Yu Tink Gaad Andastan Yoo?

WEH WI LAAN FAHN KRIYAYSHAN

Tink bowt di kloasis rilayshanship weh hyoomanz kuda eva gat, laik di rilayshanship weh aidentikal twinz gat. Dehn ga wahn ekschra kloas rilayshanship. Akaadn tu Nancy Segal, dairekta a di Twin Studies Center, ahn hoo da aalso wahn twin, seh dat sohn twinz ku kamyoonikayt an andastan eech ada gud-wan. Dis da weh wahn uman mi ga fi seh bowt di rilayshanship bitween shee an ih aidentikal twin: “Wee jos noa evriting bowt eech ada.”

Wai twinz ku andastan wan anada soh gud? Risaach shoa dat eevn doa wehpaat dehn groa op ahn how dehn payrents rayz dehn da paat a di reezn, aidentikal twinz ga veri simila DNA ahn dat da weh help dehn fi andastan eech ada moa.

TINK BOWT DIS: Fi shoar di Kriyayta weh mek wee ahn weh mek DNA ku andastan eech wan a wi beta dan enibadi els. In fak, di saamis Dayvid mi seh: “Yu haid mi wen Ai mi deh eena mi ma woom. Yu kuda mi eevn si mi boan dehn wen dehn mek mi eena wahn plays weh nobadi els kuda si. . . . Yu aiy dehn si mi eevn bifoa Ah baan, yu mi rait dong aala mi paats eena yu buk.” (Psalm 139:13, 15, 16) Gaad da di onli wan weh noa ahn kompleetli andastan, noh jos wi DNA, bot aalso evriting weh hapm tu wi eena laif weh afek wi persnaliti. Bikaaz Gaad noa soh moch bowt wee ahn wi DNA, wi ku bee shoar dat hihn reeli ahn chrooli andastan evriting bowt wi.

WEH WI LAAN FAHN DI BAIBL BOWT HOW GUD GAAD ANDASTAN WI

Dayvid mi pray: “Oa Jehoava, yu don saach chroo mi ahn yu noa mi. Yoo noa wen Ah sidong ahn wen Ah get op. Yoo noa weh Ah di tink bowt. Ah noh eevn seh eniting, bot luk! Oa Jehoava, yoo don noa weh Ah waahn seh.” (Psalm 139:1, 2, 4) Aalso, Jehoava noa how wi feel eena wi haat an ih eevn ‘noa weh wi tink ahn weh wi waahnt.ʼ (1 Chronicles 28:9; 1 Samuel 16:6, 7) Weh dehndeh vers teech wi bowt Gaad?

Eevn doa wi noh mait seh evriting weh wi tink ahn feel wen wi pray, wi Kriyayta noh jos si weh wi du bot ih aalso andastan wai wi du it. Hihn aalso andastan di gud weh wi wuda waahn du, eevn if wi kyaahn du weh wi waahnt bikaaz wi imperfek. Gaad da di wan weh put lov eena wi haat eena di fers plays, soh hihn mosi reeli eega fi si an andastan di lovin tingz weh wi tink bowt ahn weh wi waahn du.—1 Jan 4:7-10.

Di Skripchaz pramis wi

• “Jehoava si di raichos wan dehn, an ih hyaa wen dehn di poar owt dehn haat eena pryaaz tu ahn.”—1 PEETA 3:12.

• Gaad pramis: “Ai wahn gi yu andastandin ahn teech yu di way yu fi goh. Ah wahn kip mi aiy pahn yu wen Ah gi yu advais.”—PSALM 32:8.

GAAD GA LATA KOMPASHAN

If wi noa dat Gaad andastan weh wi di goh chroo ahn how wi feel, yu tink dat ku help wi fi deel wid haad taimz? Tink bowt weh mi hapm tu Anna, hoo da fahn Nigeria. Shee seh: “Ah mi wanda if ih mek sens fi kantinyu liv bikaaz a how haad tingz mi haad. Ai da-mi wahn wido an Ah mi-di tek kayr a mi daata hoo mi deh eena haaspital wid hydrocephalus (wahn kandishan weh yu geh tu moch floowid eena yu brayn). Rong da sayhn taim, Ah fain owt dat Ah mi ga bres kyansa an Ah mi haftu tek wahn serjri ahn difrent kaina chreetment fi fait di kyansa. Ih mi reeli haad fi mi bikaaz mi daata mi sik eena haaspital an Ai mi sik eena haaspital sayhn taim.”

Weh mi help Anna? Shee seh: “Ai mi tink bowt skripchaz laik Filipiyanz 4:6, 7, weh seh dat ‘Gaad wahn giv yu wahn kaina pees weh peepl kyaahn andastan. Eena da way, hihn wahn di protek yu haat ahn main.ʼ Evritaim Ah mi tink bowt da skripcha, Ai mi feel reeli kloas tu Jehoava, Ah mi noa dat hihn andastan mi beta dan how Ai mi andastan miself. An Ah mi aalso geh lata inkorijment fahn mi lovin spirichwal bradaz ahn sistaz eena di Kristyan kangrigayshan.

“Eevn doa Ah stil ga helt prablemz, tingz di goh beta fi mee ahn mi daata. Sins Jehoava deh pahn wi said, wi laan fi noh foakos pahn di bad wen wi di fays chalenjiz. Jaymz 5:11 reeli inkorijin bikaaz ih tel wi: ‘Wen peepl sofa ahn dehn noh giv op, wi seh dehn hapi. Unu hyaa bowt Joab an aal weh ih gaahn chroo, ahn how ih neva giv op. Ahn bikaaz a weh Jehoava mi du far ahn pahn di en, unu noa dat Jehoava ful a mersi ahn kompashan.ʼ” Jehoava mi kompleetli andastan Joab sichuwayshan, ahn wi ku bee shoar dat Hihn andastan eni kaina chalenjiz weh wee goh chroo.