LESN 32
Gaad Kingdom Don Di Rool!
Gaad Kingdom staat rool da hevn eena 1914, ahn dat da wen di laas dayz a hyooman roolaship mi staat. How wi noa dat? Mek wi luk pahn weh di Baibl prafesai, pahn weh di hapm eena di werl, ahn pahn how peepl di goh aan sins 1914.
1. Weh di Baibl prafesai?
Eena di buk a Daniel, di Baibl seh dat Gaad Kingdom mi wahn staat rool da di en a wahn peeryad a taim weh ih kaal “sevn taimz.” (Daniel 4:16, 17) Honjridz a yaaz layta, Jeezas mi kaal da saym peeryad a taim “di set taimz a di nayshanz,” ahn hihn mi seh dat da taim neva en yet. (Look 21:24) Eena dis lesn, wi wahn laan dat di sevn taimz mi en eena 1914.
2. Weh di hapm eena di werl, ahn how peepl di goh aan sins 1914?
Jeezas disaipl dehn mi aks ahn: “Wat wahn bee di sain dat yu kohn bak fi deh wid wi? Ahn wat wahn bee di sain a di en a di sistem a tingz?” (Machyu 24:3) Jeezas mi seh dat wahn lata tingz mi wahn hapm afta hihn staat rool az King a Gaad Kingdom da hevn. Hihn mi prafesai dat tingz laik waar, famin, an ertkwayk mi wahn hapm. (Reed Machyu 24:7.) Di Baibl mi aalso seh dat “laif wahn bee haad” bikaaz a di way peepl di bihayv eena “di laas dayz.” (2 Timoti 3:1-5) Wi ku si dehnya tingz di hapm moa ahn moa fahn 1914 aan.
3. Wai tingz geh soh bad eena di werl eva sins Gaad Kingdom staat rool?
Lee bit afta Jeezas mi staat rool az King a Gaad Kingdom, hihn mi fait wahn waar gens Saytan an ih deemon dehn da hevn. Saytan mi looz da waar. Di Baibl seh dat Jeezas mi “chroa [hihn] an ih aynjel dehn dong tu di ert.” (Revilayshan 12:9, 10, 12) Saytan beks bad bikaaz hihn wel noa dat ih wahn soon geh dischrai. Soh hihn di kaaz lata payn ahn sofarin aal rong di ert. Noh wanda di sichuwayshan eena di werl soh bad! Bot Gaad Kingdom wahn soon geh rid a aala dehnya prablem.
SAACH FI MOA
Luk pahn di evidens ahn si how wi noa dat di Kingdom mi staat rool eena 1914 ahn weh dis shuda meen fi wee.
4. Wen wi konk taim bays pahn di prafesi dehn eena di Baibl, wi si dat Gaad Kingdom staat rool eena 1914
Gaad mi mek King Nebyukadneza, di king a Babilan, ga wahn jreem fi shoa ahn weh mi wahn hapm eena di fyoocha. Di jreem ahn di eksplanayshan weh Danyel mi giv eena di Baibl mek it klyaa dat di jreem da-mi bowt Nebyukadneza roolaship ahn bowt Gaad Kingdom.—Reed Daniel 4:17.a
Reed Daniel 4:20-26, ahn den yooz di chaat fi ansa dehnya kweschan:
(A) Weh Nebyukadneza mi si eena ih jreem?—Si vers 20 ahn 21.
(B) Weh mi wahn hapm tu di chree?—Si vers 23.
(C) Weh mi wahn hapm da di en a di “sevn taimz”?—Si vers 26.
Weh di Jreem Bowt di Chree Ga fi Du Wid Gaad Kingdom
DI PRAFESI (Daniel 4:20-36)
Roolaship
(A) Wahn big big chree
Roolaship stap
(B) “Chap dong di chree,” ahn mek “sevn taimz paas”
Roolaship staat agen
(C) “Yu kingdom wahn bee fi yoo agen”
Wen dis prafesi mi kohn chroo di fers taim . . .
(D) Hoo di chree mi stan fa?—Si vers 22.
(E) Wen hihn mi stap rool?—Reed Daniel 4:29-33.
(F) Weh mi hapm tu Nebyukadneza wen di “sevn taimz” mi en?—Reed Daniel 4:34-36.
DI FERS TAIM DIS PRAFESI KOHN CHROO
Roolaship
(D) Nebyukadneza, di king a Babilan
Roolaship stap
(E) Afta 606 B.C.E., Nebyukadneza gaahn krayzi an ih stap rool fi sevn yaaz
Roolaship staat agen
(F) Nebyukadneza mi kohn bak tu ih sensiz an ih staat rool agen
Wen dis prafesi mi kohn chroo di sekant taim . . .
(G) Hoo di chree stan fa?—Reed 1 Chronicles 29:23.
(H) Wen dehn mi stap rool? How wi noa dat dehn neva mi-di rool wail Jeezas mi dehn pahn ert?—Reed Look 21:24.
(I) Wen ahn wehpaat dis roolaship mi staat agen?
DI SEKANT TAIM DIS PRAFESI KOHN CHROO
Roolaship
(G) Di king dehn weh mi rool oava Izrel mi reprizent Gaad roolaship
Roolaship stap
(H) Jeroosalem geh dischrai, ahn no Izrelait king rool fi 2,520 yaaz
Roolaship staat agen
(I) Jeezas staat rool da hevn az King a Gaad Kingdom
How lang di sevn taimz mi laas?
Som paats a di Baibl help wi fi andastan ada paats a di Baibl. Fi egzampl, di buk a Revilayshan seh dat chree an a haaf taimz eekwal 1,260 dayz. (Revilayshan 12:6, 14) Sevn taimz wuda bee dobl dat, ahn soh ih ad op tu 2,520 dayz. Eena di Baibl, sohntaim wahn day stan fi wahn yaa. (Ezekiel 4:6) Soh di sevn taimz weh di buk a Daniel taak bowt stan fi 2,520 yaaz.
5. Di werl chaynj sins 1914
Jeezas mi seh weh di werl wahn stan laik afta hihn staat rool az King. Reed Look 21:9-11, ahn den diskos dis kweschan:
Wich wan a dehnya ting yoo hyaa bowt er si di hapm?
Di apasl Paal tel wi how peepl mi wahn goh aan eena di laas dayz. Reed 2 Timoti 3:1-5, ahn den diskos dis kweschan:
Yoo si peepl di goh aan laik dat nowadayz?
6. Shoa dat yu bileev dat Gaad Kingdom di rool now
Reed Machyu 24:3, 14, ahn den diskos dehnya kweschan:
Weh impoatant werk shoa dat Gaad Kingdom don di rool?
How yoo ku help du dis werk?
Gaad Kingdom don di rool, an ih wahn soon rool oava di hoal ert. Reed Heebrooz 10:24, 25, ahn den diskos dis kweschan:
Weh eech wan a wi need fi du az wi si “di day di jraa kloasa”?
If yu laan sohnting weh ku help peepl ahn sayv dehn laif, weh yu wuda du?
WEH YU WUDA SEH IF SOHNBADI AKS YU: “Wai Jehoava Witnisiz seh dat 1914 da wahn impoatant yaa?”
WEH WI LAAN?
Di Baibl prafesi dehn ahn di tingz weh di hapm aal rong di werl proov dat Gaad Kingdom don di rool. Wee shoa dat wi bileev dis wen wi tek paat eena di preechin werk an goh da wi kangrigayshan meetinz.
Mek Wi Rivyoo:
Weh mi hapm da di en a di sevn taimz weh di buk a Daniel mi taak bowt?
How yoo noa dat Gaad Kingdom mi staat rool eena 1914?
How yoo ku shoa dat yu bileev dat Gaad Kingdom don di rool?
FAIN OWT MOA
Laan bowt weh peepl weh rait bowt hischri ahn weh ada peepl seh bowt how di werl chaynj sins 1914.
“Di Taim Wen Peepl Stap Kay Bowt Weh Rait ahn Weh Rang” (Awayk!, Aypril 2007)
Reed bowt how di prafesi da Machyu 24:14 mi chaynj wahn man laif.
“Ah Mi Lov Baysbaal Moa Dan Eniting Els!” (Di Wachtowa No. 3 2017)
How wi noa dat di prafesi eena Daniel chapta 4 ga fi du wid Gaad Kingdom?
“Da Wen Gaad Kingdom Mi Staat Rool? (Paat 1)” (Di Wachtowa, Aktoaba 1, 2014)
How wi noa dat di “sevn taimz” weh Daniel chapta 4 taak bowt mi en eena 1914?
“Da Wen Gaad Kingdom Mi Staat Rool? (Paat 2)” (Di Wachtowa, Novemba 1, 2014)
a Fi moa infamayshan, si di laas too aatikl eena di Fain Owt Moa sekshan a dis lesn.