Wahn Leta Fahn di Govanin Badi

Dyaa Bradaz ahn Sistaz:

Aala wi weh wership Jehoava, lov fi hihn Werd, di Baibl. Wi kanvins dat wi ku chros di hischri eena di Baibl, dat wi ku fain gud advais, ahn dat wi ga proof dat Jehoava reeli lov peepl. (Saam 119:105; Look 1:3; 1 Jan 4:19) Wi reeli waahn adaz laan di preshos chroots weh deh eena Gaad Werd. Bikaaz a dat, wee di Govanin Badi, hapi fi mek dis buk weh naym Laan Fahn Peepl Eena di Baibl avaylabl tu evribadi. Soh mek wi tel unu moa bowt it.

Wi mek dis buk espeshali fi help chiljren. Bot ih ku aalso help adolts weh waahn laan moa bowt di Baibl. Ahn sins di Baibl da fi evribadi, fi shoar aala wi wahn benifit fahn di lesn dehn weh wi fain eena it. Dat wahn help wi fi bee reeli hapi.

Dis buk yooz di akonk dehn fahn di Baibl fi tel wi bowt di hischri a di hyooman famili fahn di taim Gaad staat tu mek evriting. Ih mi tek wahn lata efoat fi mek dehnya Baibl stoari bee eezi fi andastan ahn fi put dehn eena di aada a wen dehn mi akchwali hapm.

Dis da noh wahn aadineri stoari buk. Yu wahn noatis dat ih aalso ga lata pichaz. Dat wahn help wi fi mek di akonk dehn bee reel tu wi, an ih wahn help wi fi andastan how di peepl eena dehndeh stoari mi feel.

Dis poblikayshan help wi fi si dat di Baibl da wahn buk weh taak bowt peepl weh mi obay Jehoava ahn peepl weh neva obay ahn. An ih help wi fi laan fahn fi dehn egzampl. (Roamanz 15:4; 1 Korintyanz 10:6) Dis buk ga 14 sekshan. Da di biginin a eech sekshan yu wahn si wahn somari weh bring owt weh wi ku laan fahn da sekshan.

If yu ga chiljren, reed wahn lesn wid dehn ahn taak bowt di pichaz eena da lesn. Den unu ku reed di skripchaz weh di lesn bays pan. Help yu chiljren fi si dat evriting weh dehn laan fahn da lesn bays pahn di Baibl. Yu ku fala da saym metod wen yu di help wahn adolt fi geh wahn jenaral aidyaa a di Baibl.

Wi hoap dat dis poblikayshan help obeedyant peepl fi laan fahn Gaad Werd ahn yooz weh dehn laan eena dehn laif, noh mata if dehn yong er oal. Dis wahn ku help dehn fi wership Jehoava ahn bee paat a fi hihn wandaful famili.