Notn Kuda Mi Stap Dehn

Wahn man weh kudn waak mi sidong da di templ gayt an ih wuda beg peepl evriday. Wahn aftanoon, hihn si Peeta ahn Jan di goh eena di templ. Soh ih tel dehn: ‘Pleez gi mi sohnting.ʼ Peeta tel ahn: ‘Ah gat sohnting beta dan moni fi gi yu. Eena di naym a Jeezas, get op ahn waak!ʼ Den Peeta help ahn get op, ahn di man staat tu waak! Di krowd a peepl mi soh eksaitid bowt weh mi hapm dat moa peepl staat tu bileev eena Jeezas.

Bot di prees ahn Sadyusee dehn mi geh beks bad. Dehn grab di apasl dehn ahn kehr dehn da koat, an aks dehn: ‘Da hoo giv unu di powa fi heel dis man?ʼ Peeta tel dehn: ‘Wee geh di powa fahn Jeezas Krais, di wan weh unu kil.ʼ Di rilijos leedaz hala aata dehn: ‘Unu stap taak bowt Jeezas!ʼ Bot di apasl dehn seh: ‘Wee haftu taak bowt hihn. Wi noh wahn stap.ʼ

Az soon az Peeta ahn Jan geh rilees, dehn gaahn da di ada disaipl dehn ahn tel dehn evriting weh mi hapm. Den dehn staat tu pray tugeda, ahn dehn aks Jehoava: ‘Pleez help wi fi ga di korij soh wi ku kantinyu fi du yu werk.ʼ Jehoava gi dehn ih hoali spirit, ahn dehn mi kantinyu fi preech ahn heel peepl. Moa ahn moa peepl mi-di staat tu bileev eena Jeezas. Di Sadyusee dehn mi soh jelos dat dehn ares di apasl dehn ahn chroa dehn eena jayl. Bot joorin di nait, Jehoava mi sen wahn aynjel, hoo mi oapm op di prizn doa an ih tel di apasl dehn: ‘Goh bak da di templ ahn teech.ʼ

Di neks maanin, di gyaad dehn tel di Jooish Sopreem Koat: ‘Di jayl stil lak, bot di man dehn weh unu ares gaahn! Dehn deh da di templ di teech!ʼ Dehn ares di apasl dehn agen ahn kehr dehn bak da di Jooish Sopreem Koat. Di hai prees tel dehn: ‘Wi mi don tel unu aredi fi stap taak bowt Jeezas!ʼ Bot Peeta tel dehn: “Wi haftu obay Gaad az fi wee roola insteda man.”

Di rilijos leedaz mi soh beks dat dehn mi waahn kil di apasl dehn. Bot wahn Farisee weh mi naym Gamalyel stan op ahn seh: ‘Unu bee kyaaful! Gaad mosi deh wid dehnya man fi chroo. Unu reeli waahn fait gens Gaad?ʼ Di rilijos leedaz mi lisn tu ahn. Afta dehn mi beet di apasl dehn wid sohn stik, dehn let dehn goh. Ahn dehn mi aada dehn wan moa taim fi stap preech. Bot dat neva mek di apasl dehn stap. Dehn mi kantinyu fi preech wid korij eena di templ ahn fahn hows tu hows.