Dyooteronomi

19 “Wen Jehoava unu Gaad dischrai di nayshan dehn fahn di lan weh Jehoava unu Gaad di giv unu, an unu kanka dehn lan ahn staat liv eena dehn siti ahn dehn hows dehn, 2 unu fi chooz chree siti eena di lan weh Jehoava unu Gaad di giv unu fi liv eena. 3 Unu fi divaid di lan weh Jehoava unu Gaad di giv unu eena chree paats. An unu fi chooz wan siti fahn eech paat a di lan. Unu fi mek sohn road weh goh tu dehndeh siti, an if sombadi kil wahn nada persn, dehn ku ron tu wan a dehndeh siti.

4 “If sohnbadi kil wahn nada persn bai mistayk bot ih neva hayt ahn, den ih fi ron da wan a dehndeh siti soh dat ih ku kantinyu liv. 5 Fi egzampl, if ih gaahn wid da persn da di faris fi chap wud an ih pik op ih aks fi chap wahn chree ahn di hed a di aks flai aafa di handl an ih nak di persn ahn kil ahn, den ih fi ron da wan a dehndeh siti soh dat ih ku kantinyu liv. 6 Bot if di siti deh tu faar, den di relitiv* a di ded persn wahn chays ahn dong ahn kil ahn bikaaz ih soh beks. Bot da persn noh dizerv fi ded bikaaz ih neva hayt di persn weh ih kil. 7 Dat da wai Ah di koman unu fi chooz chree siti.

8 “Jehoava unu Gaad wahn giv unu moa lan jos laik weh ih mi swayr tu unu ansestaz, an ih wahn giv unu aala di lan weh ih mi pramis fi gi dehn. 9 Bot dat onli wahn hapm if unu mek shoar unu obay aala di komanment dehn weh Ah di giv unu tudeh an if unu lov Jehoava unu Gaad an if unu aalwayz fala di way weh Gaad tel unu fi goh. Den wen Gaad giv unu moa lan, unu fi pik chree moa sayf siti. 10 Da way deh, nobadi weh inosent wahn ded eena di lan weh Jehoava unu Gaad di giv unu az wahn inheritans, an unu noh wahn bee gilti a merda.

11 “Bot if wahn persn hayt sombadi an ih laywayt ahn fi atak ahn an ih kil ahn, an ih ron da wan a dehndeh siti, 12 di elda dehn weh deh eena di siti weh ih yoostu liv fi sen sombadi fi goh luk far ahn, an kehr ahn da di relitiv a di ded persn, ahn di relitiv fi kil ahn. 13 Unu noh fi feel sari far ahn. Da way deh, di nayshan a Izrel noh wahn bee gilti a di merda a inosent peepl, ahn tingz gwehn gud fi unu.

14 “Wen eech wan a unu geh pees a di lan weh Jehoava unu Gaad di giv unu, unu noh fi moov unu nayba bongjri maaka fi ih lan fahn di spat wehpaat unu ansesta dehn mi put it.

15 “Wahn joj kyaahn seh dat wahn persn gilti if onli wan persn di akyooz ahn dat ih du sohnting rang er dat ih komit wahn sin. Bot if too er chree peepl seh dat dehn mi si ahn du sohnting rang, den ih wahn bee gilti fi chroo. 16 If sombadi waahn hert wahn nada persn an ih klaym seh dat da persn du sohnting rang, 17 den dehndeh too peepl weh di aagyu fi stan op fronta di prees dehn ahn di joj dehn weh di reprizent Jehoava ahn weh di serv joorin da taim. 18 Di joj dehn wahn fain owt if weh di persn seh da chroo. An if dehn fain owt dat ih di lai an ih di akyooz di ada persn a sohnting weh ih neva du, 19 den unu fi du di saym ting tu ahn laik weh ih mi-di plan fi du tu di ada persn. An unu fi geh rid a eniting weh bad fahn monks unu. 20 Di res a di peepl wahn hyaa bowt it ahn dehn wahn geh frayd, ahn nobadi wahn eva du eniting bad laik dat monks unu agen. 21 Unu noh fi feel sari far ahn. If wahn persn kil sombadi, den da persn fi ded tu. If wahn persn hert sombadi aiy er if ih brok dehn teet, han, er fut, den dehn fi du di saym ting tu da persn.