Wahn Jayla Laan di Chroot

Da Filipai, dehn mi ga wahn slayv gyal weh mi gat wahn deemon eena ahn. Di deemon yoostu help di gyal pridik di fyoocha, ahn wen ih mi du dat, shee wuda mek lata moni fi ih maasta dehn. Wen Paal ahn Sailas gaahn da Filipai, shee fala dehn rong fi sohn dayz. Di deemon mek ih hala: “Dehnya man da di slayv a di Moas Hai Gaad.” Fainali, Paal tel di deemon: ‘Eena di naym a Jeezas, kom owta dis gyal!ʼ Di deemon lef di gyal.

Wen di gyal maasta dehn riyalaiz dat shee wahn kyaahn mek nohmoh moni fi dehn, dehn mi geh beks bad. Soh dehn jreg Paal ahn Sailas tu di majischrayt dehn, ahn dehn tel dehn: ‘Dehnya man di brok di laa ahn dehn di kaaz chrobl eena di siti!ʼ Di majischrayt dehn gi di aada fi mek dehn beet Paal ahn Sailas ahn chroa dehn eena jayl. Di jayla chroa dehn da di deepis, daakis paat a di prizn an ih put dehn fut bitween sohn hevi blak a wud.

Paal ahn Sailas mi-di prayz Jehoava wid sang, wail di ada priznaz mi-di lisn tu dehn. Aal af a sodn, midl a di nait, wahn schrang ertkwayk shayk op di prizn fahn tap tu batam. Aala di prizn doa dehn mi oapm op, ahn di chayn dehn fahn di priznaz kom aaf. Di jayla ron eensaida di prizn an ih si aala di doa dehn oapm waid. Bikaaz hihn mi tink dat aala di prizna dehn mi don ron weh, ih haal owt wahn soad an ih mi redi fi kil ihself.

Saym taim, Paal hala ahn seh: ‘Noh hert yuself! Evribadi deh ya!ʼ Di jayla ron een ahn neel dong fronta Paal ahn Sailas. Ih aks dehn: “Weh Ah need fi du fi get sayv?” Dehn tel ahn: ‘Yoo an evribadi eena yu famili need fi bileev eena Jeezas.ʼ Soh Paal ahn Sailas mi teech dehn bowt Jehoava, den di jayla an ih hoal famili geh baptaiz.