Jashwa ahn di Peepl Fahn Gibiyon

Di ada nayshan dehn da Kaynan mi hyaa bowt weh hapm da Jeriko. Di king dehn fahn dehndeh nayshan mi plan fi jain op tugeda fi fait gens di Izrelaits. Bot di peepl fahn Gibiyon mi ga wahn difrent plan. Dehn put aan oal kloaz weh mi wayr owt, ahn dehn gaahn si Jashwa ahn tel ahn: ‘Wi kohn fahn wahn faar plays. Wi hyaa bowt aal weh Jehoava mi du fi unu da Eejip ahn Moawab. If unu pramis fi noh atak wi, wi wahn bee unu servant.ʼ

Jashwa mi bileev dehn an ih pramis fi noh atak dehn. Chree dayz layta, hihn mi fain owt dat dehn neva kohn fahn wahn faar plays. Dehn da-mi fahn di lan a Kaynan. Jashwa aks di peepl fahn Gibiyon: ‘Wai unu lai tu wi?ʼ Dehn ansa ahn: ‘Wee mi frayd! Wi noa dat Jehoava unu Gaad di fait fi unu. Pleez noh kil wi.ʼ Jashwa mi kip ih pramis an ih neva hert dehn.

Sohn taim afta dat, faiv king fahn Kaynan ahn dehn soaljaz gaan atak di man dehn fahn Gibiyon. Den Jashwa an ih soalja dehn mi maach aal nait fi reskyu di man dehn fahn Gibiyon. Dehn staat tu fait erli di neks maanin. Di Kaynanait dehn staat tu ron difrent dairekshan, bot Jehoava mi mek sohn big haylstoan jrap pahn dehn. Den Jashwa aks Jehoava fi mek di son stay weh ih mi deh. Dat mi neva hapm bifoa. Wai yu tink Jashwa mi aks Jehoava fi du dat? Bikaaz hihn mi chros eena Jehoava. Di son mi stay owt fi wahn hoal day til di Izrelait dehn mi kanka di king dehn fahn Kaynan ahn dehn aami.