Peeta Disoan Jeezas

Wen Jeezas mi deh wid ih apasl dehn eena wahn opstayz room di eet dehn laas meel tugeda, ih tel dehn: ‘Aala unu wahn ron ahn lef mi tunait.ʼ Peeta seh: ‘Noh mee! Eevn doa aala dehn wahn ron lef yu, Ai wahn neva lef yu.ʼ Bot Jeezas tel Peeta: ‘Bifoa wahn roosta kroa, yu wahn don seh chree taimz dat yu noh noa mi.ʼ

Wen di soaljaz kehr Jeezas da di hows a Kaiyafas, moas a di apasl dehn mi don lef bai den. Bot too a dehn mi-di fala eena di krowd. Wan a dehn da-mi Peeta. Hihn mi gaan eena di koatyaad a Kaiyafas hows fi waam ihself bai di faiya. Wen Peeta kohn bai di lait, wahn servant gyal si ih fays ahn seh: ‘Ai noa yoo! Yoo mi deh wid Jeezas!ʼ

Peeta seh: ‘No, da noh mee! Ai noh noa weh yoo di taak bowt!ʼ Den ih gaahn tuwaadz di gayt. Bot wahn nada servant gyal si ahn, an ih tel di krowd: ‘Dis man mi deh wid Jeezas!ʼ Peeta seh: ‘Ai noh eevn noa Jeezas!ʼ Wahn man seh: ‘Yes, yoo da wan a dehn! Jos bai di way yoo taak, Ai ku noa dat yoo da fahn Gyalilee laik Jeezas.ʼ Bot Peeta swayr: ‘Ai noh noa hihn!ʼ

Da saym taim deh, wahn roosta mi kroa. Peeta si Jeezas ton ahn wach ahn. Ih memba weh Jeezas mi seh, an ih gaan owtsaid ahn baal.

Meenwail, di Jooish Sopreem Koat mi agree fi put Jeezas pahn chraiyal wen dehn mi deh da Kaiyafas hows. Dehn mi don mek op dehn main fi kil Jeezas, ahn now dehn mi jos need wahn gud reezn. Bot dehn kudn fain notn gens ahn. Fainali, Kaiyafas aks Jeezas: ‘Yoo da di Son a Gaad?ʼ Jeezas tel ahn: ‘Yes, Ai da di son a Gaad.ʼ Kaiyafas mi seh: ‘Wi noh need nohmoh evidens. Hihn di taak gens Gaad!ʼ Di koat agree ahn seh: ‘Dis man dizerv fi ded.ʼ Dehn slap Jeezas, spit pan ahn, kova ih aiy dehn, ahn ponch ahn. Den dehn tel ahn: ‘If yoo da wahn prafit fi chroo, tel wi da hoo ponch yu!ʼ

Di neks day, dehn kehr Jeezas da di haal wehpaat di Jooish kongsl dehn meet ahn dehn aks ahn agen: ‘Yoo da di son a Gaad?ʼ Jeezas ansa dehn: ‘Unu saym wan di seh da mee.ʼ Den dehn fain ahn gilti a di taak gens Gaad ahn dehn kehr ahn da di palis a Ponchos Pailat, hoo da di Roaman govna. Da weh mi hapm afta dat? Mek wi fain owt.