Dehn Sen Paal da Roam

Afta Paal mi finish preech da Jeroosalem fi di terd taim, dehn mi ares ahn an chroa ahn eena prizn. Wahn nait, Jeezas tel Paal eena wahn vizhan: ‘Yu gwehn da Roam ahn yu wahn preech deh.ʼ Dehn kehr Paal fahn Jeroosalem tu Seezareeya, ahn hihn mi deh da jayl fi too yaaz. Wen dehn mi kehr ahn fronta Govna Festos fi joj ahn, Paal seh: ‘Mek Seeza joj mi da Roam.ʼ Festos seh: “Wel, if da Seeza yu waahn goh tu, den da Seeza wahn joj yu.” Soh dehn mi put Paal pahn wahn ship weh mi-di goh da Roam, ahn too a ih Kristyan bradaz, Look an Aristarkos gaahn lang wid ahn.

Wen dehn mi deh da see, wahn bad staam mi staat an ih mi laas fi dayz. Evribadi mi tink dat dehn mi wahn ded. Bot Paal tel dehn: ‘Mi frenz, wahn aynjel mi tel mi eena wahn jreem: “Noh frayd, Paal. Yu wahn reech da Roam, an evribadi weh deh pahn di ship wid yu wahn bee sayf.” Unu fi tek korij! Wi noh wahn ded.ʼ

Di staam mi kantinyu fi 14 dayz, til fainali dehn si lan. Di ailan da-mi Malta. Di ship mi geh stok eena di shalo waata an ih brok op tu peesiz. Bot di 276 peepl weh mi deh pahn di ship, mek it sayf tu lan. Som a dehn mi swim, ahn som a dehn mi float pahn sohn peesiz a di ship weh mi brok aaf fi mek dehn reech di shoar. Di peepl da Malta mi tek kayr a dehn ahn dehn mi mek wahn faiya fi kip dehn waam.

Chree monts layta, di soalja dehn kehr Paal da Roam pahn wahn nada ship. Wen ih reech deh, di bradaz mi gaahn meet ahn. Az ih si dehn, Paal tank Jehoava an ih mi geh korij. Eevn doa Paal da-mi wahn prizna, dehn mi alow ahn fi liv da wahn hows weh ih rent wail wahn soalja mi gyaad ahn. Ih mi stay deh fi too yaaz. Weneva peepl wuda goh si ahn, hihn wuda preech tu dehn bowt Gaad Kingdom ahn bowt Jeezas Krais. Paal mi aalso rait letaz tu di kangrigayshan dehn da Aysha Maina ahn Judeeya. Ih klyaa fi si dat Jehoava mi yooz Paal fi spred di gud nyooz tu ada nayshanz.