Wat Da Gaad Naym?

Wen yu waahn geh fi noa sombadi, di fos ting yu wuda du da aks da persn, “How yu naym?” If yoo wuda aks Gaad da kweschan, weh yu tink ih wuda seh?

Ih wuda seh: “Ai da Jehoava. Dat da mai naym.”—Isaiah 42:8.

If di naym Jehoava nyoo tu yoo, da bikaaz moas peepl weh chranslayt di Baibl bayli yooz Gaad naym, ahn sohntaim, dehn noh yooz it non ataal. Moas a di taim, dehn yooz di taitl “LAAD” insteda Gaad persnal naym. Bot yoo mi noa dat eena di orijinal skroal dehn, Gaad naym deh eena di Baibl moa dan 7,000 taimz? Eena Heebroo, dehn yoostu rait Gaad naym wid foa konsonant. Eena Kriol, dehndeh foa leta da YHWH er JHVH, ahn wi prononks it az Jehoava.

Gaad naym deh eena di Heebroo Skripchaz, an ih deh eena wahn lata chranslayshanz a fi hihn Werd

WAI IH IMPOATANT FI NOA GAAD NAYM

Di naym impoatant tu Gaad. Nobadi mi gi Gaad ih naym; da hihn mi chooz it fi ihself. Jehoava mi seh: “Dis da mai naym fareva, ahn dis da how unu fi rimemba mi fahn jenarayshan tu jenarayshan.” (Exodus 3:15) Gaad persnal naym deh eena di Baibl moa dan eni a fi hihn taitl dehn, laik Almaiti, Faada, Laad, er Gaad. Ih naym deh een deh moa taimz dan ada peepl naym, laik Aybraham, Moaziz, Dayvid, er Jeezas. Moroava, da fi hihn wil fi mek peepl noa fi hihn naym. Di Baibl seh: “Ahn fi mek peepl noa dat fi yoo naym da Jehoava; onli yoo da di Moas Hai oava aal di ert.”—Psalm 83:18.

Di naym impoatant tu Jeezas. Eena di Laadz Pryaa, Jeezas mi teech ih falowaz fi pray tu Gaad. Ih mi tel dehn fi seh: “Mek wi kip yu naym hoali.” (Machyu 6:9) Jeezas ihself mi pray tu Gaad; ih mi seh: “Faada, mek dehn si how wandaful yu naym.” (Jan 12:28) Tu Jeezas, ih mi impoatant fi mek hihn aana Gaad naym, az a mata a fak, dat mi kohn fos eena Jeezas laif. Dats wai ih kuda mi seh dis eena wan a ih pryaaz: “Ai shoa dehn da hoo yoo an Ah wahn kip aan di shoa dehn.”—Jan 17:26.

Di naym impoatant tu peepl hoo noa Gaad. Gaad peepl eena di paas mi noa dat hihn mi protek ahn sayv dehn bikaaz a fi hihn speshal naym. Di Baibl seh: “Di naym a Jehoava da wahn schrang towa. Di raichos wan dehn ron een deh ahn geh protekshan.” (Proverbs 18:10) Ih aalso seh: “Evribadi weh kaal pahn di naym a Jehoava wahn geh sayv.” (Joel 2:32) Di Baibl seh dat aala Gaad servant dehn wuda yooz fi hihn naym; ih seh: “Aala di peepl dehn wahn waak eena di naym a fi dehn gaad, bot wee wahn waak eena di naym a Jehoava, fi wee Gaad, fareva an eva.”—Micah 4:5; Aks 15:14.

WEH DI NAYM TEECH WI

Di naym teech wi dat onli Jehoava da di chroo Gaad. Wahn lata Baibl teechaz agree dat di naym Jehoava meen “Hihn Wahn Mek Ih Bee er Hapm.” Jehoava help wi fi andastan weh ih naym meen. Ih mi tel Moaziz: “Ai Wahn Bee Weh Ai Chooz fi Bee.” (Exodus 3:14) Soh Gaad naym teech wi dat hihn da moa dan jos di Kriyayta hoo mek evriting. Ih teech wi dat hihn ku bee wateva hihn need fi bee soh dat fi hihn perpos kohn chroo. Bot ih meen moa dan dat. Ih meen dat hihn ku mek eniting weh ih kriyayt bee weh hihn need it fi bee fi mek ih perpos kohn chroo. Dis inklood wee. Di taitl dehn weh Gaad gat diskraib ih pozishan, atariti, er powa. Bot ih persnal naym, Jehoava, teech wi da hoo hihn an aal weh hihn ku bee.

Di naym teech wi dat Gaad inchrestid eena wi. Di meenin a Gaad naym teech wi how hihn feel bowt wee ahn di tingz weh hihn mek. Moroava, di fak dat Gaad tel wi ih naym teech wi dat ih waahn wi noa ahn. Aftaraal, da hihn mi tel wi ih naym eevn bifoa wi mi noa fi aks bowt it. Soh, Gaad waahn wi si hihn az wahn reel Persn hoo wi ku geh fi noa ahn jraa kloas tu.—Psalm 73:28.

Wen wi yooz Gaad naym ih shoa dat wee inchrestid eena hihn. Sopoaz yu waahn mek frenz wid sombadi ahn yu aks ahn fi kaal yu bai yu naym, bot da persn rifyooz fi yooz yu naym. How yu wuda feel? Yu mait staat tu wanda if da persn reeli waahn bee yu fren. Jos laik dat, Jehoava tel wi ih naym, an ih inkorij wi fi yooz it. Wen wi yooz ih naym, wi di shoa Jehoava dat wi waahn geh kloas tu ahn. Hihn eevn noatis “di wan dehn weh tink bowt fi hihn naym”!—Malachi 3:16.

Soh, if wi waahn laan bowt Gaad, wi haftu noa ih naym. Dis da di fos ahn moas impoatant ting fi noa. Bot dat da noh aal. Wi need fi noa di kaina persn hihn.