Jeezas Apyaa tu di Fishaman Dehn

Sohn taim afta Jeezas mi apyaa tu di apasl dehn, Peeta mi gaahn fishin da di See a Gyalilee. Tamas, Jaymz, Jan, ahn som ada disaipl mi deh wid ahn. Dehn mi gaahn fishin aal nait bot dehn neva kech notn.

Erli di neks maanin, dehn si wahn man di stan op bai di seeshoar. Hihn hala fahn deh an aks dehn: ‘Unu kech eni fish?ʼ Dehn tel ahn: “No, wi noh ga notn.” Di man tel dehn: “Chroa een unu net pahn di rait said a di boat.” Wen dehn mi du dat, di net geh ful op wid soh moch fish dat dehn kudn eevn haal it pahn di boat. Jan riyalaiz dat di man da-mi Jeezas, an ih seh: “Da di Laad!” Kwik-ting, Peeta jomp eena di waata ahn swim tu di shoar. Di ada disaipl dehn mi fala ahn eena di boat.

Wen dehn reech da di beech, dehn si sohn bred ahn fish di kuk pahn di faiya. Jeezas tel dehn fi bring som a di fish weh dehn mi jos kech fi kuk tu. Den ih tel dehn: ‘Unu kohn kohn eet wid mi.ʼ

Afta dehn finish eet, Jeezas aks Peeta: ‘Yoo lov mee moa dan fishin?ʼ Peeta ansa ahn: ‘Af koars, Laad, yu noa Ah lov yu.ʼ Jeezas tel ahn: ‘Den feed mi lee sheep dehn.ʼ Jeezas aks ahn agen: ‘Peeta, yoo reeli lov mi?ʼ Peeta tel ahn: ‘Yes, Laad Ah reeli lov yu.ʼ Jeezas tel ahn: “Den leed mi lee sheep dehn di way wahn shepad wuda leed dehn.” Jeezas aks ahn wahn terd taim, ahn Peeta mi reeli feel sad. Peeta tel ahn: ‘Laad yoo noa evriting. Yu noa dat Ah reeli lov yu.ʼ Jeezas tel ahn: “Feed mi lee sheep dehn.” Afta dat ih tel Peeta: “Kantinyu fi fala mi.”