Di Mirakl da di Red See

Az soon az Fayro mi hyaa dat di Izrelait dehn gaan, ih mi sari ih sen dehn weh. Hihn koman ih soalja dehn: ‘Get aal mi waar chariyat dehn redi, ahn chays afta dehn! Wi shuda neva did alow dehn fi goh.ʼ Hihn an ih soaljaz staat tu chays afta di Izrelait dehn.

Jehoava mi yooz wahn klowd joorin di day ahn faiya da nait fi gaid ih peepl. Hihn mi leed dehn tu di Red See, an ih mi tel dehn fi set op dehn tent.

Den di Izrelait dehn si dat Fayro an ih aami mi-di chays afta dehn. Dehn mi chrap bitween di Red See ahn di Ijipshan aami. Den di Izrelait dehn tel Moaziz: ‘Wi wahn ded! Yu shuda mi lef wi da Eejip.ʼ Bot Moaziz mi tel dehn: ‘Noh bee frayd. Wayt ahn si how Jehoava wahn sayv wi tudeh.ʼ Moaziz mi reeli chros eena Jehoava, noh chroo?

Layta, Jehoava mi tel di Izrelaits fi put op dehn tent. Da sayhn nait, Jehoava mi moov di klowd ahn put it bitween di Ijipshan ahn di Izrelait dehn. Ih mi daak pahn di Ijipshan dehn said. Bot di Izrelaits mi ga lait pahn fi dehn said.

Jehoava mi tel Moaziz fi schrech owt ih han oava di see. Den Jehoava mek wahn schrang breez bloa aal nait. Di see mi split eena too. Ahn di milyanz a Izrelaits mi waak pahn jrai grong bitween di waal a waata weh mi deh pahn di lef ahn pahn di rait. Den dehn reech di ada said a di see.

Fayro mi fala di Izrelait dehn ahn chays dehn chroo di see pahn jrai grong. Den Jehoava mi mek di Ijipshan aami geh kanfyooz op. Di weel dehn fahn di chariyat mi staat tu jrap aaf. Di soaljaz mi hala: ‘Mek wi goh fahn ya bikaaz Jehoava di help dehn ahn hihn di fait fi dehn!ʼ

Jehoava mi tel Moaziz: ‘Schrech owt yu han oava di see.ʼ Sodn-wan, di waata kohn dong ahn jrap pahn di Ijipshan aami. Fayro an aala ih soalja dehn ded. Nat wan a dehn mi servaiv.

Pahn di ada said a di see, di big krowd a peepl mi-di prayz Jehoava wid wahn sang: “Mek wi sing tu Jehoava, bikaaz hihn win di vikchri. Hihn chroa di haas ahn di wan weh raid di haas eena di see.” Wail di peepl mi-di sing, di laydi dehn staat tu daans ahn play di tambareen. Evribadi mi veri hapi dat now dehn mi free fi chroo.