Dehn Neva Kip Dehn Pramis

Jehoava mi tel Moaziz: ‘Kom op pahn di mongtin. Ah wahn rait dong mi laaz pahn sohn stoan tablet an Ah wahn gi dehn tu yu.ʼ Moaziz gaan op di mongtin an ih stay deh fi 40 dayz ahn 40 naits. Wail ih mi dehdeh, Jehoava mi rait di Ten Komanment dehn pahn too stoan tablet an ih gi dehn tu Moaziz.

Afta sohn taim, di Izrelaits mi tink dat Moaziz gaahn lef dehn. Soh dehn tel Ayron: ‘Wi waahn sohnbadi fi leed wi. Mek wahn gaad fi wi!ʼ Ayron tel dehn: ‘Bring mi aala unu goal.ʼ Hihn mi melt di goal an ih mek wahn stachu weh luk laik wahn kyaaf. Di peepl mi seh: ‘Dis kyaaf da wi Gaad weh bring wi owta Eejip!ʼ Dehn staat tu wership di kyaaf weh mek owta goal, ahn dehn staat tu selibrayt. Yu tink dat mi rang? Af koars ih mi rang! Di peepl mi pramis fi wership onli Jehoava. Bot now dehn noh di kip dehn pramis.

Jehoava si weh mi-di hapm, an ih tel Moaziz: ‘Goh dong tu di peepl. Dehn noh di obay mi ahn dehn di wership wahn faals gaad.ʼ Moaziz gaahn dong di mongtin wid di too flat stoan.

Az Moaziz mi reech kloasa tu di kyamp, ih hyaa di peepl dehn di sing. Den ih si dehn di daans ahn di bow dong fronta di kyaaf. Moaziz mi geh beks bad. Ih chroa di flat stoan dehn pahn di grong, ahn dehn brok intu peesiz. Hihn mi dischrai di stachu rait away. Den Moaziz aks Ayron: ‘How dehnya peepl kanvins yu fi komit dis terabl ting?ʼ Ayron tel ahn: ‘No geh beks, yoo noa how dehnya peepl stan. Dehn mi waahn wahn gaad. Soh Ah chroa dehn goal eena di faiya, ahn dis stachu weh luk laik wahn kyaaf kom owt!ʼ Ayron shuda mi neva du dat. Moaziz gaahn bak op di mongtin an ih beg Jehoava fi fergiv di peepl.

Jehoava mi fergiv di Izrelaits weh mi wilin fi obay ahn. Soh ih mi veri impoatant dat dehn obay Jehoava ahn Moaziz, noh chroo?