goh da Kaydesh-barniya. Soh wi lef ahn wi gaahn chroo di wildanes weh mi big ahn daynjaros weh unu mi si wen unu mi-di chravl tu di Amorait dehn lan weh deh eena wahn ayrya weh ga lata mongtin. 20 Den dis da weh Ah mi tel unu, ‘Unu reech da di Amorait dehn lan weh deh eena wahn ayrya weh ga lata mongtin, weh Jehoava wi Gaad di gi wi. 21 Jehoava unu Gaad di giv unu da lan. Unu fi goh ahn kanka it, jos laik weh Jehoava, di Gaad a unu ansesta dehn, mi tel unu fi du. Noh bee frayd ner fraitn.’

22 “Bot aala unu mi kohn da mee, ahn dis da weh unu mi tel mi, ‘Mek wi sen sohn man heda wi fi chek owt di lan, soh dat dehn ku kohn bak ahn tel wi wehpaat wi fi goh ahn weh kaina siti wi wahn si.’ 23 Di sojeshan weh unu mi gi mee mi song gud, soh Ah mi chooz 12 man, wan man fahn eech chraib. 24 Dehn lef fahn wehpaat dehn mi deh ahn dehn gaahn da wahn ayrya weh ga lata mongtin. Dehn reech Eshkol Vali* ahn dehn gaahn chek owt di lan. 25 Dehn mi tek sohn froot fahn di lan ahn dehn mi bring it tu wi. Ahn dis da weh dehn mi seh wen dehn mi kohn bak, ‘Di lan weh Jehoava wi Gaad di gi wi da wahn gud lan.’ 26 Bot unu neva waahn goh da da lan, an unu neva obay di koman weh Jehoava unu Gaad mi giv unu. 27 Unu mi-di komplayn eena unu tent, an unu mi-di seh, ‘Jehoava hayt wi ahn dat da wai ih bring wi owta Eejip fi mek di Amorait dehn kil wi. 28 Weh kaina plays wi di goh tu? Wi bradaz mek wi feel frayd wen dehn mi seh, “Di peepl weh liv deh schranga ahn biga dan wee, ahn dehn ga sohn hai ahn schrang waal rong dehn siti, ahn rait deh wi mi si Aynak disendant dehn.”’

29 “Soh Ah mi tel unu, ‘Noh bee frayd ner mek dehndeh peepl fraitn unu. 30 Jehoava unu Gaad gwehn heda unu an ih wahn fait fi unu, jos laik weh unu mi si ih du fi unu da Eejip. 31 An unu mi si how Jehoava mi bak unu wail unu mi-di chravl eena di wildanes, jos laik how wahn man bak ih son. Hihn mi du dat evriway wehpaat unu mi gaahn til unu mi reech dis plays.’ 32 Bot eevn soh, unu neva ga fayt eena Jehoava unu Gaad. 33 Hihn gaahn heda unu fi fain wahn plays fi mek unu kyamp. Joorin di nait ih gaid unu wid faiya ahn joorin di day ih gaid unu wid wahn klowd fi shoa unu wehpaat unu fi goh.

34 “Joorin di hoal taim Jehoava mi hyaa aala di tingz weh unu mi seh, ahn sayka dat ih mi geh beks ahn dis da weh ih mi swayr, 35 ‘Non a di peepl fahn dis wikid jenarayshan wahn si di gud lan weh Ah mi swayr fi giv tu unu ansestaz, 36 eksep Jefona son Kayleb. Hihn wahn bee di wan weh see’t, an Ah wahn gi di saym lan weh hihn waak pan tu hihn an ih disendant dehn, bikaaz ih mi fala mee, Jehoava, wid aala ih haat.’ 37 Jehoava mi eevn geh beks wid mee sayka unu, an ih tel mi, ‘Yoo noh gwehn deh needa. 38 Non son Jashwa, hoo da unu servant,* wahn bee di wan weh gwehn eena di lan. Mek hihn bee schrang* bikaaz hihn wahn bee di wan weh mek di Izrelait dehn inherit di lan.’ 39 Den dis da weh Gaad mi tel unu, ‘An unu pikni dehn gwehn eena di lan. Dehndeh da di saym pikni weh unu seh unu enimi dehn wahn tek fahn unu ahn weh noh noa rait fahn rang. An Ai wahn gi dehn di lan weh wahn bilangz tu dehn. 40 Bot unu fi ton bak ahn goh da di wildanes tuwaadz di dairekshan a di Red See.’

41 “Den unu mi tel mi, ‘Wi sin gens Jehoava. Soh now wi gwehn op di mongtin ahn fait, jos laik weh Jehoava wi Gaad koman wi fi du!’ Soh eech wan a unu mi grab unu wepan dehn fi goh da waar, an unu mi tink seh ih mi wahn bee eezi fi goh op di mongtin. 42 Bot Jehoava tel mi, ‘Dis da weh yu fi tel dehn: “Unu noh fi goh op di mongtin ahn fait, bikaaz Ah noh wahn deh wid unu. If unu goh, unu noh wahn win di fait gens unu enimi dehn.”’ 43 Soh Ah mi taak tu unu, bot unu neva lisn. Insted unu mi du weh unu mi waahnt, an unu neva obay Jehoava koman an unu gaan op di mongtin. 44 Den di Amorait dehn weh liv op eena di mongtin kohn dong fi meet unu, ahn dehn chays unu jos laik how di bee dehn wuda chays sombadi. Dehn mi skyata unu fahn Seeyir aal di way tu Horma. 45 Soh unu mi kohn bak, an unu mi staat tu baal fronta Jehoava, bot Jehoava neva lisn tu unu ner pay unu no main. 46 Dat da wai unu mi kantinyu liv da Kaydesh fi wahn lang taim.