Hana Pray fi Wahn Son

Wahn Izrelait man weh naym Elkayna mi ga too waif, Hana ahn Penina, bot hihn mi lov Hana moa. Penina mi ga lata pikni, bot Hana neva ga non. Dats wai Penina yoostu teez op Hana. Evri yaa, Elkayna mi kehr ih famili fi wership Jehoava da di tabernakl da Shailo. Wahn taim, wen dehn mi deh da di tabernakl, hihn mi noatis dat ih dyaa Hana mi veri sad. Hihn mi tel ahn: ‘Pleez noh krai, Hana. Ai deh ya fi yu, an Ai lov yu.ʼ

Afta wahn wail, Hana gaahn sohn way bai ihself fi pray. Shee kudn stap krai an ih beg Jehoava fi help ahn. Shee mek wahn pramis tu Jehoava ahn seh: ‘Jehoava, if yu gi mi wahn son, Ah wahn giv ahn tu yoo, an ih wahn serv yu az lang az ih liv.ʼ

Hai Prees Eelai mi si Hana di krai, an ih mi tink dat shee mi jronk. Hana tel ahn: ‘No, mi laad, Ah noh jronk. Ah jos schres owt, an Ah deh ya di poar owt mi haat tu Jehoava.ʼ Eelai riyalaiz dat hihn mi rang, soh ih tel ahn: ‘Ah hoap Gaad gi yu weh yu di pray fa.ʼ Afta dat, Hana mi feel beta ahn shee gaahn fahn deh. Afta sohn monts paas, shee mi ga wahn son, an ih naym ahn Samwel. Yoo ku imajin how hapi Hana mosi mi hapi?

Hana neva did ferget di pramis ih mek tu Jehoava. Az soon az Samwel mi stap bresfeed, Hana mi kehr ahn fi serv da di tabernakl. Shee tel Eelai: ‘Dis da di lee bwai weh Ah mi-di pray fa. Hihn wahn bilangz tu Jehoava fi di res a ih laif.ʼ Evri yaa, Elkayna ahn Hana mi vizit Samwel ahn dehn kehr ahn wahn nyoo koat wid no sleev. Jehoava mi gi Hana chree moa son ahn too daata.