Ilizabet Ga Wahn Baybi

Da mi don 400 yaaz sins dehn mi bil bak di waal dehn da Jeroosalem. Wahn prees weh naym Zakaraiya an ih waif, Ilizabet, mi liv kloas tu Jeroosalem. Dehn mi marid fi wahn lang taim, bot dehn neva ga no chiljren. Wahn day wen Zakaraiya mi-di aafa insens da di templ, di aynjel Gaybral apyaa tu ahn. Zakaraiya mi fraitn, bot Gaybral tel ahn: ‘Noh bee frayd. Ai di bring gud nyooz fahn Jehoava. Yu waif, Ilizabet, wahn ga wahn son ahn yu fi naym ahn Jan. Jehoava chooz Jan fi wahn speshal werk.ʼ Zakaraiya aks ahn: ‘How Ai ku noa dat dis wahn kohn chroo? Mee ahn mi waif don tu oal fi ga pikni.ʼ Gaybral tel ahn: ‘Da Gaad sen mi fi tel yu dis gud nyooz. Bot bikaaz yu neva bileev mi, yu wahn kyaahn taak til di baybi baan.ʼ

Zakaraiya mi-di tek lang eena di templ. Ahn wen ih fainali kom owtsaid, di peepl mi-di wanda weh hapm. Zakaraiya kudn taak, ih kuda mi onli yooz sain. Den di peepl riyalaiz dat ih geh wahn mesij fahn Gaad.

Afta sohn taim, Ilizabet mi geh pregnant an ih mi ga wahn lee baybi bwai, jos laik weh di aynjel mi seh. Fi shee frenz ahn famili gaahn si di baybi, ahn dehn mi hapi fi shee. Ilizabet tel dehn: ‘Ih naym wahn bee Jan.ʼ Dehn seh: ‘Bot nobadi eena yu famili naym Jan. Naym ahn afta ih pa, Zakaraiya.ʼ Zakaraiya mi aks fi sohnting fi rait pan, an ih rait: ‘Di baybi wahn naym Jan.ʼ Da sayhn taim, ih kuda mi taak agen! Evribadi da Judeeya mi hyaa bowt di baybi, ahn peepl mi-di wanda: ‘Weh dis chail wahn groa op fi bee?ʼ

Gaad mi gi hoali spirit tu Zakaraiya. Den Zakaraiya staat tu prafesai: ‘Prayz Jehoava. Hihn mi pramis Aybraham dat ih wahn sen wahn sayvya, di Mesaiya, fi reskyu wi. Ahn Jan wahn bee wahn prafit weh wahn mek di way redi fi di Mesaiya.ʼ

Sohnting speshal mi aalso hapm tu Ilizabet relitiv, Mayri. Mek wi fain owt bowt dat eena di neks lesn.