Aybraham ahn Saara Mi Obay Gaad

Dehn mi ga wahn siti weh neva tu faar fahn Baybel, ih mi naym Er. Di peepl weh mi liv deh neva wership Jehoava. Insted, dehn mi wership ada gaadz. Bot dehn mi ga wahn man da Er weh mi wership onli Jehoava. Hihn mi naym Aybraham.

Jehoava mi tel Aybraham: ‘Lef yu hows ahn yu relitiv dehn, ahn goh da di plays weh Ah wahn shoa yu.ʼ Den Gaad pramis ahn: ‘Yu wahn bee wahn big nayshan, an Ah wahn du gud tingz fi lata peepl aal oava di ert bikaaz a yoo.ʼ

Aybraham neva reeli noa wehpaat Jehoava mi-di sen ahn, bot hihn mi chros Jehoava. Soh Aybraham, ih waif Saara, ih pa Teera, an ih nefyu Lat mi pak op dehn tingz ahn staat dehn lang chrip.

Aybraham mi 75 yaaz oal wen hihn an ih famili mi fainali reech di plays weh Jehoava mi waahn shoa dehn. Da plays da-mi di lan a Kaynan. Den Gaad apyaa tu Aybraham ahn pramis ahn: ‘Ai wahn gi aala dis lan weh yu si rong yu tu yu chiljren.ʼ Bot Aybraham ahn Saara mi don oal ahn neva ga no chiljren. Soh how Jehoava wuda mek ih pramis kohn chroo?