FI WEE PLANET KU SERVAIV?
FRESH WAATA
IH NEVA mi wahn pasabl fi liv pahn di ert if wi neva ga waata, espeshali fresh waata. In fak, di bigis paat weh mek op evri livin ting da waata. Hyoomanz an animalz geh waata fi jrink fahn di layk dehn, di riva dehn, di swamp dehn, an eevn fahn anda di grong. Ahn wi ku eevn yooz da waata fi wet wi plaants.
Wai Wi Mait Noh Gat Inof Fresh Waata
Eevn doa waata kova op moas a wi planet, di World Meteorological Organization seh dat onli 0.5% a di waata weh deh pahn Ert da fresh waata weh wi ku yooz. Da lee amonk a waata shuda bee inof fi mek wi ku liv pahn ert. Bot sayka how di weda chaynj ahn sayka weh peepl need moa ahn moa waata, wi eeda kyaahn get it er ih tu doti fi yooz. Sohn ekspert seh dat eena 30 yaaz, faiv bilyan peepl wahn kyaahn get inof fresh waata.
Wi Planet Mek fi Servaiv
Di ert mek eena wahn way soh dat wi ku aalwayz ga inof waata. Di soil, livin tingz eena di waata, ahn sonlait werk tugeda fi kleen op wi waata. Di way how wi planet dizain proov dat ih wahn servaiv. Mek wi luk pahn sohn egzampl:
Soil ku help geh rid a tingz weh doti op waata. Eena sohn swampi ayrya, sertn plaants ku geh rid a naichrojen ahn fosforos. Dehn kud aalso geh rid a kemikalz weh kil sohn livin tingz eena di waata.
Sohn saiyentis fain owt bowt di difrent proases dehn eena naycha weh kip waata kleen. Wen waata floa faas, ih brok dong di daynjaros tingz weh deh eena di waata ahn den bakteerya help fi geh rid a dehn.
Eena jos wahn kopl dayz, klam ahn mosl weh deh eena fresh waata ku geh rid a sohn kemikal eena waata weh ku bee veri daynjaros. In fak, dehn praabli du wahn beta jab dan wahn waata chreetment fakchri.
Fi wee planet yooz di waata saikl fi stoar waata. Dis saikl ahn wahn lata ada nachral saikl mek shoar dat wi waata neva disapyaa.
Weh Hyoomanz Di Du fi Chrai Solv di Prablem?
Wee help kip wi fresh waata kleen wen wi fiks eni ail leek pahn wi veekl ahn wen wi geh rid a medisn ahn paiznos kemikalz di prapa way
Sohn ekspert tel wi dat wi mos mek shoar dat wi noh ways no waata. An if wi waahn help loawa waata polooshan, dehn rekomen dat wi fiks eni ail leek pahn wi veekl, dat wi stap flosh medisn dong di tailit, ahn dat wi stap poar paiznos kemikal dong di sink.
Sohn peepl kom op wid sohn nyoo an amayzin way fi tek owt saalt fahn see waata. Fi dehn goal da fi mek peepl ga moa fresh waata fi jrink.
Bot peepl need fi du moa dan dat, bikaaz ih kaas tu moch moni an ih yooz tu moch enerji fi tek owt saalt fahn see waata. Soh da stil noh di bes solooshan. Eena 2021, di United Nations mi rait op wahn ripoat bowt how fi protek jrinkin waata. Di ripoat mi seh: “Aal rong di werl, peepl need fi werk too taimz haada soh dat jrinkin waata ku bee kleen an avaylabl.”
Wai Wi Ku Ga Hoap—Weh di Baibl Seh
“Gaad . . . mek sohn lee jrap a waata weh nobadi ku si goh op, ahn dehn ton intu sohn klowd. Den waata poar owt fahn di klowd dehn, ahn di rayn kohn dong pahn di peepl.”—Job 36:26-28.
Gaad mi kriyayt di nachral saikl dehn fi protek waata pahn di ert.—Ecclesiastes 1:7.
Tink bowt dis: If di Kriyayta mi dizain di ert fi kip wi waata kleen, yu noh tink dat hihn ku fiks di damij weh hyoomanz kaaz tu fresh waata? Chek owt di aatikl weh naym “Gaad Pramis Wi Dat Wi Planet Wahn Servaiv,” pahn payj 15.