Baylam Dongki Taak

Di Izrelaits mi deh eena di wildanes fi aalmoas 40 yaaz. Bai den, dehn mi don kanka wahn lata siti. Dehn set op dehn tent eena di wildanes da Moawab, weh mi deh kraas fahn di Jaadn Riva. Ahn dehn mi wahn soon reech di Pramis Lan. Baylak, di king a Moawab, mi frayd dat di Izrelaits wuda tek weh ih lan. Soh hihn mi invait wahn man weh naym Baylam fi kohn da Moawab fi kers di Izrelait dehn, dat meenz dat hihn mi waahn Baylam kaal dong eevl pahn dehn.

Bot Jehoava mi tel Baylam: ‘Yu noh fi put wahn kers pahn di peepl.ʼ Soh Baylam neva gaahn da Moawab. King Baylak mi invait ahn wahn sekant taim ahn pramis fi giv ahn eniting weh ih mi waahnt. Stilyet, Baylam rifyooz fi goh. Den Gaad tel ahn: ‘If yu goh, yu onli wahn tel dehn weh Ai tel yu fi seh.ʼ

Baylam gaahn da Moawab pan ih dongki. Hihn mi plan fi kers di Izrelaits, eevn doa Jehoava tel ahn noh fi du it. Soh Jehoava aynjel apyaa pahn di road chree taimz. Baylam mi kyaahn si di aynjel, bot ih dongki kuda mi si ahn. Fers, di dongki mi get aafa di road ahn ron eena di bush. Den, di dongki gaahn kloas tu wahn waal an ih mash Baylam fut gens di waal. Fainali, di dongki lidong midl a di road. Dehndeh chree taim, Baylam mi beet ih dongki wid wahn stik.

Afta di dongki si di aynjel di terd taim, Jehoava mek di dongki staat tu taak. Di dongki mi aks Baylam: ‘Wai yu di beet mi op?ʼ Baylam ansa ahn: ‘Bikaaz yu mek Ah luk laik wahn fool! If Ah mi ga wahn soad, Ah mi wahn don kil yu.ʼ Di dongki tel ahn: ‘Yu raid pahn mi yu hoal laif. Ai eva du yoo sohnting laik dis bifoa?ʼ

Den Jehoava mi mek Baylam si di aynjel. Di aynjel tel ahn: ‘Jehoava mi waan yu fi noh kers Izrel.ʼ Baylam seh: ‘Ah du rang. Ah gwehn bak hoam.ʼ Bot di aynjel tel ahn: ‘If yu goh da Moawab, yu ku onli seh weh Jehoava tel yu fi seh.ʼ

Yu tink Baylam mi laan ih lesn? No. Kaaz rait afta dat, Baylam mi chrai kers Izrel chree taimz. Bot insteda kers dehn, eech taim Jehoava mek ih bles dehn. Di Izrelaits mi en op di atak Moawab, ahn dehn kil Baylam. Baylam shuda mi lisn tu Jehoava eena di fers plays, noh chroo?