Josaiya Mi Lov Gaad Laa

Josaiya mi ayt yaaz oal wen ih mi ton king a Jooda. Joorin da taim, di peepl yoostu praktis majik ahn wership aidol. Wen Josaiya mi 16 yaaz oal, ih mi waahn laan how fi wership Jehoava di rait way. Ahn wen ih mi 20 yaaz oal, ih staat tu dischrai di aidol an alta dehn eena di lan. Den wen ih mi 26 yaaz oal, ih mi mek dehn fiks op bak Jehoava templ.

Eena di templ, di hai prees, Hilkaiya, mi fain di skroal weh mi gat een Jehoava Laa. Maybi da skroal da-mi di saym wan weh Moaziz mi rait. Di king sekiteri weh naym Shayfan mi kehr di skroal tu Josaiya an ih staat tu reed di Laa eena wahn lowd vais. Az Josaiya mi-di lisn, ih riyalaiz dat di peepl neva mi-di obay Jehoava fi wahn lata yaaz. King Josaiya mi koman Hilkaiya: ‘Goh taak tu Jehoava kaaz ih beks wid wi. Hihn wahn tel wi weh wi sopoas tu du.ʼ Jehoava mi yooz di prafit Holda fi tel dehn: ‘Di peepl fahn Jooda ton dehn bak pahn mi. Dehn wahn geh ponish bot noh wail Josaiya di rool, bikaaz hihn mi hombl ihself.ʼ

Wen King Josaiya mi hyaa di mesij, ih gaahn da di templ an ih gyada aala di peepl a Jooda tugeda. Den ih reed di Laa a Jehoava tu di hoal nayshan. Josaiya ahn di peepl mi pramis fi obay Jehoava wid aala dehn haat.

Di nayshan a Jooda neva selibrayt di Paasoava fi lata yaaz. Bot Josaiya mi reed eena di Laa dat dehn shuda selibrayt di Paasoava evri yaa. Soh ih tel di nayshan: ‘Wi wahn ga wahn Paasoava fi Jehoava.ʼ Den Josaiya mi pripyaa fi mek lata sakrifais ahn fi ga wahn groop a singaz da di templ. Soh di nayshan mi ga di Paasoava, den dehn mi ga di Festival a Bred Widowt Ees, weh mi laas fi sevn dayz. Dehn neva ga wahn Paasoava laik dat sins di taim a Samwel. Josaiya mi reeli lov Gaad Laa. How bowt yoo? Yoo laik laan bowt Jehoava?