Di Wariya ahn di Lee Gyal

Da Siriya, dehn mi ga wahn lee Izrelait gyal weh mi deh faar fahn hoam. Di aami fahn Siriya mi tek ahn weh fan ih famili, soh shee da-mi di servant a di aami cheef waif. Fi hihn naym da-mi Nayman. Di lee gyal mi wership Jehoava, eevn doa di peepl rong ahn neva yoostu wership Ahn.

Nayman mi ga wahn terabl skin dizeez, ahn hihn mi aalwayz ga payn. Di lee gyal mi reeli waahn help ahn, soh shee tel Nayman waif: ‘Ai noa sombadi weh ku kyoar yu hozban. Da Izrel, dehn ga wahn prafit a Jehoava weh naym Ilaisha. Hihn ku help yu hozban.ʼ

Nayman waif mi tel Nayman weh di lee gyal seh. Hihn mi wilin fi chrai eniting fi geh kyoar, soh ih gaahn da Ilaisha hows da Izrel. Nayman mi ekspek Ilaisha fi welkom ahn az wahn impoatant persn. Bot Ilaisha neva gaahn greet ahn, insted ih sen ih servant wid wahn mesij: ‘Goh dip yuself eena di Jaadn Riva sevn taimz. Den yu wahn geh kyoar.ʼ

Nayman neva laik dat. Hihn mi seh: ‘Ai mi tink dis prafit wuda kyoar mi ahn kaal pan ih Gaad ahn moov op ih han aal kaina way oava mi. Bot ih tel mi fi goh da da riva eena Izrel. Wee ga beta riva da Siriya. Wai Ah kyaahn goh dip miself eena wan a dehndeh riva insted?ʼ Nayman mi geh beks bad, soh ih lef Ilaisha hows.

Nayman servants mi help ahn fi tink gud bowt weh ih wahn du. Dehn tel ahn: ‘Yu neva mi wahn du eniting fi geh kyoar? Da wahn eezi ting weh di prafit di tel yu fi du. Wai yu noh jos goh dip yuself eena di riva?ʼ Nayman mi lisn tu dehn. Hihn gaan eena di Jaadn Riva an ih dip eena di waata sevn taimz. Afta di sevent taim, Nayman kom owta di waata an ih skin mi heel. Hihn mi graytful dat ih geh heel, soh ih gaahn bak gaahn tank Ilaisha. Nayman mi seh: ‘Now Ai noa dat Jehoava da di chroo Gaad.ʼ How yu tink di lee Izrelait gyal mi feel wen ih si Nayman kohn bak hoam?